2 VaK. 3 - NOVO TESTAMENTO EM NDAU

Mumushando wo vhangeri

¹ Tinotangazve kujiganzisa pachedu here? Nokuti tinotama here kudari ngo zvo vanotama vamweni, tshamba jo kutendwa jinotarihwa kwomuri, nokuti jinobva kwomuri?

² Imwimwi muri tshamba yedu yakatahwa mumwoyo mwedu, inozivikanwa no kujijwa ngo vandhu vese;

³ munopangijira kuti muri tshamba ya Kristu, yakashandwa ndisu, isikazivi kutahwa ngo inki, asi, ndi Mweya wa Mwari unopona; isikazi kutahwa pamarusamba emapuwe, asi pamarusamba omwoyo yo nyama.

⁴ Nesu tinakwo kugonda kwakadaro ndi Kristu kuna Mwari:

⁵ Andikwopi kuti isisu tinokwanisa pachedu kuti tiverenge ngo chiro kuti chinobva kwetiri, asi kukwanisa kwedu kunobva kuna Mwari,

⁶ uwozve wakatiita vanokwanisa tiri vashandiri vo chitenderano chipsha; andichopi cho kubatirira kumazwi, asi cho Mweya: Ngokuti kubatirira izwi kunouraya, asi Mweya unopa kupona.

⁷ Asi kudari ukwo kuri kufa, kwakatahwa no kutsetswa pa mapuwe, kwakaviya no uthende, kwokuti vana vaIsraeri avasaikona kuringisisa hope ya Mosi ngo ndava yo kun'anikira kwayo; uhwo uthende hwaipinda;

⁸ kunozopinda kwakaitawani kushandira kuri kwo Mweya kuva no uthende?

⁹ Ngokuti kudari kushandira kwo kurashwa kwayiva no uthende, kushandira kwo kururama kunopinda kwakaitawani?

¹⁰ Ngokuti ngo gwinyiso icho chakaitwa no uthende, inga chisina uthende ngo iyi njira, ngo ndava yo uthende hwakapindisisa.

¹¹ Ngokuti kudari icho chaipinda chaiva no uthende, kakurutu icho chinogara chino uthende.

¹² Ndizvo techiva no kugonda kwakadaro, tinovereketa ngo kushinga kakurutu,

¹³ atizivi kudari ndi Mosi, uwo wakafukijira hope yake ngo jira, kuti vana vaIsraeri vasazoringisisa magumo echaipinda.

¹⁴ Asi mipinimijo yavo yakakonjiswa; ngokuti mbhera nyamasi apo Chitenderano cho Karetu naapo chechijijwa jira iro rindoripo risikazivi kubviswa, iro jira rakabviswa ndi Kristu.

¹⁵ Asi mbhera nyamasi, apo matahwa a Mosi echijijwa, jira iro rindoripo panyezuru po mwoyo yavo.

¹⁶ Asi kudari mundhu echizokunukukira kuna Mambo, jira iro rinozobviswa.

¹⁷ Zvino Mambo uri Mweya: Naapo pano Mweya wa Mambo, kuripo kusununguka.

¹⁸ Asi isisu tine hope jisikazivi kufukijwa, techipangijira uthende hwa Mambo, kudari ngo chibuko, tinotsandujwa kubva kuuthende humweni kuenda kuuthende humweni, kudari ngo zvinobva kuna Mambo ndi Mweya.