2 VaK. 2 - NOVO TESTAMENTO EM NDAU

¹ Asi ndakajiemesera ichi pachangu, kuti andizoviyizve kwomuri ndakasururika.

² Ngokuti kudari ndakamusururisa imwimwi, ndizvo ndiyani ungazondidakarisa, kwega uwo wakasururiswa ndini?

³ Neni ndakatara ichi kwomuri, kuti ndoogumeyo ndingava no kusururika ngaavo vendinosisira kudakara ndivo, ndechigonda kwomuri mwese kuti kudakara kwangu kuri kudakara kwenyu mwese.

⁴ Ngokuti ngo kutambujika kukurutu no kuhwajihwa kwo mwoyo ndakatara kwomuri, ndine misoji mizhinji; haiwa kuti musururike, asi kuti muzive rudo rukuru rwondinawo kwomuri.

Kuregerehwa kwo mushaishi

⁵ Asi kudari aripo pikija ndiyani wakasururiswa, iye aazivi kusururisa inini, asi kwega rupande, kuti ndisazonyanya kutsikirira pasi kumuthikisa ndava mwese.

⁶ Kutambuja kwo vandhu vazhinji kunokwana kumundhu wakadaro.

⁷ Kunopesana no icho, kwaidikana kuti imwimwi mumuregerere, no kumuembezera, kwokuti ngo njira pikija ngoyapi mundhu wakadaro asazomijwa ngo kutambujika kwakapinda kukura.

⁸ Ndizvo ndinomupota kuti mupangijire kwaari rudo rwenyu.

⁹ Ngo iyi ndava ndakatara kwomuri kuti ndimueje ndimuzive, kuti munopurutana here ngo zviro zvese.

¹⁰ Asi kuno uwo wo munoregerera chiro nenivo ndinomuregerera. Ngokuti icho chondakaregerera, kudari ndakaregerera chiro, ndakachiregerera ngo ndava yenyu mukuvona kwa Kristu;

¹¹ kuti Sathani asazovona chokutinyisa ndicho: Ngokuti atiri vasikazivi mazano ake.

Vhangeri rinonasa kuaashihwa

¹² Zvino apo ndaguma Trowa koochumaira vhangeri ra Kristu, naapo musuvo wabewurihwa kwendiri ndi Mambo.

¹³ Inga ndisina kuzorora mu mweya wangu, ngokuti andizivi kumuvona Titosi munukuna wangu. Asi ndechivaeneka, ndakaenda Makedhoniya.

¹⁴ Asi ngaabongwe Mwari unoita kuti tinyise ngo nguva jese ndiye Kristu, unovonisazve ndisu gwema rokuziva kwake kundau jese.

¹⁵ Ngokuti isisu tiri gwema rakanaka ra Kristu kuna Mwari, kwavari vanoponeswa, no kwavari vanorashika;

¹⁶ kune avo tiri gwema ro kufa kuenda mukufa; no kune vamweni tiri gwema ro kupona kuenda mukupona. Ndiyani unokwanisa izvi?

¹⁷ Ngokuti isisu atizivi kudari ngo vazhinji, vanoshaishira izwi ra Mwari; asi tiri avo vari vo gwinyiso, tiri avo, vari va Mwari, mukuvona kwa Mwari tinovereketa ndiye Kristu.