2 VaK. 13 - NOVO TESTAMENTO EM NDAU

Zvizhiviso zva Pauri

¹ Iyi inguva yochitatu yo ndinoviya kwomuri. Ngo miromo yo zvapupu zviviri nokuti zvitatu mazwi ese anozogwinyiswa.

² Ndakamubvunja kutanga, zvino ndomubvunjazve, kudari ngo zvondaivapo ngo mukuvo wo chipiri, ndizvo zvino ndisipo, ndinonanga kwavari vakamboshaisha no kuno vamweni vese, kuti ndoviyeyozve, andizovakunguriri;

³ kwechivoneka kuti munopshaka chivoniso cha Kristu unovereketa kwendiri, iye usiri wakarembejeka kwomuri, asi une simba mukati mwenyu.

⁴ Ngokuti pikija wakakohomehwa pa muchinjiko ngo ndava yo kurembejeka, asi unopona ngo simba ra Mwari. Ngokuti nesuvo tiri vakarembejeka kwaari, asi tinozopona naye ngo simba ra Mwari kwomuri.

⁵ Jiejenyi imwimwi, kuvona kuti muri mukutenda here; jivonisenyi pachenyu. Amuzivi here pachenyu, kuti Kristu uri mukati mwenyu? Kudari musiri vakarashwa.

⁶ Asi ndinogonda kuti imwimwi munoziva kuti isisu atiri vakarashwa akadi.

⁷ Zvino tinokumbira kuna Mwari kuti musaita zvakashata; andikwopi kuti isisu tivoneke tiri vanotendwa, asi kuti muite zvinoreremejeka, pikija isisu tinoverengwa tiri vanorashwa.

⁸ Ngokuti apana chotingaita chinorwisana no gwinyiso, asi zvinoimirirana no gwinyiso.

⁹ Ngokuti tinodakara apo isisu tiri vakarembejeka nemwi mwakagwinya. Zve, tinokumbirira ichi kuti muite vakaperera.

¹⁰ Ngo iyi ndava ndinotara kwomuri izvi zviro ndisipo, kuti ndavapo ndisazofemeruka, kudari ngo simba rondakapuwa ndi Mambo ro kuvaka, risiri ro kupwanya.

Mazwi okupejisira

¹¹ Pakupejisira, hama, chisaranyi. Itanyi vakaperera; embejerwanyi; itanyi vano mupinimijo umwewo; mugare mukunyarara: Na Mwari wo rudo no wo kunyarara unozova nemwi.

¹² Chungamijananyi ngo muromo ngo kucheneswa. Vese vakacheneswa vanomutambisa.

¹³ Nyasha ja Mambo Jesu Kristu, no rudo rwa Mwari, no kuiyana kwo Mweya Wakachena ngazvigare nemwi mwese.