2 VaK. 12 - NOVO TESTAMENTO EM NDAU

Zvivoniso zva Pauri

¹ Kunosisira kuti ndiganze, pikija akusisi; asi ndakaguma mukuvereketa ngo zvivoniso na ngo zvakapangijirwa zva Mambo.

² Ndaiziva mundhu wayiva kuna Kristu makore ari gumi na marongomuna apinda, (pikija wayiva mumuviri, andizivi; pikija wayiva ngokunja kwo kuva no muviri andizivi; ndi Mwari unoziva), uwo mundhu wakakwijwa mbhera kuguma mu gore rochitatu.

³ Neni ndaiziva uwo mundhu pikija wayiva no muviri, nokuti wayiva ngo kunja kwo kuva no muviri, andizivi; ndi Mwari unoziva.

⁴ Ngo njira yaakakwijwa ndiyo kuenda muparadhesi, naye wakazwa mazwi asikabviri kuvereketwa, asikatendehwi mundhu kuti aaverekete.

⁵ Ngo ndava yo wakadaro ndinozoganza; asi ngo ndava yangu andizoganzi, kwega kuganza ngo kurembejeka kwangu.

⁶ Ngokuti pikija ndechida kuganza andizoiti benji; ngokuti ndaizovereketa gwinyiso; asi ndinovereketa kuyita kudaro, kuti kusazovapo mundhu ungapinimija ndini, kupinda mavonero aanondiita, nokuti kupinda mazwire aanoita ndini.

⁷ Na ngo ndava yo kukura kwo izvo zvakapangijirwa, kwendiri, kuti ndisanyanya kutundhumajwa kupinda mutengo, kwakapuwa kwendiri muzwa mumuviri, uri ndhumwa ya Sathani, kuti andipambhaje, kuti ndisazotundhumajwa kupinda mutengo.

⁸ Ngo ndava yo ichi, ndakapota Mambo katatu, kuti ubviswe kwendiri.

⁹ Naye wakati kwendiri: “Nyasha jangu jinokwana kwouri. Ngokuti simba rangu rakaperera mukurembejeka.” Ndizvo ndinozopinda kudakara mukurembejeka kwangu, kuti simba ra Kristu rigare panyezuru pangu.

¹⁰ Ndizvo ndinodakara mukurembejeka, mukuremajwa, mukutamikihwa, mukutambujwa, mumatambujiko, ngo ndava ya Kristu; ngokuti apo ndiri wakarembejeka apo ndiri une simba.

Kukakaseka ngo ndava yo chiara cho Korinte

¹¹ Ndava benji; Imwimwi mwakandivangijira kuti ndidaro; ngokuti kwaisisa kuti nditendwe ndimwi, ngokuti andiri mudokopi ngo chiro na chimwe kune vapostori vakuru, pikija andiri chiropi.

¹² Ngo gwinyiso zvivoniso zvo upostori zvakaitwa pakati penyu mukusengerera kwese, ngo zvivoniso no mishamiso no mishando ine simba.

¹³ Ngokuti chinyi chemwakapindwa ndicho kuyita vari pasi kune zviara zvimweni, kwega kuti pachangu andizivi kuyita mutwaro kwomuri? Ndiregererenyi uku kusikarurami.

¹⁴ Ringiranyi, inguva yochitatu yondanasirira kuti ndiviye kwomuri; neni andizoiti mutwaro kwomuri; ngokuti andipshaki zvenyu, asi ndinopshaka imwimwi; ngokuti akudikani kuti vana vaunganijire vabari, asi kuti vabari vaunganijire vana.

¹⁵ Neni ndingazopejera zvese zvangu ngo kudakara, no kupejwazve ngo ndava yo mweya yenyu, kudari ndechimuda kakurutu, kunopinda kudodoka kudiwa kwangu ndimwi here?

¹⁶ Asi pikija zvakanyadaro, inini pachangu andizivi kuyita mutwaro kwomuri; asi ndechiva wakangwara, ndakamubata ngo urimbwi.

¹⁷ Ndakaviihwa here ndimwi ngo umwe wo avo vondakatuma kwomuri?

¹⁸ Ndakapota Titosi, ndikatuma pamwepo naye hama: Titosi une chaakaviihwa ndicho here kwomuri? Atizivi kufamba here ngo mweya unotojana? Atizivi kufamba here muzvitsiko zvakatojana?

¹⁹ Munopinimija here kuti nguva iyi yese tinojipembeja kwomuri? Mukuvona kwa Mwari tinovereketa ndi Kristu. Asi zviro zvese, vanodikana, zviri zvokuvakiwa kwenyu.

²⁰ Ngokuti ndinotya, kuti pikija ngeiri njira, apo ndoviyeyo, ndingazomuvona musiri avo vondingada kuti muve vakadaro, neni pachangu ndivoneke kwomuri ndiri wo musikadi kuti ndiite wakadaro; pikija ngeiri njira kungazovapo hasha, no ndurumwa, no ushungu, no kusikazwana, no kurevana, no makuhwa, no kujikuja, no hohoho;

²¹ kuti apo ndogumeyozve, Mwari wangu azondipfavisa pamberi penyu, neni ndingazotsumba ngo ndava yo vazhinji vakashaisha ngo pamberi, vasikazivi kutenderuka kubva kwo kusikasukiki no kuangarara, no kupsheruka kwo vakayita.