2 VaK. 11 - NOVO TESTAMENTO EM NDAU

Pauri unorwisana no vapostori vokunyepa

¹ Kudari mwechindisengerera kadodoko muupenji hwangu! Asi ngo gwinyiso munondisengerera.

² Ngokuti ndine ndurumwa ndimwi, ngo ndurumwa ya Mwari; ngokuti ndakamubvunjiririra kumwamuna umweni, kuti ndimutatijire kuna Kristu kudari ngo mbhandwe ichakazara.

³ Asi ndinotya kuti ngo njira pikija ngoiri, kudari ngo nyoka yakachengejera Evha ngo urimbwi hwayo, ngokudaro mipinimijo yenyu ingazoshaishihwa kubva kune chakareruka no kucheneswa zviri kuna Kristu.

⁴ Ngokuti kudari umweni echiviya echichumaira Jesu, wetisikazivi kuchumayira isisu, nokuti kudari mwechiashira mweya wakapaukana, wo musikazivi kumboashira, nokuti kuashira vhangeri rimweni, romusikazivi kumboashira, izvo zvakadaro munganasa kuzvitendera.

⁵ Ngokuti ndinorangarira kuti na ngo chidodoko, andiri mudokopi nokune vapostori vakuru.

⁶ Pikija andisainasa kuvereketa, asi andiri wakadaropi mukuziva; haiwa, ngo zviro zvese takazvipangijira kwomuri pakati po vandhu vese.

⁷ Ndakashaisha here ngo kujipfavisa, kuti imwimwi mukuriswe, ngokuti ndakachumaira kwomuri vhangeri ra Mwari, ndisikapuwi musharo?

⁸ Ndakazvitorera zviara zvimweni, ndechitora musharo ndizvo kuti ndishandire imwimwi;

⁹ naapo ndinemwi, ndechitama, andizivi kuyita mutwaro kuno mundhu, ngokuti apo hama javiya jechibva Makedhoniya, jakandipa zvese zvondaitama; na ngo zviro ndakangwarira kuti ndisazoita mutwaro kwomuri neni ndinozojingwarira kudaro.

¹⁰ Kudari ngo gwinyiso ra Kristu riri kwendiri apana mundhu unozondipinga ngo kuganza uku mu nyika jo Akaya.

¹¹ Ndava ngo yenyi? Ngokuti andimudi here? Mwari unoziva.

¹² Asi icho chendinoita, ndinozochiyita kuti nditamise ndava kwavari vanopshaka ndava, kuti kune izvo zvo vanoganza ndizvo, vavoneke vakadari ndisu.

¹³ Ngokuti vandhu vakadaro vari vapostori vokunyepa, no vashandi vo kuchengejera, vechijitsanduja kuyita vanonga vapostori va Kristu.

¹⁴ Andichopi chiri chinoshamisa; ngokuti Sathani pachake unojitsanduja kuyita anonga ari ngirosi yo kujeka.

¹⁵ Ndizvo andizvopi zviro zvikuru kudari vashandi vakezve vechijitsanduja kuyita vanonga vari vashandi vo kururama: Magumo avo anozodari ngo mishando yavo.

Kutambujika kwa Pauri

¹⁶ Ndinotizve, kusazovapo mundhu unopinimija kuti inini ndiri benji; asi kudari mwechipinimija kudaro, ndiashirenyi kudari ngo benji kuti ndiganze padodoko.

¹⁷ Izvo zvondinovereketa, andizvivereketeri kudari ndi Mambo, asi ngo zvo upenji mukugonda uku kwo kuganza kwangu.

¹⁸ Kwechivoneka kuti vazhinji vanoganza ngo zvo nyama ndinozoganzavo inini.

¹⁹ Ngokuti munosengerera mapenji ngo kudakara, imwimwi mwakangwara.

²⁰ Ngokuti munosengerera mundhu kudari iye echimuyita varanda, kudari echimupamba, kudari echimutora kuyita hloko, kudari echijikurisa, kudari echimupambhaja mu hope.

²¹ Ndinovereketa ngo njira yo kushora, inga taiva vakarembejeka, asi pikija ngeiri njira yaanozoshinga ndiyo mundhu, ndinovereketa ngo upenji, ndinoshingavo.

²² Vari vaHebheru here? Nenivo, vari vaIsraeri here? Nenivo, vari vo ruji hwa Abrahama here? Nenivo.

²³ Vari vashandi vaKristu here? (Ndinovereketa kudari ngo unopenga), inini ndinovapinda; mumushando ndakapinda kakurutu, mukungwiniswa muguniya ndakavapinda kakurutu, mukurohwa ngo ndonga kakurutu ndakavapinda, mungozi mikuvo mizhinji.

²⁴ Ndakachaiwa ngo vajudha kashanu ngo zvipembere zviri makumi marongomuna kwechiregehwa chimwe.

²⁵ Ndakarohwa katatu ngo ndonga, ndakafuhwa ngo mapuwe kamwe, ndakapwanyikihwa ngo ngarava katatu, usiku humwe no zuva rimwe ndaiva mu jombe;

²⁶ ndaiva muhwendo kazhinji, mungozi jo mumurambo, mungozi jo majongoni, mungozi jo vojinja rangu, mungozi jo vo majinja, mungozi jo mu madhoropa, ngozi jo mubani, mungozi jo mujombe, mungozi jo pakati po hama jo kunyepa;

²⁷ mukushanda no mukuhwajihwa, mukurinda kazhinji, mukupera ngo njara, no nyota, mukuera kuha kazhinji, mukutondhorehwa, no mumutitinini.

²⁸ Ngo kunja kwo izvi zvinondigumira zvo kunja chiripo chinondimanikija zuva ngo zuva chiri kukakasekera zviara zvese.

²⁹ Ndiyani wakarembejeka neni andiri kurembejeka naye? Ndiyani unokugunyiswa neni ndisikasvipi mwoyo?

³⁰ Kudari kwechisisira kuti ndiganze, ndinozoganza ngo izvo zvo kurembejeka kwangu.

³¹ Mwari Baba wa Mambo Jesu, unotendwa mbhera narini, unoziva kuti andinyepi.

³² Mu Dhamaseku nduna yaitonga pasi pa Aretasi mambo, yakarinda dhoropa ro vaDhamaseku kuda kundisunga,

³³ neni ndakabzuswa ngo pa fasitera po biravira ndiri mudendere, ndakapokonyoka kubva munyara jake.