2 VaK. 10 - NOVO TESTAMENTO EM NDAU

Pauri unorwira mushando wake

¹ Zvino inini Pauri pachangu, ndinomupota ngo kusengerera na ngo kupfava kwa Kristu, inini ndiri pakati penyu ndakapfava, asi ndinokushinga kwomuri ndisipo;

² eya, ndinomupota, kuti ndiripo ndisazopangijira kushinga kwo kurwisana ndikwo no vamweni, avo vanotikarakajira kunonga tinofamba ngo zvo nyama.

³ Ngokuti pikija techifamba mumuviri, atirwi akadi kudari ngo kwo nyama.

⁴ Ngokuti zvokurwa ndizvo zvedu azviri zvo nyama akadi, asi zvino simba pamberi pa Mwari ro kupwanya ndau jakagwinya jo hondo.

⁵ Kupwanya mikarakajo no zviro zvese zvinojikurisa kurwisana no kuziva kwa Mwari, no kuviisa mipinimijo yese muuranda hwo kupurutana Kristu.

⁶ Takanasirira kukhauwisa kusikapurutana kwese, apo kupurutana kwenyu kwazarisika.

⁷ Imwimwi munoringira zviro zviri pamberi po hope jenyu, kudari aripo mundhu unojigonda kuti uri wa Kristu, ngaarangarire ichizve mukati mwake, kuti, kudari ndiye uri wa Kristu, nesu takadarovo.

⁸ Kudari ndingaganza ngo zvakatikuti ngo simba redu, ro takapuwa ndi Mambo, rokumuvaka ndiro, haiwa rokumurasha, andizopsherujwi akadi,

⁹ kuti ndisaita inga ndinomutyisijira ngo tshamba jangu.

¹⁰ Ngokuti vanoti, tshamba jake jine masoko makuru, jine simba, asi mukuvoneka kwo muviri uri wakarembejeka, no kuvereketa kwake akuna shwiro.

¹¹ Mundhu wakadaro ngaarangarire ichi, kuti kudari ngozvotakananga mutshamba jedu ngo izwi, tisipo, ndizvo zvotinozoita tiripo.

¹² Ngokuti atizivi kushinga kujijisa vamweni vanojiganzisa, asi avo pachavo vechijiezanisa ngokwavo nokujitojanisa umwe no umweni; vari vasikazwisisi.

¹³ Asi isisu atizoganzi kupinda chotiri ndicho, asi kudari ngochiezaniso cho mushando waakakovanisa Mwari kwetiri, kuyita chiezaniso cho kuguma no kwomuri;

¹⁴ ngokuti atinyanyi kujitambanuja, inga atizivi kuguma kwomuri, ngokuti tisu takatanga kuguma kwomuri no vhangeri ra Kristu;

¹⁵ atiganzi kupinda chotiri ndicho, izvo zvinoti, atiganzi ngo mushando wo vandhu vamweni; asi tinogonda kuti kudari kutenda kwenyu kwechikura, isisu tinozokujwa zvakapinda kukura mukati mwenyu, ngokuteveja mupango wo takapuwa.

¹⁶ Kuti tichumaire vhangeri kundau jiri ngo mberi kwenyu, tisikaganzi ngo mushando yo umweni yakanasirihwa kwetiri,

¹⁷ Asi iye unoganza, ngaaganze kuna Mambo.

¹⁸ Ngokuti andiyepi unojiganzisa unotendwa, asi waanoganzisa Mambo.