2 VaK. 1 - NOVO TESTAMENTO EM NDAU

Muchungamijo

¹ Pauri, mupostori wa Kristu Jesu ngokuda kwa Mwari, na Timoti hama yedu, kune chiara cha Mwari chiri mu Korinte, pamwepo no vakacheneswa vese vari mu nyika yese yo Akaya.

² Nyasha ngajive kwomuri, no kunyarara kunobva kuna Mwari Baba wedu na Mambo Jesu Kristu.

Kubonga ngo rubesero rwa Mwari

³ Ngaabongwe Mwari Baba wa Mambo wedu Jesu Kristu, Baba wo nyasha, uri Mwari wo kuembezera kwese.

⁴ Uwo unotiembezera mukutambujika kwedu kwese, kuti isisuvo tikone kuembezera avo vari mukutambujika pikija kwakaitawani ngo ukwo kuembezehwa kwo tinoembezehwa ndikwo ndi Mwari.

⁵ Kudari ngo kutambujika kwa Kristu kunowanjwa kwetiri, ngokudaro kuembezehwa kwedu kunowanjwavo ndi Kristu.

⁶ Asi pikija techitambujika kuri kuembezehwa no kuponeswa kwenyu; pikija techiembezehwa kuri kuembezehwa kwenyu, kunoshanda mukushingirira no kusengerera kwaao matambujiko etinotambujikavo ndiwo.

⁷ No gonda redu ndimwi rakagwinya; techiziva izvi, kuti kudari ngo zvo munoashira matambujiko, ngokudaro munozoashira kuembezehwa.

⁸ Ngokuti atidi, hama, kuti muite vasikazivi ngo kutambujika kwedu kwakatigumira tiri mu Aziya, kuti takachikihwa pasi kakurutu kupinda simba redu, kwokuti no gonda rese rokuti tinozopona rakapera.

⁹ Eya, isisu pachedu taiva no ndava yo kufa mukati mwedu, kuti tisajigonda pachedu, asi kuti tigonde kuna Mwari unomusa vakafa;

¹⁰ uwo wakatinunura mukufa kwakakura kudaro, unozotinunura; kwaari tinogonda kuti uchazotinunura.

¹¹ Imwimwivo mwechibesera pamwepo nesu ngo ndava yedu ngo mukumbiro yenyu; kuti ngo ndava yo chipo chakapuwa kwetiri ngo vazhinji, chingabongwa ngo vazhinji ngo ndava yedu.

Pauri unosanduja zano rake

¹² Ngokuti uku ndikwo kukuja kwedu, kuri chapupuzve mu mipinimijo yedu, kuti takajibata mu nyika mukucheneswa no mugwinyiso ra Mwari, kakurutu takaita kudaro kwomuri, kusiri ungwaru hwenyama akadi asi ngo nyasha ja Mwari.

¹³ Ngokuti atitari zvimweni, kwega zvomunoziva no kuzvitendazve, neni ndinogonda kuti munozozvitenda mbhera kumagumo.

¹⁴ Kudari ngo zvo mwakatendazve ngo zvimweni, kuti isisu tiri kukuja kwenyu kudari ndimwizve muri kukuja kwedu, ngo zuva ra Mambo wedu Jesu.

¹⁵ No mukugonda uku ndaipinimija kuti nditange kuviya kwomuri, kuti muwane chidakajiso chochipiri;

¹⁶ no kupinda, ngo kwomuri kuenda Makedhoniya, kubvazve Makedhoniya ndipetuke kwomuri, no kuendeswa mberi ndimwi muhwendo hwangu kuenda Judhiya.

¹⁷ Ndizvo apo ndaipinimija kudaro, ndakapangijira kurerusa here? Ngokuti izvo zviro zvondinoemesa kuti ndiite, ndinozozviemesa here ngo kwo nyama, kuti kungavapo kwendiri kunanga kuti, eya, eya, nokuti haiwa, haiwa?

¹⁸ Asi kudari ndi Mwari unogondeka, izwi redu kwomuri andiropi rokuti, eya, na haiwa.

¹⁹ Ngokuti Mwana wa Mwari, Jesu Kristu, wakachumaihwa pakati penyu tisu, inini na Sirivhana na Timoti, wayinga asiri wokuti, eya nokuti haiwa, asi wayiva eya.

²⁰ Pikija zvigondiso zvakayita mawandirenyi, zvigondiso zva Mwari kwaari zviri, eya; ndizvozve ndiye uripo kuti: Ameni, kuyita kukujwa kwa Mwari ndisu.

²¹ Zvino uwo unotigwinyisa pamwepo nemwi kuna Kristu, no uwo wakatizoja, ndi Mwari.

²² Uwozve wakatidira chinamiro, akatipazve chibatiso cho mweya mumwoyo mwedu.

²³ Asi ndinodanija Mwari kuti aite chapupu kumwoyo wangu, kuti ngo ndava yo kumusengerera andizivi kuviya Korinte.

²⁴ Haiwa, kuti tive no kutonga panyezuru po kugonda kwenyu, asi kuti tiri vabeseri vo kudakara kwenyu; ngokuti munoima ngo kugonda.