2 Tim. 4 - NOVO TESTAMENTO EM NDAU

¹ Ndinokupanga mukuvona kwa Mwari, no kwa Kristu Jesu, uwo unozotonga vachazwa no vakafa, mukuvoneka kwake no umambo hwake;

² chumaira izwi; ugwinyisire ngo nguva kwayo, no isiri nguva kwayo; rambisa, uthuse, upange, ngo kusengerera kwese no kujijisa.

³ Ngokuti inozovapo nguva yo vasikazoshingiriri zvijijiso; asi vano njeve jinovava, vanozojiunganijira vajijisi kudari ngo kuemura kwavo;

⁴ vanozoreesa njeve javo kubva kugwinyiso, vechienda kungano.

⁵ Asi iwewe, wechirinda ngo zviro zvese, gwinya kumatambujiko, ita mushando wo muvhangeri, pejisa mushando wako.

⁶ Ngokuti zvino ndotoduruhwa kuitwa mudiro, no mukuvo wokuenda kwangu waguma.

⁷ Ndakaambana kuambana kwakanaka, ndakapeja mujaho wangu, ndakangwarira kugonda;

⁸ kubvira zvino ragajikihwa inini junguja ro kururama, raanozondipa Mambo, mutongi wakarurama, ngo iro zuva; aazondipi ndega, asi no kwavari vese vakada kuvoneka kwake.

Mazwi okupejisira

⁹ Gwinya kuviya kwendiri ngokukasira.

¹⁰ Ngokuti Dhemasi wakandisiya ngokuda iyi nyika, wakaenda Tesaronika; Kresiki wakaenda Garatiya, Titosi wakaenda Dharamatiya.

¹¹ Ndi Ruka ega uchineni. Tora Marku, uviye naye; ngokuti unondibesa kukurutu kwondiri mumushando.

¹² Asi ndakatuma Tukiko ku Efesu.

¹³ Jazi rondakasiya Trowa na Karpo, uya naro woviya no tshamba kakurutu maphepha omatovo.

¹⁴ Arixandreu mupfuri wo matusi wakandishaishira kakurutu, Mambo unozomuhwirijira kudari ngo mishando yake:

¹⁵ Newe unosisira kungwara ndiye ngokuti wakakanija kakurutu mazwi edu.

¹⁶ Pakujirwira kwangu kwo kutanga apana wakandiimirira, asi vese vakandisiya. Isaita ndava kwavari.

¹⁷ Asi Mambo wakandiimirira, akandigwinyisa; kuti masoko ateketeswe aembho ndini nokuti majinja ese azwe; neni ndakanunurihwa kubva kwo muromo wo mbhondoro.

¹⁸ Mambo unozondinunurira kubva kumishando yese yakashata, unozondiponesa mbhera ndive mu umambo hwake hwo mu denga: Kwaari ngakuve no uthende mbhera narini. Ameni!

Muchungamijo

¹⁹ Tambisa Prisika na Akwira no mbhuri ya Onesiforo.

²⁰ Erastu wakasara Korinte, asi ndakasiya Trofimu Miretu echihwara.

²¹ Kasira kuti uviye chipepo chisati chaguma. Yubhuru unokutambisa, na Pude, na Rinu, na Kraudhiya no vatendi vese.

²² Mambo ngaave no mweya wako. Nyasha ngajive newe.