2 Tim. 3 - NOVO TESTAMENTO EM NDAU

Matambujiko okugumisira

¹ Asi ziva ichi: Kuti kumazuva okugumisira nguva jo kutambujika jinozoviya.

² Ngokuti vandhu vanozojida, vechidisisa upfumi, vechiganza, vechijikuja, vechituka, vasikapurutani vabari, vasikabongi, vasikacheneswi,

³ vasina rudo kuhama, vasikaiyaniswi, vanoreva, vasikajibati, vanotyisa, vanoshora vakanaka,

⁴ vari vachengejeri, vanomutikizizi, vanojiringaringa, vanopinda kuda mutambo kuno kumuda Mwari;

⁵ vano chiyimo chokudira, asi vechiramba simba rakwo. Ubve kwavari.

⁶ Ngokuti vakadari ndivo vanodisisa kunghwina mu nyumba vechichakata vanakaji vari mapenji, vakaremehwa ngo zvishaishi, vechikweviwa ngo kuemura kwakaparajana.

⁷ Vanogara vechijija, vasikatongogumi mukuziva gwinyiso.

⁸ Kudari ndi Jani na Jambere vakarwisana na Mosi, ngokudaro avo navo vanorwisana no gwinyiso; vari vandhu vakashaishihwa mu mipinimijo, avana kuzwisisa mukugonda.

⁹ Asi avazopindi kuenda mberi; ngokuti upenji hwavo hunozova pambhene ku vandhu vese, kudari ngo hwaavozve hwakaita kudaro.

Kupanga kwo kupejisira

¹⁰ Asi iwewe wakatevera kujijisa kwangu, kufamba kwangu, kudisisa, kugonda, kugwinyisira, rudo no kusengerera,

¹¹ kuteverehwa no matambujiko; izvo zvakandigumira mu Antiyoki, no mu Ikoniyo, no mu Ristriya; kutambujika ukwo kwo ndakashingirira, kwozviri zvese Mambo wakandinunurira.

¹² Eya navo vese vanoda kufamba ngo kururama kuna Kristu Jesu vanozotambujika.

¹³ Asi vandhu vakashata no vanochengeja vanozovangirira kupinda kushata, vechichengeja no kuchengejehwa.

¹⁴ Asi iwewe gara mu izvo zvowakajija no kugwinyiswa ndizvo, wechiziva uwo wowakajijiswa ndiye.

¹⁵ Zve kubvira paudoko hwako, wakaziva Matahwa Akachena ano simba rokuyita kuti ungware kuruponeso kubudikija ngo kugonda kuri kuna Kristu Jesu.

¹⁶ Matahwa ese akafemehwa ndi Mwari, anobeserazve kujijisa, kurambija, no kutova, no kupangijira kuri mukururama.

¹⁷ Kuti mundhu wa Mwari aite wakaperera, anazvo zvese zvokuyita mishando yese yakanaka.