2 Tim. 1 - NOVO TESTAMENTO EM NDAU

Muchungamijo

¹ Pauri, mupostori wa Kristu Jesu ngokuda kwa Mwari, kudari ngo chigondiso chokupona chiri kuna Kristu Jesu,

² kuna Timoti, mwana wangu unodikana: Nyasha, no kukungurihwa, no kunyarara zvinobva kuna Mwari Baba na Kristu Jesu Mambo wedu ngazvive newe.

Kugondeka ku vhangeri

³ Ndinobonga Mwari, wo ndinoshandira kubvira kune majibaba angu ngo mwoyo usina ndava, kuti usiku no masikati ndinogara ndechikucherecheja mumikumbiro yangu,

⁴ ndechisuwira kukuvona, ndechicherecheja masoji ako, kuti ndizariswe ngo kudakara;

⁵ ndechicherechejiswa ngo kugonda kwo gwinyiso kuri mukati mwako; ukwo kwayiva pakutanga kuna mbiya wako Roisi; no kuna mayi wako Unike kwo ndinoziva kuti kuri kwourizve.

⁶ Ngo iyi ndava ndinokucherechejisa kuti umusijire chipuwo cha Mwari chiri mukati mwako ngo kudihwa kwo nyara jangu panyezuru pako.

⁷ Ngokuti Mwari aazivi kutipa mweya wo kutya, asi wo simba, no wo rudo, no wo kujibata.

⁸ Ndizvo usapsheruka kuyita chapupu cha Mambo wedu, nokuti ndini mubhanditi wake; asi gwinyira matambujiko ngo ndava yo vhangeri kudari ngo simba ra Mwari.

⁹ Uwo wakatiponesa, no kutidanija ngo kudanijwa kwakachena, kusikazivi kudari ngo mishando yedu, asi kudari ngo kuemesa kwake pachake no nyasha, jakapuwa kwetiri ndi Kristu Jesu nguva jisati javapo.

¹⁰ Asi zvino zvakapangijihwa ngo kuvoneka kwo Muponesi wedu Kristu Jesu, uwo wakanyisa kufa, wakazisa kupona no kusikavori mukujeka ngo vhangeri,

¹¹ rendakaemeswa kuyita muchumairi, no mupostori, no mujijisi kweriri;

¹² ngo iyi ndava ndinotambujwavo ngo izvi, asi andipsheruki ngokuti ndinomuziva wendakatenda, ndinogonda kuti uno simba rokungwarira chondakapa kwaari mbhera kuzuva iro.

¹³ Batisisa chivonero cho mazwi akagwinyisiswa owakazwa kwendiri mukugonda no murudo ruri kuna Kristu Jesu.

¹⁴ Icho chakanaka chakagondwa kwouri ngwarira ndiye Mweya Wakachena unogara mukati mwedu.

¹⁵ Unoziva ichi: Kuti vese vari mu Aziya vakandisiya; pakati pavo ndi Fugero na Herimogenese.

¹⁶ Mambo ngaakungurire kune vo mbhuri ya Onesiforo: Ngokuti wakandigwinyisa kazhinji, aazivi kupsheruka ngo ketani jangu;

¹⁷ asi apo wayiva mu Roma, wakandipshaka kakurutu, naye wakandiwana.

¹⁸ Mambo ngaaite kuti awane kukungurihwa kuna Mambo ngo iro zuva; newe unonasa kuziva kuwanda kwo izvo zvaakandishandira mu Efesu.