2 Pet. 2 - NOVO TESTAMENTO EM NDAU

Vajijisi vokunyepa

¹ Asi kwayivapo vaprofeti vokunyepa pakati po vandhu, kudari ngo zvo vanozovapo vajijisi vokunyepa pakati penyuzve, vanozonghwinisa ngo kufishika zvijijiso zvo kurashwa, vechiramba Mambo pachake wakavatenga, vechijizisira panyezuru pavo kurashwa kunokasira.

² No vazhinji vanozotevera njira javo jakashata; ngo ndava yavo njira yo gwinyiso inozoshohwa.

³ Mukuemura vanozomutengesa ngo mazwi okujiitisa; avo kutongwa kwavo kubvira karetu akunonoki, no kurashwa kwavo akuvati.

⁴ Ngokuti kudari Mwari asikazivi kukungurira ngirosi jakashaisha, asi wakajikandira murindi rakapindisisa kujika, kuti jingwaririhwe kutongwa muzvisungo zvo chidima.

⁵ Asikazivi kukungurira nyika yo kare, asi wakangwarira Noa, muchumairi wo kururama, pamwepo no vamweni vanomwe, apo azisa ndambi panyezuru po nyika yo vasikadiri Mwari;

⁶ naye echipinduja madhoropa o Sodhoma no Gomora kuyita marota wakaarasha ngo kuaparaja, akaaita chivonero kwavari vanozopona vasikadiri Mwari;

⁷ akanunurira Roti wakarurama, wakatambujika kakurutu ngo kupona mukuemura kwo vakashata,

⁸ (ngokuti mundhu uwo wakarurama echigara pakati pavo, mukuvona no kuzwa, wakatambujika mumweya wake wakarurama zuva ngo zuva, ngo zviito zvavo zvisikazivi kururama).

⁹ Mambo unoziva njira yo kununurira vanodira Mwari mukuejwa, no kungwarira vasikazivi kururama pasi po nyatwa mbhera rigume zuva ro kutongwa;

¹⁰ asi kakurutu avo vanofamba ngo zvo nyama mukuemura kunosvipisa, vechishora kutongwa. Vari vano mutizinini, vanoyita kuda kwavo, avatyi kutuka vakuru.

¹¹ Apo ngirosi pikija jinopinda ngo ukuru no simba, ajiviisi kutonga kwo kuvatuka pamberi pa Mambo.

¹² Asi ava, vechituka ngo ndava jo vasikazivi, vakadari ngo zvinyama zvisina mipinimijo, vanopera mukuvora kwavo.

¹³ Vanozoashira musharo wo kuyita zvakashata; avo vanokuita kudakara masikati, vari mavara no mavonje, vechidakara ngo kuchengeja kwavo apo vechiha nemwi.

¹⁴ Vano majiso akazara ngo kuomba, vasikakoni kuregera kushaisha, vechionga mweya isikazivi kugwinya, vano mwoyo wakarovejera mukuemura, vari vana vokutukwa;

¹⁵ vechisiya njira yakanaka, vakapauka, vechitevera njira ya Bharami mwana wa Bheori, uwo wakada musharo wo kuyita zvakashata;

¹⁶ asi wakatakwa ngo ndava yo kupauka kwake, mbongoro iri mbeveve yakavereketa ngo izwi ro mundhu, ikarambija kupenga kwo muprofeti.

¹⁷ Ava vari zvinyuka zvisina kumwa, no mbhute inotindhwa ngo muvumo, avo vanongwaririhwa kusvipa kwo chidima.

¹⁸ Ngokuti vechivereketa mazwi makuru okujikuja asina shwiro, vanonyengerera mukuemura kwo nyama, ngo kuvereketa kwavo vatopokonyoka kwavari vanogara mukupauka.

¹⁹ Vechivagondisa kusununguka apo avo pachavo vari varanda vo kuvora; ngokuti uwo waanonyiswa ndiye mundhu, ndiezve waanozoziswa ndiye muuhloko.

²⁰ Ngokuti apo vapokonyoka kubva kuizvo zvinosvipisa zvo nyika ngo kuziva ndi Mambo no Muponesi Jesu Kristu, vechikopfamiswazve kwo zviri no kunyiswa, chiemo chavo cho kugumisira chinoyita chakapinda kushata kuno chokutanga.

²¹ Ngokuti kwayinga kwakapinda kunaka kwavari kuti vasaziva njira yo kururama, kuno kupetuka sure kubva kumupango wakachena uwo wakapuwa kwavari.

²² Kwakaitika kwavari kudari mazwi akangwara ano gwinyiso: “Imbhwa yahwirirazve kumarucho ayo, no nguruve yakasukwa yakahwirirazve kooburukuta mumatope.”