2 Pet. 1 - NOVO TESTAMENTO EM NDAU

Muchungamijo

¹ Simoni Pedru, muranda no mupostori wa Jesu Kristu, kwavari vakakovehwa kugonda kuno mutengo mukuru pamwepo nesu, kwakadari ngo kwedu mukururama kwa Mwari wedu no Muponesi Jesu Kristu.

² Nyasha kwomuri no kunyarara ngazviwanjwe mukumuziva Mwari na Jesu Mambo wedu.

Kudanijwa no kusananguhwa kwedu

³ Kudari ngo zvaakapa kwetiri ngo simba rake ro uMwari, zviro zvese zvinosisira mukupona uku, no zvo kudira ndizvo uMwari, ngo kuziva kwo uwo wakatidanija ngo uthende hwake no kunaka,

⁴ ngo izvo wakatipa zvigondiso zvake zvakakura no zvino mutengo mukuru; kuti ngo izvi mungayita vanosisira chiemo cho uMwari, mwapokonyoka kubva mukuvora kwo kuemura kuri mu nyika.

⁵ Eya, ngo iyi ndava, imwimwi ngo kwenyu engejeranyi kutsamwirira kwese, mukutenda kwenyu engejeranyi kunaka, mukunaka engejeranyi kuziva.

⁶ Mukuziva engejeranyi kujibata, mukujibata engejeranyi kusengerera no mukusengerera engejeranyi kudira Mwari,

⁷ no mukudira Mwari engejeranyi kuda hama, no mukuda hama engejeranyi rudo.

⁸ Ngokuti kudari izvi zviri zvenyu, zvechiwanjwa, zvinoita kuti musayita nungo, nokuti muite vasina michero mukuziva Mambo wedu Jesu Kristu.

⁹ Ngokuti iye unotama izvi uri bofu, uri wakabvubvumara, wakakanganwa kusukwa kwo zvishaishi zvake zvo kare.

¹⁰ Ndizvo hama, tsamwiriranyi zvikuru kuyita kuti kudanijwa kwenyu no kutsananguhwa kwenyu zvigwinyiswe, ngokuti kudari mwechiita izvi amutongozokhugunyi.

¹¹ Ngokuti ngokuita kudaro, kunozopuwa kwomuri kukurutu kunghwina mu umambo usikaperi hwa Mambo wedu no Muponesi Jesu Kristu.

¹² Ndizvo ndinozogara ndechimucherechejisa ngo izvi, pikija mwechizviziva, nokuti mwakajimikwa mu gwinyiso iro romunaro.

¹³ Neni ndinopinimija kuti zvakanaka, ngo nguva jese jo ndiri mutende iri, kumumusa ngo kumucherechejisa;

¹⁴ ndechiziva kuti kubviswa kwo tende rangu kunokasira kuviya, kudari ngo zvaakavonisa kwendiri Mambo wedu Jesu Kristu.

¹⁵ Eya ndinozotsamwirira, kuti nguva jese ngo sure kwo kufa kwangu mungazokona kucherecheja izvi.

Kugondeka kwo zvijijiso zva mupostori

¹⁶ Ngokuti atizivi kutevera ngano jakaizwa ngo urimbwi, apo takazivisa kwomuri simba no kuviya kwa Mambo Jesu Kristu, asi tayiva zvapupu zvo majiso zvo ukuru hwake.

¹⁷ Ngokuti wakaashira kureremejwa no uthende zvakabva kuna Mwari Baba, apo izwi rakadaro rakaviya kwaari rechibva ku uthende hwakanakisisa, rechiti: “Uwu uri Mwana wangu unodikana, wendinonasa kudakara ndiye:”

¹⁸ Nesu pachedu takarizwa izwi rechibva mugore, apo tinaye pa dundhu rakachena.

¹⁹ Nesu tino izwi rakaprofetwa rakapinda kugwinya; kweriri munonasa kuripurutana iro riri ruvhenu runojeka mundau ino chidima, mbhera zuva rieje, no ndhondo masase ibude mumwoyo yenyu,

²⁰ mwechiziva ichi: Kutanga, kuti akuna kuprofeta mumatahwa kunodurujihwa ngo mundhu.

²¹ Ngokuti akuna kuprofeta kwakambovapo ngokuda kwo mundhu, asi vandhu vakavereketa zvinobva kuna Mwari, vechindondundwa ndi Mweya Wakachena.