1 VaTes. 5 - NOVO TESTAMENTO EM NDAU

¹ Asi ngo ndava yo mikuvo no nguva, hama, akusisiri kuti mutarihwe ndizvo.

² Ngokuti imwimwi mwambhwine munonasa kuziva kuti zuva ra Mambo rinoguma kudari ngo mbavha inoguma usiku.

³ Apo vanozoti, kuripo kunyarara no kungwaririka, ngo iyo nguva kuparajwa kunozokasira kunozovagumira, kudari ngo kuhwajiwa kunogumira mujimayi wosununguka; apana unozopokonyoka.

⁴ Asi imwimwi, hama, amuri mu chidima akadi, kuti iro zuva rimugumire kudari ngo mbavha.

⁵ Ngokuti imwimwi mwese muri vana vo kujeka, no vo masikati; atiri vo usiku akadi, nokuti vo chidima.

⁶ Ndizvo tisavata, kudari ngo zvovanoita vamweni asi ngatirinde, tingware.

⁷ Ngokuti avo vanovata, vanovata usiku naavo vanoraja, vanoraja usiku.

⁸ Asi isisu tiri vo masikati ngatingware, techisimira chihlangu cho paditi cho kugonda, no rudo; nokuyita chigqoko, gonda ro ruponeso.

⁹ Ngokuti Mwari aazivi kutiemesera ushungu, asi kuti tiwane kuponeswa ndiye Mambo wedu Jesu Kristu.

¹⁰ Uwo wakafa ngo ndava yedu kuti pikija tichazwa nokuti tavata tinozopona pamwepo naye.

¹¹ Ndizvo embezerananyi, muvakane, kudarizve ngo zvomunoita.

Zvikonokejo zvo kupejisira no muchungamijo

¹² Asi tinomukumbira, hama, kuti muvareremeje avo vanoshanda pakati penyu, vari panyezuru penyu kuna Mambo, vanomupanga;

¹³ no kuvareremeja kakurutu murudo ngo ndava yo mushando wavo. Itanyi vanoiyana pakati penyu.

¹⁴ Tinomupota hama, panganyi avo vano nungo, tsungisanyi avo vano mwoyo inodemera, gwinyisanyi avo vakarembejeka, sengereranyi kuna vese.

¹⁵ Ngwariranyi kuti asazovapo unohwirijira zvakashata ku mundhu ngo ndava yo zvakashata; asi ngo nguva jese tevereranyi izvo zvakanaka, umwe kwo umweni, no kuna vese.

¹⁶ Dakaranyi ngo nguva jese.

¹⁷ Kumbiranyi musikaregi.

¹⁸ Ngo zviro zvese bonganyi; ngokuti ichi chiri kuda kwa Mwari kuna Kristu Jesu ndimwi,

¹⁹ musajima Mweya.

²⁰ Musashoora zvakaprofetwa.

²¹ Ejanyi zviro zvese; batisisanyi izvo zvakanaka.

²² Taraukiranyi miyemo yo zvese zvakashata.

²³ Na Mwari wo kunyarara wambwine ngaamuchenese aembho; no mweya yenyu no mwoyo no muviri ngazvingwarihwe aembho, zvisina ndava, ngo kuviya kwa Mambo wedu Jesu Kristu.

²⁴ Unogondeka uwo unomudanija, unozozviitazve.

²⁵ Hama, tikumbirirenyi.

²⁶ Chingamijanyi vese vatendi ngo muromo ngo kucheneswa.

²⁷ Ndinomupikisa ndi Mambo kuti iyi tshamba ijijwe ku vatendi vese.

²⁸ Nyasha ja Mambo wedu Jesu Kristu ngajive nemwi.