1 VaTes. 4 - NOVO TESTAMENTO EM NDAU

Maponero anodakaja Mwari

¹ Ndizvo pakugumisira, hama, tinomukumbira no kumupota ndiye Mambo Jesu kuti kudari ngo zvomwakaashira kwetiri njira inosisira yo kufamba ndiyo no kumudakaja Mwari, kudari ngo zvomunofamba, kuti muwanjise kudaro.

² Ngokuti munoziva kupanga kwotakamupanga ndiye Mambo Jesu.

³ Ngokuti uku kuri kuda kwa Mwari, kucheneswa kwenyu, kuti muregere kuomba;

⁴ kuti mundhu wese kwomuri azive kujibatira ndiro yake mukucheneswa no mukureremejeka,

⁵ andikwopi mukuemura kwo kushata, kudari ngo vomajinja vasikamuzivi Mwari;

⁶ kuti mundhu asazopauka no kushaishira hama yake ngo iyi ndava; ngokuti Mambo uri muhwirijiri wo izvi zvese, kudari ngo zvotakamupanga ngo pamberi no kupupura kudaro.

⁷ Ngokuti Mwari aazivi kutidanijira kune zvisikazivi kusukika, asi kune zvakacheneswa.

⁸ Ndizvo iye unoramba, aarambi mundhu akadi, asi unoramba Mwari, uwo unopa kwetiri Mweya wake Wakachena.

⁹ Asi ngo ndava yo kuva no rudo kuhama akusisiri kuti mundhu amutarire; ngokuti imwimwi mwambhwine mwakajijiswa ndi Mwari kuti mudane;

¹⁰ ngokuti ngo gwinyiso munoita kudaro kune hama jese jiri mu Makedhoniya. Asi tinomupanga, hama kuti muwanjwe no kuwanjisisa;

¹¹ zve, kuti mueje kuva no chidisiso cho kunyarara, no kubatika ngo mishando yenyu yega, no kushanda ngo nyara jenyu kudari ngo zvotakamupanga;

¹² kuti mufambe ngo njira inosisira kwavari vari kunja, musina chomunotama.

Kuviya kwa Mambo

¹³ Asi atidi kuti muite vasikazivi, hama, ngo ndava yo avo vakavata; kuti musazosururika kudari ngo vamweni vasina kugonda.

¹⁴ Ngokuti kudari techitenda kuti Jesu wakafa no kumukazve, ngokudaro avo vakavata kuna Jesu, Mwari unozovaviisa pamwepo naye.

¹⁵ Ngokuti tinonanga ichi kwomuri ngo izwi ra Mambo, kuti isisu tichazwa, tasara mbhera kuviya kwa Mambo, atitongozotangiri avo vakavata.

¹⁶ Ngokuti Mambo ambhwine unozobzuka kubva mu gore, ngo kudanijira na ngo izwi ro ngirosi huru, na ngo kurijwa kwo mbhayapaya ya Mwari; no vakafa vari kuna Kristu vanozotanga kumuka;

¹⁷ naapo isisu tichazwa tasara, tinozotorwa pamwepo navo mu makore, koosongana na Mambo mu mweya; ngokudaro tinozogara na Mambo mbhera narini.

¹⁸ Ndizvo embezerananyi ngo mazwi aya.