1 VaTes. 3 - NOVO TESTAMENTO EM NDAU

¹ Ndizvo apo takakorera kushingirira, takapinimija kuti kwakanaka kuti tisiiwe sure tiri tega mu Atena;

² takatuma Timoti, munukuna wedu no mushandi wa Mwari muvhangeri ra Kristu, kuti amugwinyise, no kumuembezera mukutenda kwenyu;

³ kwokuti asazovapo mundhu unozungunyiswa ngo kutambujika uku; ngokuti imwimwi pachenyu munoziva kuti takaemesehwa izvozvo.

⁴ Ngokuti ngo gwinyiso, apo tichinemwi, takamubvunja pakutanga kuti tinozotambujika; kudari ngo zvakaitika, nemwi munozviziva.

⁵ Ngo iyi ndava ininivo apo ndakakorera kushingirira, ndakatumira kuti ndizive kutenda kwenyu, kuti pamweni mueji inga wamueja, no mushando wedu ungaita usina shwiro.

⁶ Asi apo Timoti apetuka zvino kwetiri kubva kwomuri, akativiisira masoko anodakaja okutenda kwenyu no rudo rwenyu, nokuti unonasa kuticherecheja ngo nguva jese, mwechisuwira kutivona, kudari tisuvo tasuwira kumuvona;

⁷ ngo iyi ndava, hama, takaembezehwa ndimwi mukutama kwedu kwese, no kutambujika ngo ndava yo kutenda kwenyu.

⁸ Ngokuti zvino tinopona kudari imwimwi mwechiyima mwakagwinya kuna Mambo.

⁹ Ngokuti tingaita mabongerenyi kuna Mwari ndimwi, ngo ndava yo kudakara kwese kwetinodakara ndikwo ngo ndava yenyu pamberi pa Mwari wedu,

¹⁰ techikumbira kakurutu usiku no masikati kuti tivone hope jenyu, no kuzajisa ichi chinosisira mukutenda kwenyu?

¹¹ Zvino Mwari wedu Baba wambwine, na Mambo wedu Jesu ngaatitatije njira yedu kwomuri.

¹² Na Mambo ngaaite kuti muwande no kuwanjiswa murudo umwe kuno umweni, nokune vandhu vese, kudari zvotinoitavo isisu kwomuri.

¹³ Kuti iye agwinyise mwoyo yenyu isina ndava mukucheneswa pamberi pa Mwari wedu Baba, ngo nguva yo kuviya kwa Mambo wedu Jesu pamwepo no vakacheneswa vake vese.