1 VaTes. 2 - NOVO TESTAMENTO EM NDAU

Mushando wa Pauri mu Tesaronika

¹ Ngokuti imwimwi pachenyu hama, munoziva ngo ndava yo kuviya kwedu kwomuri, kuti akuzivi kuvoneka kuri kusina shwiro;

² asi pikija takatambujika pakutanga, no kuitihwa zvinopsheruja, kudari ngo zvomunoziva, tiri mu Firipi, takashinga kuna Mwari wedu kuvereketa kwomuri vhangeri ra Mwari ngo kutambujika kukurutu.

³ Ngokuti kupota kwedu akuri kwo kupaukisa akadi, nokuti kwo kusikasukika nokuti kwo kuchengeja;

⁴ asi kudari ngo zvotakatendehwa ndi Mwari kuti tigondwe ngo vhangeri, ngokudaro tinovereketa andikwopi kudakajisa vandhu, asi Mwari uwo unoeja mwoyo yedu.

⁵ Ngokuti atizivi kuvoneka pikija ngouri mukuvo techinanga mazwi ourimbwi, kudari ngo zvomunoziva, nokuti zano ro kuemura pfuma, Mwari uri chapupu chedu;

⁶ tisikapshaki kuirikijwa ngo vandhu, pikija kunobva kwomuri, nokuti kunobva kuvamweni, apo taikona kuyita mutwaro kwomuri, tiri vapostori va Kristu.

⁷ Asi taiva takapfava pakati penyu, kudari ngo zvaanoita mureri apo echirera vana vake.

⁸ Ngokudaro, techimudisisa, taida kukovera kwomuri haiwa vhangeri ra Mwari rega, asi no kupona kwedu kwambwine, ngokuti imwimwi mwaidikana kakurutu kwetiri.

⁹ Ngokuti munocherecheja hama, kushanda kwedu no kuhwajihwa, techishanda usiku no masikati kuti tisazoita mutwaro kuno umwe wenyu, takachumaira kwomuri vhangeri ra Mwari.

¹⁰ Imwimwi na Mwari muri zvapupu, ngo kucheneswa no kurungama, no kusikana ndava kwakaitawani kwetakaita kwomuri, imwimwi munotenda.

¹¹ Kudari ngo zvomunoziva njira yotakaita kuno umwe ngaumwe wenyu, kudari ndi baba vanoyita kuno vana vavo, techimupanga, no kumushingisa, no kupupura,

¹² kuti mufambe kudari ngo zvinosisira kuna Mwari, uwo wakamudanija kuumambo hwake hwambwine no uthende.

¹³ Ngo iyi ndava tinobonga Mwari tisikaregeri, kuti, apo mwaashira kwetiri, iri shoko ra Mwari, mwakariaashira kunonga risiri izwi ro vandhu, asi, kudari ngo zvoriri gwinyiso, izwi ra Mwari, rinoshandazve mukati mwenyu, imwimwi munotenda.

¹⁴ Ngokuti imwimwi, hama, mwakaita vaejereri vo zviara zva Mwari zvo mu Judhiya zviri kuna Kristu Jesu; ngokuti mwakatambujwavo ngo zviro zvakatojana ngo vandhu vo nyika yenyu, kudari ngo zvovakatambujwa avo ngo vajudha;

¹⁵ avo vakayita zvese, kuuraya Mambo Jesu no vaprofeti, no kutimbirimbija, vasikadakajisi Mwari, vari vanopshapshana no vandhu vese;

¹⁶ vechitirambija kuvereketa kune vomajinja kuti vangaponeswa; kuti vazarise mupimo wo kushaisha kwavo ngo nguva jese. Asi ushungu hunonyanyisisa hwakavagumira.

Pauri unoda kuhwirira Tesaronika

¹⁷ Asi isisu, hama, techiparajaniswa nemwi kwenguva doko, mukuvonana kwo muviri, haiwa kwo mwoyo, takatsamwirira kuvona hope yenyu ngo kumusuwira kakurutu.

¹⁸ Ngokuti taida kuviya kwomuri, inini Pauri kamwe no kwochipiri; na Sathani wakatiphingaija,

¹⁹ ngokuti chinyi chiri gonda redu, nokuti kudakara kwedu, nokuti junguja ro kuganza? Andimwipi here, pamberi pa Mambo wedu Jesu ngo kuviya kwake?

²⁰ Ngokuti imwimwi muri uthende hwedu no kudakara kwedu.