1 VaTes. 1 - NOVO TESTAMENTO EM NDAU

Muchungamijo

¹ Pauri, na Sirivhana, na Timoti, ku chiara cho vaTesaronika chiri kuna Mwari Baba no kuna Mambo Jesu Kristu. Nyasha no kunyarara ngazvive nemwi.

Kupona kwo kugonda kwo vaTesaronika

² Tinobonga kuna Mwari ngo nguva jese ndimwi mwese, techimucherecheja mumikumbiro yedu,

³ tinogara techicherecheja mushando wenyu wo kugonda, no mukushanda kwenyu murudo, no kusengerera kwo kugonda kuna Mambo wedu Jesu Kristu, pamberi pa Mwari Baba wedu.

⁴ Techiziva, hama, munodiwa ndi Mwari kutshanangura kwenyu,

⁵ ngokuti vhangeri redu arizivi kuviya kwomuri ngo izwi rega, asi ngo simbavo, no mu Mweya Wakachena, na ngo kugwinyiswa kukurutu; kudari ngo zvomunoziva kuti tainga tiri vandhu vakadini pakati penyu.

⁶ Nemwi mwakaita vaejereri vedu, no va Mambozve, mwechiashira izwi mukutambujika kukurutu, ngo kudakara kwo Mweya Wakachena;

⁷ ngokudaro mwakaita chivonero kwavari vese vanotenda vari mu Makedhoniya no mu Akaya.

⁸ Ngokuti kubvira kwomuri izwi ra Mambo rakaparajika, haiwa mu Makedhoniya no mu Akaya mwega, asi kundau jese kugonda kwenyu kuna Mwari kwakazwika; kwokuti akusisiri kuti isisu tiverekete chiro.

⁹ Ngokuti avo pachavo vanozivisa ndisu ngo kuaashihwa kwo takaita kwomuri; na ngo njira yo mwakatenderuka ndiyo kuna Mwari kubva kumiezaniso yo kudira, kushandira Mwari unopona, uno gwinyiso,

¹⁰ no kugarira Mwana wake echibva mu gore, waakamusa kwo vakafa, ndi Jesu uwo unotinunura muushungu hunoviya.