1 VaK. 9 - NOVO TESTAMENTO EM NDAU

Zvitendehwa no fanero ro mupostori

¹ Andiripi wakasununguka here? Andiripi mupostori here? Andizivi kumuvona Jesu Mambo wedu here? Imwimwi amuri mushando wangu kuna Mambo here?

² Kudari ndisiri mupostori kuvamweni, kani kwomuri ndiriye; ngokuti imwimwi muri chinamiro cho upostori hwangu kuna Mambo.

³ Uku ndikwo kujirwira kwangu kwavari vanonditonga:

⁴ Anditendehwi here kuti ndihe no kumwa?

⁵ Anditendehwi here kufamba muhwendo hwedu tino mukaji uri mutendi, kudarivo ngo vamweni vo vapostori, no hama ja Mambo, na Khefasi?

⁶ Nokuti inini ndega na Bharnabha, atitendehwi here kurega kushanda?

⁷ Ndiyani ari musocha unoshanda mushando wo usocha ngo mare yake? Ndiyani unosima munda wo mivhini, asikahi michero yawo? Ndiyani unohusha muhlambi, asikahi mukaka wawo?

⁸ Ndinovereketa izvi here ngo chirovejeso cho vandhu, nokuti Mipango ainangivo kudaro here?

⁹ Ngokuti kwakatahwa mumipango ya Mosi, kuti: “Usazofungira muromo wo n'ombe apo inopura mbeu,” in'ombe here, yaanopinimija ndiyo Mwari?

¹⁰ Nokuti aavereketi ngo ndava yedu tega here? Eya, chakatahwa ngo ndava yedu: Ngokuti uwo unorima, kunodikana kuti arime anokugonda, no uwo unopura, kudikana kuti apure anogonda ro kuashira.

¹¹ Kudari isisu takakusha kwomuri zviro zvo Mweya, indava huru here kudari techizokotora zviro zvenyu zvo nyika?

¹² Kudari vamweni vano uku kutendehwa panyezuru penyu, kunozopinda kwakaitawani kwetiri isisu? Kani atizivi kushandisa uku kutendehwa; asi tinosengerera zviro zvese kuti tisazophinga vhangeri ra Kristu.

¹³ Amuzivi here kuti avo vanoshanda kuno zvakacheneswa, vanoha kwezviro zvo mu themperi? Naavo vanoshandira maaltari, vane zvikovaniswa zvavo zvo altari?

¹⁴ Ngokudaro Mambo wakapanga kuti avo vanochumaira vhangeri, vapone ngo zvo vhangeri.

¹⁵ Asi inini andizivi kushandira chimwe cho izvi zviro; neni anditari izvi kuti zviitwe kudaro kwendiri: Ngokuti kurinane kuti ndife, kuno kuti mundhu ayite kuti kuganza kwangu kuitwe kusina shwiro!

¹⁶ Ngokuti kudari ndechichumaira vhangeri, andina chiro cho kuganza ndicho; ngokuti ndamanikijwa; ngokuti ikhombo kwendiri kudari ndisikachumairi vhangeri.

¹⁷ Ngokuti kudari ndechiyita ichi ngo kuda kwangu, ndinovona musharo; asi kudari ndechichiita ngo kusiri kuda kwangu, ndino ungwariri hunogondwa kwendiri.

¹⁸ Ndizvo musharo wangu ngowenyi? Kuti, apo ndechichumaira vhangeri, ndiite kuti vhangeri riite risina mutengo. Kuti ndisashandisa kwese kutendehwa kwangu kwo vhangeri.

¹⁹ Ngokuti pikija ndayiva ndiri wakasununguka kuno vandhu vese, ndakajidira pasi mukusungwa kwavari vese, kuti ndiviyihwe ngo vakapinda kuwanda.

²⁰ No kuna vaJudha, ndakaita kudari ngo mujudha, kuti ndiviyihwe ngo vaJudha; kwavari vari pasi po mipango, ndakaita kudari ngouri pasi po mipango, ndisiri pasi po mipango pachangu, kuti ndiviyihwe ngaavo vari pasi po mipango.

²¹ Kwavari vasina mipango ndakaita kudari ndivo vasina mipango, ndisiri usina mipango kuna Mwari, asi pasi po mipango kuna Kristu, kuti ndiviyihwe ngaavo vasina mipango.

²² Kwavari vakarembejeka, ndakaita unorembejeka, kuti ndiviyihwe ngaavo vakarembejeka: Ndakaita zviro zvese ku vandhu vese, kuti ngo njira jese ndiponese vamweni.

²³ Neni ndinoita izvo zvese ngo ndava yo vhangeri, kuti ndiwanevo chikovaniswa changu kweriri.

²⁴ Amuzivi here kuti avo vanogogomera mujaho, vanogogoma vese, asi ndiumwe unoashira muthuso? Ngokudaro gogomanyi imwimwi kuti muashire.

²⁵ No mundhu wese unoyita gikiti mumitambo, unojibata ngo njira jese. Zvino avo vanoyita kudaro kuti vaashire junguja rinovora: Asi isisu tinoashira risikavori.

²⁶ Ndizvo inini ndinogogoma haiwa ngo kusikazivi kwakadaro: Ndinoambana, haiwa kudari ngo unorova dutu:

²⁷ Asi ndinorova muviri wangu, ndechiudira muuranda: Kuti kusazoitika nokuti ngeiri njira, apo ngosure ndachumaira kuno vamweni, inini pachangu ndiite unorashwa.