1 VaK. 8 - NOVO TESTAMENTO EM NDAU

Zvokuha zvakapihwa kumuezaniso

¹ Zvino ngo ndava yo zviro zvinobaihwa miezaniso yo kudira; tinoziva kuti tese tinakwo kuziva. Kuziva kunopara kujikuja, asi rudo runovaka.

² Kudari mundhu nokuti ngouri echipinimija kuti unoziva chiro, iye asati aziva kudari ngo zvinodikana kuti azive.

³ Asi kudari aripo mundhu unoda Mwari, uwo unozivikana ndiye.

⁴ Ndizvo ngo ndava yo kuha izvo zvinobaihwa miezaniso, tinoziva kuti akuna muezaniso mu nyika uno shwiro. Nokuti akuna Mwari umweni, kwega umwe.

⁵ Pikija zvinyaripo zvinodanijwa kuti zvimwari, pikija mu denga, nokuti mu nyika; kudari ngo zvezviripo zvimwari zvizhinji, no majimambo mazhinji.

⁶ Asi kwetiri uripo Mwari umwe, ndi Baba, ndiye zviro zvese zviripo, nesu tiripo kwaari; na Mambo umwe ndi Jesu Kristu, ngo ndava yake zviro zvese zviripo, nesu kubudikija ndiye tiripo.

⁷ Asi uku kuziva akuri ku vandhu vese akadi, asi vamweni vechirovejera mbhera zvino kuno miezaniso wo kudira, vanoha kunonga chiri chiro chinobaihwa kuno muezaniso wo kudira; no mipinimijo yavo isina simba inosvipiswa.

⁸ Asi kuha akuzoiti kuti titendwe ndi Mwari; pikija techiregera kuha, atiiti vakapinda kushata, pikija techiha, atiiti vakapinda kunaka.

⁹ Asi ngwarai kuti pikija ngeiri njira, uku kusununguka kwenyu kusaita chikhugunyiso kwavari vasina simba.

¹⁰ Ngokuti kudari mundhu echizokuvona iwewe unokuziva, wechigara pano kuha mu themperi ro muezaniso wo kudira, auzoshingiswi here mupinimijo wake, usina simba, kuha zviro zvakabaihwa miezaniso yo kudira?

¹¹ Ngokuti ngo kuziva kwako iye usina simba unofa, hama iyo yaakafira Kristu ngo ndava yake.

¹² Ngokudaro apo po unoshaishira hama, no kuremaja mipinimijo yavo apo isina simba, unoshaishira Kristu.

¹³ Ndizvo kudari chokuha chechiita kuti hama yangu ikhugunyiswe, andizohi nyama mbhera narini, kuti ndisazoita kuti hama yangu ikhugunyiswe.