1 VaK. 7 - NOVO TESTAMENTO EM NDAU

Kupona kwo vakachadha

¹ Asi ngo ndava yo izvo zvo mwakatara ndizvo kwendiri: Chiri chakanaka kuno mundhu kuti asapshasa mwanakaji.

² Asi, ngo ndava yo kuomba, mundhu wese ngaave no mukaji wake, no mwanakaji wese ngaave no mwamuna wake.

³ Mwamuna ngaape kumukaji izvo zvinomusisira: Ngokudaro mukaji ngaape kuno mwamuna.

⁴ Mukaji aana simba ro kutonga panyezuru po muviri wake, asi mwamuna. Ngokudarozve mwamuna aana simba ro kutonga panyezuru po muviri wake, asi mukaji.

⁵ Musanyimana, kwega kuri ngo kutenderana kwo nguva, kuti mujipire mukukumbira, mworomwozo kumbatirana, kuti Sathani asamueja ngo ndava yo kutama simba ro kujibata.

⁶ Asi ndinonanga izvi ngo kumutendera, haiwa ngo kumupanga.

⁷ Asi ndingada kuti vanarume vese vadari ndini. Asi mundhu wese uno chipuwo chake chakaparajana chinobva kuna Mwari, umwe cho mbewu iyi no umweni cho mbewu iyo.

⁸ Asi ndinoti kwavari vasikazivi kurovora, nokuno vari shirikaji, zvakanaka kwavari kudari vechigara kudari ndini.

⁹ Asi kuti vasina simba ro kujibata, ngavarovore, ngokuti kwakapinda kunaka kurovora kuno kupsha ngo kuemura.

¹⁰ Asi kwavari vakarovora, ndinovapanga, asi andinipi, asi ndi Mambo, kuti: Mukaji asaparajana no mwamuna wake.

¹¹ (Asi kudari iye echiparajana naye, ngaagare asikazivi kuchadha, nokuti ngaaiyaniswe no mwamuna wake); zve, kuti mwamuna asazoramba mukaji wake.

¹² Asi kuvamweni ndinonanga inini, haiwa Mambo akadi: Kudari aripo mutendi, uno mukaji usikatendi, no mukaji uwo echitenda kugara naye, asazomuramba.

¹³ No mukaji uno mwamuna usikatendi, no mwamuna echitenda kugara naye, asazomuramba.

¹⁴ Ngokuti mwamuna usikatendi unocheneswa ngo mukaji, no mukaji usikatendi unocheneswa ngo mwamuna. Kudari zvisikazivi kudaro, vana venyu inga vasikazivi kucheneswa, asi zvino vari vakacheneswa.

¹⁵ Asi kudari usikatendi echienda, ngaaende: Mutendi anyari wo mwamuna nokuti wo mukaji aazivi kusungwa mundava jakadaro; asi Mwari wakatidanija mukunyarara.

¹⁶ Ngokuti unoziva ngenyi, iwewe mukaji, kuti unozoponesa mwamuna wako? Nokuti unoziva ngenyi, iwewe mwamuna, kuti unozoponesa mukaji wako?

Kusununguka kunoviya ndi Kristu

¹⁷ Kwega kudari ngo zvaakakovanisira Mambo kuno mundhu wese, kudari ngo zvaakadanija Mwari umwe ngaumwe, ngaafambe kudaro. Ndizvo ndinopanga kuzviara zvese.

¹⁸ Uripo here mundhu wakadanijwa akachekwa? Asazoita usikazivi kuchekwa? Uripo here wakadanijwa asikazivi kuchekwa? Asachekwa.

¹⁹ Kuchekwa kuri kusina shwiro, no kusikachekwi kuri kusina shwiro, kwega kungwarira Mipango ya Mwari.

²⁰ Mundhu wese ngaagare mukudanijwa kwaakadanijwa ndikwo.

²¹ Wakadanijwa here uri hloko? Usakanuka ndizvo. Asi kudari ungasununguka, tsanangura icho.

²² Ngokuti uwo wakadanijwa kuna Mambo, ari hloko uri wakasununguhwa wa Mambo; ngokudaro uwo wakadanijwa ari wakasununguka, uri hloko ya Kristu.

²³ Imwimwi mwakatengwa ngo mutengo mukuru; musayita hloko jo vandhu.

²⁴ Hama, mundhu wese mukudanijwa kwaakadanijwa ndikwo, ngaagare na Mwari aripo.

Kuchadha nokuti kuregera kuchadha

²⁵ Zvino ngo ndava yo mbhandwe, andina mupango wa Mambo. Asi ndinonanga kutonga kwangu, kudari ngo uwo wakaitihwa nyasha ndi Mambo kuyita unogondeka.

²⁶ Ndizvo ndinopinimija kuti ichi chiri chakanaka ngo ndava yo kutambujika kuripo, kuti, kwakanaka kuno mwamuna kuti agare wakadaro.

²⁷ Wakasungwa here kuno mukaji? Usapshaka kusununguka. Wakasununguhwa here kubva kumukaji? Usapshaka mukaji.

²⁸ Asi kudari warovora auzivi kushaisha; nokudari mbhandwe yarovohwa, aizivi kushaisha. Asi vakadaro vanozova no kutambujika mu muviri, asi inini ndinomupungurira.

²⁹ Asi ndinonanga ichi, hama, nguva iri doko, kuti kubvira zvino, vese avo vane vakaji vayite kudari ngo vasina;

³⁰ naavo vanochema, kuti vayite kudari ngo vasikachemi; naavo vanodakara, vayite kudari ngo vasikadakari; naavo vanotenga, vayite kudari ngo vasikazivi kuganya.

³¹ Navo vanoshandisa zvo mu nyika, vayite vasikanyanyi kuzvishandisa, ngokuti muemo wo nyika ino unopinda.

³² Asi ndingada kuti imwimwi muyite vasina zvo kudembatemba. Iye usikazivi kurovora unobatika ngo zviro zva Mambo, ngo njira yaangamudakajisa ndiyo Mambo.

³³ Asi uwo wakarovora, unobatika ngo zviro zvo mu nyika, ngo njira yaangamudakajisa ndiyo mukaji wake.

³⁴ Kuripozve kuparajana pakati po uwo warovohwa no mbhandwe. Uwo usikazivi kurovohwa, unobatika ngo zviro zva Mambo, kuti ayite wakacheneswa zvese muviri no mweya asi uwo wakarovohwa unobatika ngo zviro zvo nyika ngo njira yaangadakajisa ndiyo mwamuna wake.

³⁵ No izvi ndinonanga kwomuri kuti mubesehwe; haiwa, kuti nditeye murau panyezuru penyu, asi kuti zviitwe zvinosisira, kuti mubatirire kuna Mambo musikakangaijwi.

³⁶ Asi kudari aripo mundhu unopinimija kuti unoyita zvisikasisiri kuno mbhandwe yake, yabva mundanga, nokudari kwechisisira kudaro, ngaayite chaanoda; aashaishi; ngavarovoraniswe.

³⁷ Asi iye unoyima akagwinya mu mwoyo mwake, asina chinomuvangirija, asi uno simba panyezuru pokuda kwake, naye wakajiemesera mu mwoyo mwake kuti unozongwarira mbhandwe yake, unoyita zvakanaka.

³⁸ Ndizvo uwo unopira mbhandwe yake kuti irovohwe unoyita zvakanaka; no uwo usikaipi kuti irovohwe, unoyita zvakapinda kunaka.

³⁹ Mukaji unosungwa ngo mipango nguva yese yaanopona mwamuna wake, asi kuti afa, wasununguka kuti arovohwe ngo waanoda; kwega ngo njira ya Mambo.

⁴⁰ Asi unopinda kudakara kudari echindogara wakadaro, uku ndikwo kupinimija kwangu; neni ndinopinimija kuti ndino Mweya wa Mwari.