1 VaK. 6 - NOVO TESTAMENTO EM NDAU

Kutongwa kwo ndava

¹ Uripo here uno ndava kuno umweni, unoshinga kuenda koomangarira pamberi po vasikazivi kururama, asikaendi pamberi po vakacheneswa?

² Zve, amuzivi here kuti vakacheneswa vanozotonga nyika? Nokudari nyika inozotongwa ndimwi, amusisi here kutonga ndava jakatshonga?

³ Amuzivi here kuti tinozotonga ngirosi? Kunozopinda kwakaitawani muzviro zvokupona uku?

⁴ Ndizvo kudari mune ndava jokugura jo kupona uku, munovayimisa ngenyi kutonga, vari vasikareremejeki mu chiara?

⁵ Ndinovereketa izvi kuti ndimupsheruje. Chiri gwinyiso here kuti apana naumwe mundhu wakangwara pakati penyu, ungakona kugura ndava pakati po hama jake?

⁶ Asi mutendi unomangarira hama yake, eya, no pamberi povasikatendi?

⁷ Ndizvo ngo gwinyiso iripo ndava pakati penyu, kuti munomangarirana umwe no umweni, amutendi ngenyi kushaishihwa? Amutendi ngenyi kubihwa?

⁸ Asi imwimwi munoshaisha mwambhwine, no kubirana, no kuna avo vari hama jenyu.

⁹ Zve, amuzivi here kuti vasikazivi kururama avazogari ndhaka yo Umambo hwa Mwari? Musachengejehwa, akuna vapombori, nokuti vanodira miezaniso, nokuti vaombi, nokuti vanoshaisha, nokuti vanoomba no vanarumedoni.

¹⁰ Nokuti mbavha, nokuti vaemuri, nokuti varaji, nokuti vatuki, nokuti vanyimi, avatongozogari ndhaka yo Umambo hwa Mwari.

¹¹ No vamweni venyu vayiva vakadaro. Asi mwakasukwa, no kucheneswa, no kupembejwa, ngo zina ra Mambo Jesu Kristu, na ngo Mweya wa Mwari wedu.

Shandisanyi muviri yenyu kuyita kukujwa kwa Mwari

¹² Zvese zvinotendehwa kwendiri, asi andizvopi zvese zvinondinakira. Zvese zvinotendehwa kwendiri, asi andizonyiswi ngo simba ro chimwe chazvo.

¹³ Kuha kuri kwendani, no ndani iri yo kuha. Asi Mwari unozoyita kuti zvese zviite zvisina shwiro. Zvino muviri auri wo kuomba akadi, asi uri wa Mambo; na Mambo uri wo muviri.

¹⁴ Na Mwari wakamumusa Mambo, unozotimusavo ngo simba rake.

¹⁵ Amuzivi here kuti miviri yenyu iri ndhengo ja Kristu? Ndizvo ndinozotora here ndhengo ja Kristu ndijiite ndhengo jo mbhombo? Kusazodaro!

¹⁶ Zve, amuzivi here uwo unokumbatirana no mbhombo, uri muviri umwe nayo? Ngokuti wakati: Vaviri vanozoyita nyama imwe.

¹⁷ Asi iye wasunganijwa na Mambo uri mweya umwewo naye.

¹⁸ Tizanyi kuomba, chishaishi chese chaanoyita mundhu chiri ngo kunja kwo muviri; asi iye unoomba unoshaishira muviri wake.

¹⁹ Zve, amuzivi here kuti muviri wenyu uri themperi ro Mweya Wakachena, uri mukati mwenyu wo mwakapuwa ndi Mwari? Nemwi amuchiri venyu akadi.

²⁰ Ngokuti imwimwi mwakatengwa ngo mutengo mukuru. Ndizvo kujanyi Mwari mumiviri yenyu.