1 VaK. 5 - NOVO TESTAMENTO EM NDAU

Kutongwa kwo ndava yo kuomba

¹ Kunozwika kuti kuripo kuomba pakati penyu, no kuomba kwakadaro apana pakati po vo majinja, kuti umwe wenyu atore mukaji wa baba ake.

² Nemwi munojikuja, paugaro hwo kutsumba, kuti uwo wakayita uku kushata abviswe pakati penyu.

³ Ngokuti inini ngo gwinyiso pikija ndisipo ngo muviri, asi ndiripo ngo mweya, nazvino ndatomutonga, kudari ngo uripo, uwo wakayita icho chiro.

⁴ Ngo zina ra Mambo wedu Jesu, apo imwimwi mwaungana pamwepo, muno mweya wangu, ngo simba ra Mambo wedu Jesu,

⁵ kuti mupire uwo wakadaro kuna Sathani kuti aparajwe nyama, kuti mweya uponeswe ngo zuva ra Mambo Jesu.

⁶ Kujiganzisa kwenyu akuzivi kunaka. Amuzivi here kuti zvimumera zvishomanani zvinofemisa hlama yese?

⁷ Bvisanyi mumera wokare, kuti muyite hlama ipsha, kudari ngo zvo muri vasina mumera. Ngokuti Kristuzve uri Phasika redu wakabaihwa kuyita mudiro.

⁸ Ndizvo ngatingwarire mushongano wo kuha, haiwa ngo mumera wokare, nokuti ngo mumera wo khururu, no wo kushata, asi ngo chimanda chisina mumera, cho kugondeka, no cho gwinyiso.

⁹ Ndakatara kwomuri mu tshamba yangu kuti musazwana no vanoomba.

¹⁰ Izvi azvinangi vanoomba vo nyika iyi, nokuti vanoemura, nokuti vanonyima, nokuti vanodira miezaniso; ngokuti mukadaro kunosisira kuti mubve mu nyika.

¹¹ Asi zvino ndinotara kwomuri kuti musazwana no mundhu unozwi uri mutendi, kudari ari muombi, nokuti muemuri, nokuti mudiri wo miezaniso, nokuti mutuki, nokuti chiraja, nokuti mupambi; no mundhu wakadaro, haiwa, musaha naye.

¹² Ngokuti ndinenyi kuti nditonge avo vari vo kunja? Amutongi here avo vo mukati?

¹³ Asi avo vokunja Mwari unozovatonga. Budisanyi mundhuwo wakashata kuti abve pakati penyu.