1 VaK. 4 - NOVO TESTAMENTO EM NDAU

Mushando wo vapostori

¹ Mundhu ngaativerenge kuti tiri vashandi va Kristu, no vangwariri vo zvakafishika zva Mwari.

² Kune izvi kunopshakiwa kuno vangwariri kuti mundhu awanike ari unogondeka.

³ Asi kwendiri chiri chiro chidoko kuti nditongwe ndimwi, nokuti ngo kutonga kwo mundhu; eya, andijitongi.

⁴ Ngokuti andizivi chiro chinondiitira ndava pachangu; asi andipembejwi ngoichi; asi uwo unonditonga ndi Mambo.

⁵ Ndizvo musatonga chiro ngo pamberi nguva isati yaguma, mbhera Mambo aviye, uwo unozoviisa mukujeka zviro zvakafishika zvo chidima, naye unozopangijira mipinimijo yo mwoyo; naapo mundhu wese unozova no kukujwa kwake kunobva kuna Mwari.

⁶ Zvino, hama, ndakaezanisa muezaniso uwu kwendiri no kuna Aporo ngo ndava yenyu; kuti kwetiri mujije kuti musazopinimija kupinda izvo zvakatahwa; kuti kusazovapo umwe wenyu unojitundhumaja kurwisanisa umwe no umweni.

⁷ Ngokuti ndiyani wakakuita kuti uparajane? Unenyi chousikazivi kuashira? Asi kuti wakachiashira, unoganza ngenyi, kudari ngousikazivi kuchiashira?

⁸ Zvino mwaguta! Zvino mwaganya! Mwakatonga musiri nesu akadi! Eya, ndingada kuti mutonge kuti isisuvo titonge nemwi!

⁹ Ngokuti tinopinimija kuti Mwari wakatiemesa isisu vapostori tiri vokugumisira kwavari vese, kudari ngo vandhu vakaemesehwa kuurawa; ngokuti tinoitwa vokuringihwa kuno nyika, no kungirosi, no kune vandhu.

¹⁰ Tiri mapenji ngo ndava ya Kristu, asi imwimwi muri vakangwara kuna Kristu; isisu tiri vakarembejeka, asi imwimwi muri vakagwinya; imwimwi munakwo kureremejwa, asi isisu atireremejwi.

¹¹ Mbhera kuguma kuno nguva iyi tine njara, no nyota, tiri mititinini, tinopambhajwa, tiri vapepesheki.

¹² Tinoshanda techishanda ngo nyara jedu; apo techitukwa, tinodakajisa; apo tinotambujwa tinoshingirira;

¹³ apo techireviwa, tinopota; tinoitwa vakadari ngo duru ro nyika, tiri svina yo vese, mbhera nazvino.

¹⁴ Anditari izvi zviro kumupsheruja, asi kuti ndimupange kudari ngo zvomuri vana vanodikana.

¹⁵ Ngokuti pikija mungava no vajijisi vari gumi ro zviuru (10.000) kuna Kristu, kani amuna majibaba akawanda. Ngokuti kuna Kristu Jesu ndakamubara ngo vhangeri.

¹⁶ Ndizvo ndinomupota, itanyi vanondiejerera.

¹⁷ Ngo iyi ndava ndakatumira kwomuri Timoti, uri mwana wangu unodikana no unogondeka kuna Mambo, iye unozomueujira njira jangu jiri kuna Kristu, kudari ngo zvo ndinojijisa kundau jese muzviara zvese.

¹⁸ Zvino vamweni venyu vanojikuja inga kuti andiviyi kwomuri.

¹⁹ Asi ndinozoviya kwomuri ngo kukasira, kudari Mambo echitenda; neni ndinozoziva haiwa ngo izwi raavo vanojikuja, asi ngo simba ravo.

²⁰ Ngokuti Umambo hwa Mwari andihwopi hwo izwi, asi hwo simba.

²¹ Munodenyi? Ndinozoviya kwomuri ngo ndonga here, nokuti ngo rudo, na ngo mweya wakapfava?