1 VaK. 3 - NOVO TESTAMENTO EM NDAU

Varanda va Mwari

¹ Neni hama, inga ndisikakoni kuvereketa kwomuri kudari ndivo vo Mweya, asi kudari ndivo vo nyama, kudari ndivo vari chiya kuna Kristu.

² Ndakamupa mukaka, haiwa kuha kwakagwinya, ngokuti inga musati mwakona: Haiwa, pikija nazvino, amusati mwakona.

³ Ngokuti muchiri vo nyama; ngokuti kwechivoneka kuti kuripo pakati penyu ndurumwa no hasha, amurivopi here vo nyama, mwechifamba ngo muitiro wo vandhu?

⁴ Ngokuti apo umwe unoti, “Inini ndiri wa Pauri”, no umweni unoti, “Inini ndiri wa Aporo”; amurivopi vo nyama here?

⁵ Ndizvo Aporo uriyani? Na Pauri uriyani? Varanda vo mwakatenda ndivo; umwe ngaumwe kudari ngozvaakapuwa ndi Mambo.

⁶ Inini ndakasima, na Aporo wakadirijira, asi Mwari wakameresa.

⁷ Ndizvo andiyepi unosima uri chiro, nokuti unodirijira; asi ndi Mwari unomeresa.

⁸ Zvino uwo unosima, no uwo unodirijira, vari umwe; asi umwe na umwe unoashira musharo wake, kudari ngo mushando wake.

⁹ Ngokuti tiri vashandi pamwepo na Mwari; imwimwi muri munda wakarimwa wa Mwari, muri nyumba ya Mwari.

¹⁰ Kudari ngo nyasha ja Mwari jakapuwa kwendiri, kudari ngo muvaki unobheja no wakangwara ndakadira tshikiro; asi umweni unovaka panyezuru paro. Kani umwe ngaumwe ngaangwarire njira yaanovaka ndiyo panyezuru paro.

¹¹ Ngokuti tshikiro rimweni akuna mundhu ungadira, kwega iro rakadihwa riri Kristu Jesu.

¹² Asi kudari mundhu echivaka panyezuru peiro tshikiro, ngo mukore, sirivha, mapuwe ano mutengo mukuru, no mimbiti, mwenje, mahlanga.

¹³ Mushando wo mundhu wese unozopangijihwa; ngokuti zuva iro rinozopangijira, ngokuti unozovoniswa ngo muriro, no muriro wambhwine unozoeja mushando wo mundhu wese kuti uri wakadini.

¹⁴ Asi kudari mushando wo mundhu nokuti ngouri wechizogara waakavaka panyezuru paro, iye unozoashira musharo.

¹⁵ Kudari mushando wo mundhu nokuti ngouri wechizopiswa, iye unozorashikihwa: Asi iye ambhwine unozoponeswa; asi kudari ngokupfocha muriro.

¹⁶ Amuzivi here kuti imwimwi muri themperi ra Mwari, nokuti Mweya wa Mwari, unogara mukati mwenyu?

¹⁷ Kudari mundhu nokuti ngouri echipwanya themperi ra Mwari, iye Mwari unozomupwanyavo; ngokuti themperi ra Mwari riri rakachena; ndimwi themperi iro.

¹⁸ Mundhu asajichengeja, kudari mundhu echipinimija kuti uri wakangwara pakati penyu, ngo ungwaru hweiyi nguva, ngaayite uri benji, kuti ayite wakangwara.

¹⁹ Ngokuti ungwaru hweiyi nyika huri upenji kuna Mwari. Ngokuti kwakatahwa kuti: “Iye unobata vakangwara muurimbwi hwavo.”

²⁰ Zve, kuti: “Jehovha unozoziva mikarakajo yo vakangwara kuti iri isina shwiro.”

²¹ Ndizvo mundhu asaganza ngo vandhu. Ngokuti zviro zvese ngozvenyu;

²² pikija Pauri, nokuti Aporo, nokuti Khefasi, pikija nyika, nokuti kupona, nokuti kufa, nokuti zviro zviripo, nokuti zviro zvichazoviya, zvese ngo zvenyu;

²³ nemwi muri va Kristu, na Kristu uri wa Mwari.