1 VaK. 2 - NOVO TESTAMENTO EM NDAU

Vhangeri ro kukohomehwa kwa Kristu

¹ Neni, hama, apo ndaviya kwomuri, andizivi kuviya ngo kukona kuvereketa, nokuti ngo kungwara, ndechiteketesa kwomuri uchapupu hwa Mwari.

² Ngokuti ndakajiemesera kuti andizozivi chiro pakati penyu, kwega Jesu Kristu, uwo wakakohomehwa.

³ Neni ndayiva nemwi ndiri wakarembejeka, ndechitya, ndechihuta kakurutu.

⁴ No mazwi angu no kuchumayira kwangu kwayinga kusiri mazwi o kuonga o ungwaru wo vandhu, asi ayiva mukupangijihwa kwo Mweya, no kwo simba.

⁵ Kuti kugonda kwenyu kusazocheyama muungwaru hwo vandhu, asi musimba ra Mwari.

Ungwaru unobva kuna Mweya wa Mwari

⁶ Kani tinovereketa ungwaru pakati peavo vakaperera, asi ungwaru husiri hweiyi nyika, nokuti hwo vatongi veiyi nyika, avo vanopera;

⁷ asi tinovereketa ungwaru hwa Mwari, hwakafishika, uhwo ungwaru hwainga hwakafishwa, uhwo Mwari wakahugaja ngo pamberi nyika isati yasikwa, kuti huite uthende hwedu.

⁸ Uhwu kusina vatongi veiyi nyika vakahuziva; ngokuti kudari vayinga vakahuziva, inga vasakakohomera Mambo wo uthende.

⁹ Asi kudari ngo zvakatahwa: “Izvo zvisikazivi kuvoneka ngo jiso, nokuti kuzwika ngo njeve aizivi kuzvizwa, zvisikazivikanwi mu mwoyo mwo vandhu, izvo zviro zvaakanasirira Mwari kwavari vanomuda.”

¹⁰ Asi kwetiri Mwari wakajipangijira ndi Mweya: Ngokuti Mweya unopshakisisa zvese, eya, zvakajika zva Mwari.

¹¹ Ngokuti ndiyani pakati po vandhu unoziva zvo mundhu, kwega mweya wo mundhu uri mukati mwake? Ngokudarozve akuna unoziva zviro zva Mwari, kwega Mweya wa Mwari.

¹² Asi atizivi kuashira mweya wo nyika, asi Mweya unobva kuna Mwari; kuti tizive izvo zviri zvakapuwa kwetiri ngo nyasha ndi Mwari.

¹³ Izvo zviro zvotinovereketa ndizvozve, haiwa ngo mazwi akajijiswa ngo ungwaru hwo vandhu, asi ngaao anojijiswa ndi Mweya; techiezanisa zvo Mweya ndi Mweya.

¹⁴ Asi mundhu wo nyama aashiri zviro zvo Mweya wa Mwari; ngokuti zviri upenji kwaari; naye aakoni kuziva, ngokuti zvinovoniswa ndi Mweya.

¹⁵ Asi uwo uri wo Mweya, unopshakisisa zviro zvese, asi iye ambhwine aatongwi ngo mundhu.

¹⁶ Ngokuti ndiyani wakaziva mupinimijo wa Jehovha kuti amupange? Asi isisu tinawo mupinimijo wa Kristu.