1 VaK. 16 - NOVO TESTAMENTO EM NDAU

Munikero kuna vatendi vo Jerusarema

¹ Zvino ngo ndava yo kuunganijira munikero wokupa vakacheneswa, kudari ngo zvo ndakapanga vo zviara zvo Garatiya, itanyivo kudaro nemwi.

² Ngo zuva ro kutanga ro vhiki, umwe ngaumwe wenyu ngaajiisire ngokwake mu mangwaririro, kudari ngo zvaakamupfumisa Mwari, kuti kusazovapo kuunganija apo ndagumeyo.

³ Naapo ndaguma, avo vomunozotsanangura, ndinozovatuma no tshamba kuti vatware zvipo zvenyu kuenda Jerusarema.

⁴ Nokudari kwechisisira kuti ndiendevo, vanozoenda neni.

Urongwa hwokufambira zviara

⁵ Asi ndinozoviya kwomuri ngosure ndafamba ngo mu Makedhoniya; ngokuti ndinozofamba ngo mu Makedhoniya;

⁶ asi ndinozogara nemwi, no kupeja nguva yo shipepo ndiripo, kuti imwimwi mundiperekeje muhwendo hwangu pikija kwapi kwondinozoenda.

⁷ Ngokuti andidi kumuvona zvino ndechipinda; ngokuti ndinoda kuti ndigare mukuvo nemwi, kudari Mambo echitenda.

⁸ Asi ndinozogara mu Efesu mbhera rigume zuva ro Pentekosti;

⁹ ngokuti ruvhi rwakabewurihwa kwendiri, kuti ndiite mushando mukuru no wakagwinya, varipozve vakorore vazhinji.

¹⁰ Zvino kudari Timoti echiviya kwomuri, vonanyi kuti agare pakati penyu asikatyi; ngokuti iye unoshanda mushando wa Mambo, kudari ngo zvendinoita inini.

¹¹ Ndizvo kusazovapo mundhu unomushora, asi mumuendese mberi muhwendo hwake mukunyarara, kuti aviye kwendiri: ngokuti ndinomurindira kuti unozoviya pamwepo no hama.

¹² Asi ngo ndava ya Aporo hama yedu, ndakapota kakurutu kwaari kuti avieyo kwomuri pamwepo no hama jimweni, asi kwayinga kusiri kuda kwake kuti avieyo zvinopano: Asi unozoviya apo awana mukuvo.

Mazwi okugumisira no muchungamijo

¹³ Rindanyi, gwinyanyi kuema mukugonda, itanyi vakashinga, muyite vakagwinya.

¹⁴ Zvese zvomunoita, ngazviitwe ngo rudo.

¹⁵ Zvino ndinomupota, hama, (munoziva vo mbhuri ya Stefano, kuti vari mitanguro yo Akaya, nokuti ivo vakajiemesera kushandira vakacheneswa),

¹⁶ kuti nemwivo mupfavire vakadaro, no kuno mundhu wese unobesera mumushando, echiremehwa.

¹⁷ Neni ndinodakara ngo kuviya kwa Stefano na Fortunatu, na Akaiko: Ngokuti izvo zvakasarira kwomuri, ivo vakazvizajisa kwendiri.

¹⁸ Ngokuti vakazoroja mweya wangu no wenyuzve: Ndizvo tendanyi vakadaro.

¹⁹ Zviara zviri mu Aziya zvinomutambisa. Akwira na Prisira vanomutambisa kakurutu kuna Mambo pamwepo no chiara chiri mu nyumba yavo.

²⁰ Vatendi vese vanomutambisa. Chungamijananyi ngo muromo ngo kuchena.

²¹ Kutambisa kwangu inini Pauri ngo nyara yangu yambhwine.

²² Kudari aripo mundhu pikija ngouri usikamudi Mambo, ngaayite unotukwa. Mambo unoviya.

²³ Nyasha ja Mambo Jesu Kristu ngajive nemwi.

²⁴ Rudo rwangu ngarugare nemwi mwese ndiye Jesu Kristu, Ameni!