1 VaK. 14 - NOVO TESTAMENTO EM NDAU

Zvipuwo zvo Mweya

¹ Teveranyi rudo, asi disisanyi kakurutu zvipuwo zvo Mweya, asi kakurutu kuti muprofete.

² Ngokuti uwo unovereketa ngo ndimi jimweni, aavereketi kuno vandhu, asi kuna Mwari; ngokuti apana mundhu unomuzwa; asi Mweya unovereketa zvakafishika.

³ Asi uwo unoprofeta unovereketa ku vandhu zvinovaka, no zvinoembezera, no zvinonyaraja.

⁴ Uwo unovereketa ngo rurimi unojivaka; asi uwo unoprofeta unovaka chiara.

⁵ Zvino ndingada kuti imwimwi mwese muverekete ngo ndimi, asi kupinda icho, kuti muprofete; ngokuti uwo unoprofeta, uri mukuru kuno uwo unovereketa ngo ndimi, asi kunja kuti akumuche, kuti chiara chivakiwe.

⁶ Asi zvino, hama kudari ndechiviya kwomuri, ndechivereketa ngo ndimi ndinozomubesera ngenyi, kunja kwokuti ndiverekete kwomuri ngo njira inopangijira, nokuti yo kuziva, nokuti yo kuprofeta, nokuti yo kujijisa?

⁷ Pikija zviro zvisina kupona, zvinorira, pikija iri nyere, nokuti chidyangari, kudari zvisikaparajani mukurira kwazvo, kungaitwa mazivirwenyi kurira kwazvo?

⁸ Ngokuti kudari mbhayapaya ikarira kusikazivikanwi, ndiyani unozojinasirira kuenda kuimbi?

⁹ Ndizvo nemwivo, kudari mwechivereketa ngo ndimi izvo zvisikanasi kuzwisisika, zvinozozivikisa kudini izvo zvinovereketwa? Ngokuti ngokudaro munozovereketa kuno dutu.

¹⁰ Kuripo pamweni mbewu jakawanda jo maungira mu nyika, nao akuna mbewu yao isikanangi chiro.

¹¹ Ndizvo kudari ndisikazivi biningijo ro izwi, ndinozoita munyikanja kwaari unovereketa, no uwo unovereketa unozoyita munyikanja kwendiri.

¹² Ngokudaro nemwivo, kwechivoneka kuti munodisisa kuva no zvipuwo zvo Mweya, pshakanyi kuti muwanjwe mukuvaka chiara.

¹³ Ndizvo uwo unovereketa ngo rurimi rumweni, ngaakumbire kuti akumuche.

¹⁴ Ngokuti kudari ndechikumbira ngo rurimi rumweni, mweya wangu unokumbira, asi kuzwisisa kwangu akukonekani.

¹⁵ Ndizvo ndinozoitenyi? Ndinozokumbira ndi Mweya, ndechikumbira ngokuzwisisazve: Ndinozoemba ndi Mweya, ndechiemba ngokuzwisisazve.

¹⁶ Kudari zvisikazivi kudaro, kudari wechibonga ndi Mweya, uwo usikazivi kujija ungazoita manangirenyi, kuti, Ameni, apo wobonga, kwechivoneka kuti iye aazivi chounonanga?

¹⁷ Ngokuti ngo gwinyiso iwewe unonasa kubonga, asi umweni aazivi kuvakiwa.

¹⁸ Ndinobonga Mwari, ngokuti ndinovereketa ngo ndimi jimweni kupinda imwimwi mwese.

¹⁹ Asi mu chiara ndingada kuti ndiverekete mazwi mashanu ngo kuzwisisa kwangu, kuti ndijijise vamweni navo, kuno kuti ndiverekete mazwi ari gumi ro zviuru (10.000) ngo rurimi rusikazivikanwi.

²⁰ Hama, musayita vana vokuzwisisa; asi muzvakashata itanyi vana, mukuzwisisa itanyi vabva mundanga.

²¹ Kwakatahwa mu mipango, kuti: “Ngo vandhu vo ndimi jimweni ngo miromo yo vonyikanja ndinovereketa kuno ava vandhu; pikija vakadaro, avazondizwi, unonanga Jehovha.”

²² Ndizvo ndimi jiri chivoniso, haiwa kwavari vanotenda, asi kwavari vasikatendi: Asi kuprofeta kuri chivoniso haiwa kwavari vasikatendi, asi kwavari vanotenda.

²³ Ndizvo, kudari chiara chese chaungana pamwepo, navo vese vechivereketa ngo ndimi jimweni, kukanghwinemo vandhu vasikazivi kujija, nokuti vasikatendi, vakadaro avazonangi here kuti muri vanopenga?

²⁴ Asi kudari vese vechiprofeta, ozonghwinemwo umwe usikatendi, nokuti usikazivi kujija, iye unorambijwa ndivo vese, unotongwa ndivo vese.

²⁵ Zvakafishika zvo mwoyo wake zvinopangijihwa; ndizvo ngokudaro unozowa pasi ngo hope yake no kudira Mwari, echinanga kuti Mwari uri pakati penyu ngo gwinyiso.

Kurongwa kwo mushongano wo kudira

²⁶ Ndizvo chinyi hama? Apo mwoungana pamwepo, umwe ngaumwe ano nduyo ano chijijiso, ano chakapangijihwa, no rurimi rumweni, no kukumucha. Zviro zvese ngazviitwe zvinovaka.

²⁷ Kudari aripo mundhu nokuti ngouri unovereketa ngo ndimi imweni, ngavayite vaviri, nokuti vasikapindi vatatu, ngavayite ngo kutevererana, no umweni ngaakumuche.

²⁸ Asi kudari pasina unokumucha, ngaanyarare mu chiara ngaajivereketere ega, no kuna Mwari.

²⁹ No vaprofeti ngavaverekete vaviri nokuti vatatu no vamweni ngavazwisise.

³⁰ Asi kudari chiro chechipangijihwa kuno umweni, unogara apo, wokutanga ngaanyarare.

³¹ Ngokuti imwimwi mwese mungaprofeta ngokutevererana, kuti vese vajije, nokuti vese vaembezehwe.

³² No mweya yo vaprofeti inopfavira vaprofeti.

³³ Ngokuti Mwari andiyepi wo hohoho, asi wo kunyarara; kudari ngo zvezvakadaro kuzviara zvese zvo vakacheneswa.

³⁴ Vanakaji ngavanyarare mu chiara. Ngokuti akutendehwi kwavari kuti vaverekete, asi ngavapfavire kudari ngo zvinonangwa ngo mipango.

³⁵ Nokudari vechida kuziva chiro, ngavabvunjise kuvamuna vavo vaakanyi. Ngokuti zvinopsheruja kuti mwanakaji averekete mu chiara.

³⁶ Chinyi? Izwi ra Mwari rakatanga kubuda kubva kwomuri here? Nokuti rakagumira imwimwi mwega here?

³⁷ Kudari aripo mundhu unopinimija ngo kwake kuti uri muprofeti nokuti uri wo mweya, ngaazvitende izvo zvendinotara kwomuri, kuti zviri mipango ya Mambo.

³⁸ Asi kudari aripo mundhu usikazivi, ngaagare asikazivi.

³⁹ Ndizvo, hama jangu, emuranyi kuti muprofete, musarambija kuvereketa ngo ndimi.

⁴⁰ Asi zvese ngazviitwe ngo njira inosisira, na ngo kutevererana.