1 VaK. 13 - NOVO TESTAMENTO EM NDAU

Chikuru chazvo irudo

¹ Pikija ndikanyavereketa ngo ndimi jo vandhu, no jo ngirosi, asi ndisina rudo, ndiri thusi rinoita bope, nokuti ngoma yo simbi inorira.

² Nokudari ndinokuprofeta, ndikaziva zvakafishika zvese, no kuziva kwese; nokudari ndinokugonda kwese, kunokwana kubvisa matundhu, asi ndisina rudo, andiripi chiro akadi.

³ Pikija ndikapa ndhumbi jangu jese kukovera varombo, nokuti ndikapa muviri kupiswa, asi ndisina rudo azvindibeseri chiro.

⁴ Rudo runosengerera mukuvo wakareba, rudo rune nyasha; rudo aruna ndurumwa; rudo arujiganzisi, rudo arujitundhumaji,

⁵ aruiti zvisikasisiri, arujipshakiri zvarwo, arutseneswi, aruvereketi zvakashata.

⁶ Arudakari ngo zvisikazivi kururama, asi runodakara ngo zvo gwinyiso.

⁷ Runodumaija zviro zvese, runotenda zvese, runogondera zvese, runoshingirira zvese.

⁸ Rudo arukoreri; asi kunyaripo kuprofeta kunozoita kusina shwiro; kunyaripo kuvereketa ngo ndimi, jinozonyarara; kunyaripo kuziva kunozoita kusina shwiro.

⁹ Ngokuti tinoziva zvimweni, nesu tinoprofeta zvimweni.

¹⁰ Asi apo zvaguma zvakaperera, naapo izvo zvisikazivi kuperera zvinozopera.

¹¹ Apo ndichiri mwana mudoko, ndakavereketa kudari ngo mwana mudoko, ndakaziva kudari ngo mwana mudoko, ndakapinimija kudari ngo mwana mudoko; apo ndaa mundhu wakura, ndarasha zvo uhwana.

¹² Ngokuti zvino tinovona ngo muchibuko mumauma, asi ngo nguva iyo tinozovona hope kuhope. Zvino ndinoziva zvimweni, asi ngo nguva iyo ndinozonasa kuziva kudari ngo zvo ndakazivikanwa.

¹³ Asi zvino zvinogara kugonda, no kutenda, no rudo, izvi zvitatu; asi chikuru chazvo chiri rudo.