1 VaK. 12 - NOVO TESTAMENTO EM NDAU

Zvipuwo zvo Mweya

¹ Zvino ngo ndava yo zvipuwo zvo Mweya, hama, andidi kuti muyite vasikazivi.

² Munoziva kuti apo muchiri vasikadiri Mwari, mwaikweviwa kuenda kuno iyo miezaniso isikavereketi, pikija mwaikweviwa ngo njira yakadini.

³ Ndizvo ndinomuzivisa kuti akuna mundhu, echivereketa ndi Mweya wa Mwari, ungananga kuti Jesu uri wakatukwa; zve, akuna mundhu ungananga kuti, Jesu uri Mambo kwega ndi Mweya Wakachena.

⁴ Zvino zviripo zvipuwo zvakaparajana, asi Mweya ndiumwe.

⁵ Kuripozve kuparajana kwo kushandira, asi Mambo ndiumwewo.

⁶ Kuripozve kuparajana kwo mishando, asi Mwari umwe, uwo unoshandisa zviro zvese kwavari vese.

⁷ Asi kuno mundhu wese kunopuwa kupangijihwa kwo Mweya, kuti apfumiswe ndiwo.

⁸ Ngokuti kuno umwe kunopuwa ndi Mweya izwi ro ungwaru; no kuno umweni kunopuwa izwi ro kuziva, ndi Mweya umwewo:

⁹ Kuno umweni kunopuwa kugonda, mu Mweya umwewo; no kuno umweni kunopuwa zvipuwo zvo kurapa, mu Mweya umwewo.

¹⁰ Kuno umweni kunopuwa kuyita mishando ino simba; no kuno umweni kunopuwa kuprofeta; no kuno umweni kunopuwa kuzwisisa Mweya; kuno umweni kunopuwa kuvereketa ngo ndimi jakaparajana; no kuno umweni kunopuwa kukumucha ndimi:

¹¹ Asi izvi zvese zvinoshandwa ndi Mweya umwewo; unokovanisira kuno mundhu umwe ngaumwe, kudari ngo kuda kwake.

Tese tiri muviri umwe

¹² Ngokuti kudari ngo muviri uri umwe, uno marupande akawanda, no marupande ese o muviri akanyawanda, ari muviri umwe; wakandodarovo Kristu.

¹³ Ngokuti isisu tese takabhapatiswa muMweya umwe kuyita muviri umwe, tinyari vaJudha, nokuti vagiriki, tinyari vakasungwa, nokuti takasununguka, nesu tese takaitwa kuti timwe ku Mweya umwewo.

¹⁴ Ngokuti muviri andiwopi rupande rumwe, asi uri marupande mazhinji.

¹⁵ Kudari tshoka yechiti, ngokuti andiripi nyara, andiri wo muviri akadi, ndizvo airi ndhengo yo muviri here?

¹⁶ Nokudari njeve yechiti ngokuti andiripi jiso, andiri wo muviripi; ndizvo aichiri yo muviri here?

¹⁷ Kudari muviri wese wayiva jiso, kuzwa kungava kwapi? Kudari wese wayiva kuzwa, kunuhwa kungava kwapi?

¹⁸ Asi zvino Mwari wakaemesa marupande umwe ngaumwe ao mumuviri, kudari ngo kuda kwake.

¹⁹ Nokudari ese aiva rupande rumwe, ungava kwapi muviri?

²⁰ Asi zvino aripo marupande mazhinji, asi muviri umwe.

²¹ No jiso aringanangi kuno nyara, kuti: Andikutami iwewe: Nokutizve soro aringanangi kuno rutshoka, kuti, Andikutami iwewe.

²² Haiwa, kakurutu, kuna ao marupande o muviri anoverengwa anonga ari akarembejeka, anodikanwa.

²³ Naao marupande o muviri etinopinimija ndiwo kuti aanyanyi kureremejwa, ndiwo etinoreremeja kakurutu; no marupande edu asikanasi kuringirika ndiwo anokuringirika akapinda kunaka;

²⁴ asi marupande edu anoringirika aatami kureremejwa: Asi Mwari wakaronga pamwepo zvo muviri, echipa kureremejwa kukurutu kuno urwo rupande rwaikutama.

²⁵ Kuti kusazovapo kuparajana mumuviri; asi kuti marupande ese angwarirane rumwe kuno rumweni

²⁶ Nokudari rupande rumwe rechitambujika, marupande ese anotambujika narwo; nokuti kudari rupande rumwe rwechireremejwa marupande ese anodakara narwo.

²⁷ Zvino imwimwi muri muviri wa Kristu, uwo no uwo muri marupande awo.

²⁸ Na Mwari wakaemesa vamweni mu chiara, vokutanga vapostori, vochipiri vaprofeti, vochitatu vajijisi, ngosure vayiti vo mishamiso, ngosure zvipuwo zvokurapa, no vabeseri, no vatungamiriri, no ndimi jakaparajana.

²⁹ Vese vari vapostori here? Vese vari vaprofeti here? Vese vari vajijisi here? Vese vari vayiti vo mishamiso here?

³⁰ Vese vano zvokurapa here? Vese vanovereketa ngo ndimi jakaparajana here? Vese vanokomucha here?

³¹ Asi itanyi vanodisisa zvipuwo zvakapinda kukura. Asi ndinomupangijira njira yakapinda kunaka.