1 VaK. 11 - NOVO TESTAMENTO EM NDAU

¹ Itanyi vanondiejerera, kudari ndinivo ndiri muejereri wa Kristu.

Zvinodikana kuyita mu mushongano yo mukumbiro

² Zvino ndinomuirikija ngokuti munondicherecheja ngo zviro zvese, no kubatirira kuzviemeso kudari ngo zvondakazvipira kwomuri.

³ Asi ndinoda kuti muzive kuti musoro wo mundhu wese ndi Kristu no mwamuna ndiye musoro wo mukaji; na Mwari ndiye musoro wa Kristu.

⁴ Pikija ndiyani mwamuna unokumbira nokuti kuprofeta uno musoro wakafukijwa, aareremeji musoro wake.

⁵ Asi mwanakaji wese unokumbira nokuti kuprofeta uno musoro wake usikazivi kufukijwa, aareremeji musoro wake, ngokuti kudari zvakadaro, kunotojana kunonga ari wakapahwa.

⁶ Ngokuti kudari mwanakaji asikazivi kufukijwa, ngaagundwe; asi kudari chiri chinopsheruja ku mwanakaji kuti agundwe, nokuti kupahwa, ngaafukijire.

⁷ Ngokuti ngo gwinyiso akudikani kuti mwamuna afukijihwe musoro wake, kwechivoneka kuti iye uri muezaniso no uthende hwa Mwari: Asi mukaji uri uthende hwo mwamuna.

⁸ Ngokuti mwamuna aazivi kubva ku mwanakaji; asi mwanakaji wakabva kuno mwamuna.

⁹ Ngokuti mwamuna aazivi kusikihwa mukaji, asi mukaji wakasikihwa mwamuna.

¹⁰ Ngo iyi ndava kunodikana kuti mwanakaji ave no chitatijo cho simba panyezuru po musoro wake ngo ndava yo ngirosi.

¹¹ Kani mwanakaji aaripi ngokunja kwo mwamunapi, nokuti mwamuna aari ngokunja kwo mwanakaji kuna Mambo.

¹² Ngokuti kudari ngo mwanakaji wakabva kuno mwamuna, ngokudaro mwamuna vakabva kuno mwanakaji; asi zviro zvese zvakabva kuna Mwari.

¹³ Jigurirenyi mwambhwine; chiri chinosisira here kuti mwanakaji akumbire kuna Mwari asikazivi kufukijwa?

¹⁴ Amujijiswi here ngo chibarihwe chenyu, kuti, kudari mwamuna ano bvuji rakareba, rinomupsheruja?

¹⁵ Asi kudari mwanakaji ano bvuji rakareba, riri uthende kwaari: Ngokuti bvuji rake rakapiwa kwaari kumufukija.

¹⁶ Asi kuti aripo mundhu unovoneka, uno hasha, atina muitiro wakadaro, zve, no zviara zva Mwari azvinawo.

Kuha chirariro cha Mambo ngo njira isikasisiri

¹⁷ Asi ndechimupa uku kupanga, andimuirikiji akadi, kuti munoungana pamwepo musikaunganiri zvakapinda kunaka, asi munounganira zvakapinda kushata.

¹⁸ Ngokuti kutanga kwazvo zvese, apo mwoungana mu chiara, ndinozwa kuti kuripo kuparajana pakati penyu; neni ndinotenda zvimweni zvazvo.

¹⁹ Ngokuti kunodikana kuti kuvapo kuparajana pakati penyu, kuti avo vanotenda pakati penyu vavoneke.

²⁰ Ndizvo apo mwoungana pamwepo, azvingaitiki kuti muhe kuha kwa Mambo.

²¹ Ngokuti mukuha kwenyu, mundhu wese unojitorera ngo pamberi kuha kwake; no umweni unonjara, no umweni waraja.

²² Chinyi! Amuna here nyumba jokuhira no jokumwira? Nokuti munoshora here chiara cha Mwari, no kuvapsheruja vasina? Ndinozoti kudini kwomuri? Ndinozomuirikija ngo ichi here? Andimuirikiji.

²³ Ngokuti ndakaashira kuna Mambo, icho chendakapavo kwomuri, kuti Mambo Jesu ngo usiku uhwo hwakatengiswa ndihwo, wakatora chimanda;

²⁴ naapo ayinga abonga, wakachigura, akati: “Ichi chiri muviri wangu, unoguhwa ngo ndava yenyu; itanyi ichi kundicherecheja.”

²⁵ Ngokudarozve wakatora mukheyo ngosure kwokuha, echiti: “Mukheyo uwu uri chitenderano chipsha mu ngazi yangu; itanyi ichi nguva jese jo munomwa kwouri, kundicherecheja.”

²⁶ Ngokuti nguva jese jomunoha ichi chimanda, no kumwa ku uwu mukheyo, munoteketesa kufa kwa Mambo mbhera aviye.

²⁷ Ndizvo, pikija ndiyani unoha chimanda nokuti kumwa kumukheyo wa Mambo ngo njira isikasisiri, unozova no ndava yo muviri no yo ngazi ya Mambo.

²⁸ Asi mundhu ngaajiringire pachake, adaro ngaahe kuno icho chimanda, no kumwa kuno uwo mukheyo.

²⁹ Ngokuti uwo unoha nokuti kumwa, unohira nokuti kumwira kutongwa kwaari ambhwine, asikavonesesi muviri wa Mambo.

³⁰ Ngo iyi ndava vazhinji pakati penyu vakarembejeka, no kuhwara, no vazhinji vakavata.

³¹ Asi kudari isisu tainga takajiringira pachedu, inga tisikatongwi.

³² Asi apo tinotongwa, kupangihwa ndi Mambo, kuti tisazoita vanorashwa pamwepo no vo nyika.

³³ Ndizvo, hama jangu, apo mwoungana kuti muhe imirananyi.

³⁴ Kudari aripo uno njara, ngaahe kanyi; kuti kuungana kwenyu kusazoita kwokuti mutongwe. No zvimweni ndinozozvirongeja ndikazoviyeyo.