1 VaK. 10 - NOVO TESTAMENTO EM NDAU

Kristu nokuti mabzoka

¹ Andidi hama, kuti muyite vasikazivi kuti majibaba edu ese aiva pasi po gore, navo vese vakaambuka jombe;

² navo vakabhapatiswa kuna Mosi mugore no mujombe;

³ Navo vese vakaha kuha kumwekwo kwo Mweya;

⁴ navo vese vakamwa kumwa kumwekwo kwo Mweya. Ngokuti vakamwa kuno buwe iro ro Mweya rakavatevera; no buwe iro rayiva riri Kristu.

⁵ Asi Mwari aazivi kunasa kudakajiswa ngo vazhinji vavo; ngokuti vakapejwa mu bani.

⁶ Zvino izvi zvinoita zvivonero zvedu kuti isisu tisazoemura zvakashata, kudari ngo zvovakaemura avo.

⁷ Musazoita vanodira miezaniso, kudari ngo vamweni vavo; kudari ngo zvakatahwa, kuti: “Vandhu vakagara pasi kuha, no kumwa, vakamirukazve kutamba.”

⁸ Zve, tisazoangarara kudari ngo zvovakaita vamweni vavo, vakaurawa ngo zuva rimwe vari zviuru makumi maviri na zvitatu (23.000).

⁹ Zve, tisazomueja Mambo, kudari ngo zvovakamueja vamweni vavo, navo vakapejwa ngo nyoka.

¹⁰ Zve, musazon'un'uta kudari ngo zvovakan'un'uta vamweni vavo, navo vakapejwa ngo muurayi.

¹¹ Asi izvi zviro zvakaitwa kwavari kuyita zvivonero; nazvo zvakatahwa kuti zvitingwaje, isisu tagumihwa ngo kupera kwo nyika.

¹² Ndizvo iye unokarakaja kuti unoyima, ngaangwarijire kuti asazowa.

¹³ Akuna kuejwa kwakamugumira, kwega ukwo kwakagumira vandhu vamweni. Asi Mwari unogondeka, uwo usikatendi kuti muejwe kupinda simba ro munaro; asi pakuejwa unozonasirirazve njira yo kupokonyoka ndiyo, kuti mungava no simba ro kukutwara.

¹⁴ Ndizvo, vanodikana vangu, tizanyi kudira miezaniso.

¹⁵ Ndinovereketa kudari kuno vakangwara; zwisisanyi zvo ndinonanga.

¹⁶ Mukheyo wo kubonga, wo tinobonga ndiwo, andiwopi here kuiyana mu ngazi ya Kristu? No chimanda cho tinogura andichopi here cho kuiyana mumuviri wa Kristu?

¹⁷ Kwechivoneka kuti isisu tinyari vazhinji, tiri chimanda chimwe, tiri muviri umwe. Ngokuti isisu tese tinoha pamwepo chimanda chimwe.

¹⁸ Ringiranyi vaIsraeri vari vo nyama; avo vanoha midiro yo mibairo, avana kuiyana here no altari?

¹⁹ Ndizvo ndinozoti kudini? Ndinozonanga here kuti chiro chakabaihwa miezaniso yo kudira chine shwiro?

²⁰ Asi ndinonanga kuti izvo zviro zvo vanobaira vo majinja, vanozvibaira kuno mabzoka, haiwa kuna Mwari; neni andidi kuti muiyane no mabzoka.

²¹ Amungamwi kuno mukheyo wa Mambo, no kumukheyo wo mabzoka. Amungahi kutafura ra Mambo no kutafura ro mabzoka.

²² Nokuti tinomusa ndurumwa ya Mambo here? Tine simba kupinda rake here?

Zvese mukukuja Mwari

²³ Zviro zvese zvinotendehwa; asi andizvopi zviro zvese zvinobesera. Zviro zvese zvinotendehwa; asi andizvopi zvese zvinovaka.

²⁴ Kusazovapo mundhu unozvipshakira zvake, asi zvo umweni.

²⁵ Izvo zvinotengiswa mu musika, zvihenyi, musikabvunjisi mubvunjo ngo ndava yo mipinimijo.

²⁶ Ngokuti nyika ngo ya Jehovha, nazvo zvese zvirimwo.

²⁷ Kudari umwe wo avo vasikatendi echimukoka kuha, nemwi mwechida kuenda, izvo zvinodihwa pamberi penyu zvihenyi, musikabvunjisi mubvunjo ngo ndava yo mupinimijo.

²⁸ Asi kudari aripo mundhu unozoti kwomuri, ichi chakabaihwa kuno miezaniso yo kudira, musachiha, ngo ndava yo uwo wachipangijira na ngo ndava yo mupinimijo.

²⁹ Andinangi ngo ndava yo mupinimijo wako, asi ngo ndava yo mupinimijo wake. Ngokuti kusununguka kwangu kunotongwa ngenyi ngo mupinimijo wo umweni?

³⁰ Kudari ndechizviashira ngokutenda, ngenyi ndechitukwa ngo ndava yo izvo zvo ndinobonga ndizvo?

³¹ Ndizvo pikija mwechiha nokuti mwechimwa, pikija chinyi cho munoyita, itanyi zvese kumuirikija Mwari.

³² Musaita vanokhugunyisa pikija ku vaJudha, nokuti vagiriki, nokuti ku chiara cha Mwari.

³³ Kudari ndinivo ndinodakajisa vandhu vese ngo zviro zvese, ndisikapshaki kuviyihwa kwangu, asi kuviyihwa kwo vazhinji, kuti vaponeswe.