1 VaK. 1 - NOVO TESTAMENTO EM NDAU

Kuchungamija

¹ Pauri, wakadanijwa kuti ayite mupostori wa Jesu Kristu ngo kuda kwa Mwari, na Sositeni hama yedu,

² ku chiara cha Mwari chiri mu Korinte, kwavari vakacheneswa kuna Kristu Jesu, vakadanijwa kuti vayite vakacheneswa, pamwepo naavo vese vanokumbira ngo zina ra Mambo wedu Jesu Kristu, kundau jese, uri Mambo wavo no wedu.

³ Nyasha ngajive kwomuri no kunyarara kunobva kuna Mwari Baba wedu na Mambo Jesu Kristu.

⁴ Ndinobonga Mwari wangu ngo nguva jese ndimwi; ngo ndava yo nyasha ja Mwari jakapuwa kwomuri ndi Kristu Jesu.

⁵ Ngokuti ngo zviro zvese mwakapfumiswa ndiye mukuvereketa kwese no mukuziva kwese.

⁶ Kudari ngo uchapupu hwa Kristu hwakagwinyiswa mukati mwenyu;

⁷ kuti musatama chipuwo nachimwe; mwechigarira kupangijihwa kwa Mambo wedu Jesu Kristu;

⁸ uwozve unozomugwinyisa mbhera kumagumo, kuti muyite vasina kuitihwa ndava ngo zuva ra Mambo wedu Jesu Kristu.

⁹ Mwari unogondeka, uwo wo mwakadanijwa ndiye mukuiyana no Mwana wake Jesu Kristu Mambo wedu.

Kuparajana mu chiara

¹⁰ Zvino ndinomupota, hama, ngo zina ra Mambo wedu Jesu Kristu, kuti mwese muverekete chiro chimwecho, zve, kuti usavapo muparajano pakati penyu; asi kuti muyite vakasungwa pamwepo mumupinimijo umwewo, no mukugura kumweko.

¹¹ Ngokuti kwakaziviswa kwendiri, hama jangu, ngaavo vari vo mbhuri ya Kroa, kuti jiripo hasha pakati penyu.

¹² Zvino izvi ndizvo zvondinonanga, kuti umwe ngaumwe wenyu unoti, “Inini ndiri wa Pauri”, no umweni unoti, “ndiri wa Aporo,” no umweni unoti, “Inini ndiri wa Khefasi”; no umweni unoti “Inini ndiri wa Kristu.”

¹³ Kristu wakaparajaniswa here? Pauri wakakohomehwa here ngo ndava yenyu, nokuti mwakabhapatiswa here ngo zina ra Pauri?

¹⁴ Ndinobonga Mwari kuti andizivi kubhapatisa naumwe wenyu, kwega Krispu, na Gaiyo;

¹⁵ kuti kusavapo naumwe ungazoti, kuti, mwakabhapatiswa ngo zina rangu.

¹⁶ Zve, ndakabhapatisa vo mbhuri ya Stefano; ngokunja kwavo andikarakaji kuti ndakabhapatisa umweni.

¹⁷ Ngokuti Kristu aazivi kunditumira kuti ndibhapatise, asi kuti ndichumaire vhangeri: Haiwa ngo kungwara kwo mazwi, kuti ngokudaro muchinjiko wa Kristu ungazoita usina shwiro.

Kristu isimba no ungwaru hwa Mwari

¹⁸ Ngokuti izwi ro muchinjiko riri upenji kwavari vanopera; asi kwetiri tinoponeswa, riri simba ra Mwari.

¹⁹ Ngokuti kwakatahwa kuti: Ndinozoparaja ungwaru hwo vakangwara, no kuziva kwo vanoziva ndinozokurasa.

²⁰ Uri kwapi wakangwara? Uri kwapi mutari? Uri kwapi mupshakisisi wo zvo iyi nguva? Mwari aazivi kuzviita upenji here zvo ungwaru hweiyi nyika?

²¹ Ngokuti kwechivoneka kuti nyika, ngo kungwara kwa Mwari, aizivi kuziva Mwari ngo ungwaru hwayo, kwakamudakajisa Mwari, ngo upenji hwo kuchumayira kuponesa avo vanotenda.

²² Kwechivoneka kuti vaJudha vanokumbira chivoniso, no vagiriki vanopshaka ungwaru.

²³ Asi isisu tinochumaira Kristu wakakohomehwa, kuno vaJudha chiri chikhugunyiso, no kuno vo majinja chiri upenji.

²⁴ Asi kwavari vakadanijwa, vese vaJudha no vagiriki, Kristu uri simba ra Mwari, no ungwaru hwa Mwari.

²⁵ Ngokuti upenji hwa Mwari hwakapinda kungwara kuno vandhu; no kurembejeka kwa Mwari kwapinda kugwinya kuna vandhu.

²⁶ Ngokuti ringiranyi kudanijwa kwenyu, hama, kuti akuna vazhinji vari vakangwara ngo kwenyama, akuna vazhinji vane simba, akuna vazhinji vanoreremejwa vanodanijwa.

²⁷ Asi Mwari wakatsanangura zviro zvo upenji zvo nyika, kuti apsheruje avo vari vakangwara, zve, Mwari wakatsanangura zviro zvakarembejeka zvo nyika kuti apsheruje zvino simba;

²⁸ na Mwari wakatsanangura zviri pasi no zvinoshohwa mu nyika, pikija no zviro zvisipo, kuyita kuti zviripo zviite zvisina shwiro.

²⁹ Kuti kusazovapo nyama inojikuja pamberi pa Mwari.

³⁰ Asi imwimwi muri kuna Kristu Jesu, ndiye uwo wakaitwa kwetiri ungwaru hunobva kuna Mwari, no kururama, no kucheneswa, no kuripirwa:

³¹ Kuti kudari ngo zvakatahwa, Iye unoganza, ngaaganze ndi Jehovha.