1 Tim. 6 - NOVO TESTAMENTO EM NDAU

Varanda vari vatendi

¹ Vese varanda vari pasi po kanga ngavaverenge kuti majimambo avo anosisira kureremejwa kwese, kuti zina ra Mwari no zvijijiso zvisazotukwa.

² Naavo vano majimambo anotenda vasazoashora, ngokuti ari hama; asi pandauyo vanosisira kuashandira, ngokuti avo vanoashira kudetsehwa vari vatendi no vanodikana. Jijisa no kupanga izvi.

Zvijijiso zvo manyepo no upfumi wo gwinyiso

³ Kudari aripo mundhu unojijisa zvijijiso zvakaparajana, asikatendi mazwi ogwinyiso, a Mambo Jesu Kristu, no zvijijiso zvinozwana no kujijisa kwa Mwari,

⁴ uwo unojikuja, asikazivi chiro, asi unodisisa mubvunjo no hasha jo mazwi, kwo zviri kunobva ndurumwa no hasha, no kutuka, no mipinimijo yakashata,

⁵ no kukanijana pakati po vandhu vano mipinimijo yakashaishwa, vakarashikihwa ngo gwinyiso, vechikarakaja kuti kudira Mwari iri njira yo kuviyihwa.

⁶ Asi kudira Mwari pamwepo no kudakara kuri kuviyihwa kukurutu.

⁷ Ngokuti atizivi kuviya no chiro mu nyika muno, atingatori chiro kuendazve nacho;

⁸ asi kudari tine zvokuha no zvokufuka, kunosisira kuti tidakare ndizvo.

⁹ Asi avo vanodisisa kuyita maguruja vanozowa mukuejwa, no mumuravo no mukuemura kuzhinji kwo upenji kunoremaja, zvinondondomeja vandhu mukufa no mukurashwa.

¹⁰ Ngokuti kudisisa mare ndiyo miji yo mbewu jese jo kushata; ngokuti vamweni vechiida, vakapaukiswa kubva mukugonda, vakajibaya ngo matambujiko mazhinji.

Zvikonokejo zvo kupejisira

¹¹ Asi iwewe, mundhu wa Mwari, tiza izvi; utevere kururama, kudira Mwari, kugonda, rudo, kusengerera, kupfava.

¹² Ambana kuambana kwakanaka kwo kugonda, batisisa kupona kusikaperi kwo wakadanijihwa, wakatenda kutenda kwakanaka mukuvona kwo zvapupu zvizhinji.

¹³ Ndinokupanga mukuvona kwa Mwari, uwo unoraramisa zviro zvese, no mwa Kristu Jesu, uwo wakapupura kutenda kwakanaka pamberi pa Pontio Piratu;

¹⁴ kuti ungwarire mipango, usina vara, usikashoreki, mbhera kuvoneka kwa Mambo wedu Jesu Kristu.

¹⁵ Kwaachazovonisa ngo nguva kwayo, uwo ega Unesimba no muchena, Mambo wo majimambo, no mutongi wo vatongi;

¹⁶ uwo ega usikatongofi, unogara mukujeka kusikagumihwi; usikazivi kuvoneka ngo mundhu, aangavonekizve; kwaari ngakuvepo kureremejwa no simba, zvisikaperi, Ameni!

¹⁷ Panga avo vari vapfumi mu nyika muno kuti vasajikuja, nokuti kugonda upfumi husikagari, asi kuna Mwari, uwo unotipa kakurutu zvese kuti tidakare ndizvo;

¹⁸ kuti vayite zvakanaka, vayite vapfumi kumishando yakanaka, kuti vadakarire kupa vamweni, no kukovana;

¹⁹ vechijiunganijira ugaro hwakanaka hwo nguva inoviya, kuti vabatisise kupona ukwo kwo gwinyiso.

²⁰ Iwewe Timoti, ngwarira icho chakagondiswa kwouri, wechifuratira kuvereketa kusina shwiro, no kuramba kuziva zviri zvokunyepa;

²¹ ukwo kwakatendehwa ngo vamweni, vakapauka kubva mukugonda, nyasha ngajive newe.