1 Tim. 5 - NOVO TESTAMENTO EM NDAU

Shirikaji no vasharuka

¹ Usapangira musharuka ngo hasha, asi mupote kudari ndi baba; no majaha mapsha kudari ngo hama;

² no majimbiya kudari ngo majimayi no vanakaji vapsha kudari ngo hanzvaji, mukusukika kwese.

³ Reremeja shirikaji ijo jiri shirikaji ngo gwinyiso.

⁴ Asi kudari shirikaji ine vana nokuti vazukuru, ngavatange kupangijira kureremeja kune vo mbhuri yavo, no kupetuja zvakanaka kuvabari vavo; ngokuti ichi chinoashirika mukuvona kwa Mwari.

⁵ Zvino iye uri shirikaji ngo gwinyiso, ari ega echigonda kuna Mwari, unovangirira kupota no kukumbira usiku no masikati.

⁶ Asi uwo unojipira kwo zvinodakaja, wakafa achapona.

⁷ Panga izvi zviro, kuti vayite vasikashoreki.

⁸ Asi kudari aripo usikangwariri vake, kakurutu avo vo muzi wake, iye wakaramba kutenda, unopinda kushata kuno uwo usikatendi.

⁹ Usatendera kuti shirikaji itahwe zina isati yapeja makore ari makumi matandhatu; iri mukaji wo mwamuna umwe.

¹⁰ Ine mbiri yakanaka yo mishando yakanaka; kudari yakarera vana, kudari yakaashira vapfumba, kudari yakasuka tshoka jo vakacheneswa, kudari yakabesera vanotambujika, kudari yakagwinya kubatirira kumishando yese yakanaka.

¹¹ Asi ramba shirikaji ipsha; ngokuti apo vapshapshana na Kristu, vanozorovohwa;

¹² vano ndava ngokuti vakaramba kutenda kwavo kwo kutanga.

¹³ Zve, vanojija kuyita nungo, vechipepesheka mu nyumba jese; asi vasikateveri kuyita nungo jega, asi kuyita chirevo, no kusikaregi zvo vamweni, vechivereketa zvisikasisiri.

¹⁴ Ndizvo ndinodisisa kuti shirikaji ipsha jirovohwe, jibereke vana jingwarire mizi yajo, jisikapi bandu ndau yo kutuka ndiyo.

¹⁵ Ngokuti vamwe vatopauka kutevera Sathani.

¹⁶ Kudari aripo mutendi une shirikaji ngaajibetsere, kuti chiara chisazoremehwa; kuti chibetsere avo vari shirikaji ngo gwinyiso.

Kureremeja vatungamiriri

¹⁷ Vakuru vanonasa kutungamirira ngavaverengwe kuti vanosisira kureremejwa kwakahwirijihwa, kakurutu avo vanoshanda mushando wo izwi no wo kujijisa.

¹⁸ Ngokuti matahwa anoti: “Usazofungira muromo wo n'ombe inopura mbewu.” Zve: “Mushandi unosisira musharo wake.”

¹⁹ Usatenda kuashira ndava inopomehwa kuno mundhu kumukuru, kwega apo kwechinangwa ngo zvapupu zviviri nokuti zvitatu.

²⁰ Avo vanoshaisha, uvarambije pamberi po vese, kuti vamweni navo vatye.

²¹ Ndinokupanga mukuvona kwa Mwari, no kwa Kristu Jesu, no ngirosi jakatsananguhwa, kuti ungwarire izvi usikatsananguri, usikaiti chiro ngo mutsananguro.

²² Usakasira kudira nyara panyezuru pomundhu, usaashijana no vandhu vamweni zvishaishi zvavo: Jingwarire kuti ugare wakasukika.

²³ Usamwazve kumwa yega, asi shandisa vhini shomanani ngo ndava yo ndani yako, no yo kuhwara kwako kuzhinji.

²⁴ Zvishaishi zvo vandhu vamweni zviri pambhene, zvinoenda mberi mukutongwa; no vamweni vandhu zvinovatevera ngosure.

²⁵ Ngokudaro iriyo mishando yakanaka iri pambhene; no iyo isikazivi kudaro ayingafishiki.