1 Tim. 4 - NOVO TESTAMENTO EM NDAU

Vajijisi vokunyepa

¹ Asi Mweya unonanga pambhene kuti ngo mikuvo yo kupejisira vamweni vanozopauka kubva mukugonda, vechipurukira kumweya inopaukisa, no zvijijiso zvo mabzoka.

² Ngo kujiitisa kwo vanovereketa mazwi omanyepo, vakapiswa mu mwoyo yavo, kudari ngo zvinoitwa ngo simbi inopisa.

³ Vechirambisa kurovora, no kurega zvokuha, zvaakasika Mwari kuti zviashihwe ngo kutenda ngaavo vanotenda no kuziva gwinyiso.

⁴ Ngokuti zvisikwa zvese zva Mwari zvakanaka, apana chinosisira kuregehwa, kudari chechiashihwa ngo kutenda:

⁵ Ngokuti chinocheneswa ngo izwi ra Mwari na ngo kukumbira.

Mushandi wakanaka wa Kristu Jesu

⁶ Kudari wechicherechejisa hama izvi, unozoyita mushandi wakanaka wa Kristu Jesu, wechikojwa ngo mazwi okugonda, no wo chijijiso chakanaka cho wakatevera mbhera zvino.

⁷ Asi ramba ngano jinopsheruja, no jo harahwa. Asi ujirovejese kudira Mwari.

⁸ Ngokuti kurovejera mumuviri kunobesera padoko; asi kudira Mwari kunobesera kuzviro zvese, muchigondiso cho kupona kwa zvino, no kunozoviya.

⁹ Rinogondeka izwi iri rinosisira kuashihwa kakurutu.

¹⁰ Ngokuti ngo iyi ndava tinotambujikira no kuhwajihwa, ngokuti gonda redu rakaemeswa kuna Mwari unopona, uri Muponesi wo vandhu vese, kakurutu wo avo vanotenda.

¹¹ Panga no kujijisa izvi.

¹² Usatendera mundhu kuti ashore upsha hwako; asi ita chivonero kwo vanotenda, ngo izwi, na ngo kupona kwako, na ngo rudo, ngo kugonda, na ngo kusukika.

¹³ Gara wechijija, no kupanga, no kujijisa mbhera ndiviye.

¹⁴ Usaregejera chipuwo icho chiri mukati mwako, cho wakapuwa ngo kuprofeta, ngo kudihwa kwo nyara jo vakuru.

¹⁵ Shingirira kune izvi; ujipire kakurutu kwozviri; kuti kubudirira kwako kuvoneke kwavari vese.

¹⁶ Ujingwarire, iwewe no kujijisa kwako. Vangirira kuyita izvi; ngokuti ngokuyita izvi unozojiponesa iwewe na avo vanokuzwa.