1 Tim. 3 - NOVO TESTAMENTO EM NDAU

Vatungamiriri vo chiara

¹ Izwi iri rinogondeka: Rokuti, kudari mundhu echipshaka mushando wo utungamiriri ukuru, unoemurira mushando wakanaka.

² Ndizvo kunosisira kuti mutungamiriri ayite usina ndava, ari mwamuna wo mukaji umwe, echijibata, wakangwara mumupinimijo, unoreremejeka, unoashira vapfumba, unoziva kujijisa;

³ usiri chiraja, usikaambani; asi wakapfava, usikaiti hasha, usikadisisi mare;

⁴ unonasa kutonga muzi wake, uno vana vake vanomupurutana ngokureremeja kwese;

⁵ (asi kudari mundhu asikakoni kutonga muzi wake, ungazoita mangwaririrenyi chiara cha Mwari?)

⁶ Asaita uchaamba kutenda, kuti, asajikuja no kuwa mukurashwa kwa dhiyabhorosi.

⁷ Zve kunodikana kuti ayite wo vanopupura zvakanaka ndiye avo vari kunja kuti asazowa mukushohwa no muravo wa Dhiabhorosi.

Vamweni vandhu mu mushando wo chiara

⁸ Ngokudaro vashandi vanosisira kuti vayite vanoreremejeka, vasina mazwi maviri, vasikanyanyi kumwa vhini, vasikakariri mare ine svina;

⁹ vechibata chakafishika cho kugonda ngo mupinimijo usina ndava.

¹⁰ Avo navo ngavatange kuejwa; ngosure vozoita vashandi, kuti vasikashoreki.

¹¹ Vanakaji ngokudaro ngavayite vanoreremejeka, vasikarevi, vanojibata, vanogondeka ngo zviro zvese.

¹² Vashandi ngavayite vano mukaji umwe vechinasa kutonga vana vavo no muzi yavo.

¹³ Ngokuti avo vakanasa kuyita vashandi vanopuwa zina rakareremejeka, no kuchunga kukurutu mukugonda kuri kuna Kristu Jesu.

Kufishika kwakakura mukugonda

¹⁴ Ndinotara izvi kwouri, ndechigonda kuviya kwouri ngokukasira;

¹⁵ asi kuti ndechinonoka mukuvo wakareba, ndinoda kuti muzive kufamba kunosisira kuitwa ngo vandhu mu nyumba ya Mwari, iyo iri chiara cha Mwari unopona no sika no njiki jo gwinyiso.

¹⁶ Kunotendehwa kuti chakafishika cho uMwari chikuru; iye wakapangijihwa mu muviri, echipembejwa mu mweya, wakavoneka ngo ngirosi, wakachumaihwa pakati po vo majinja, wakatendwa mu nyika, akaashihwa mu gore mu uthende.