1 Tim. 1 - NOVO TESTAMENTO EM NDAU

Muchungamijo

¹ Pauri, mupostori wa Kristu Jesu ngo kuemesa kwa Mwari Muponesi wedu, na Jesu Kristu, gonda redu,

² kuna Timoti, mwana wangu wo gwinyiso mukugonda; nyasha, no kukungurihwa, no kunyarara, ngazvive newe zvinova kuna Mwari Baba, na Kristu Jesu Mambo wedu.

Kurwa no zvijijiso zvo manyepo

³ Kudari ngo zvondakakupota kuti ugare Efesu, apo ndaiyenda Makedhoniya, kuti upange vamweni vakatikuti kuti vasajijisa kujijisa kumweni,

⁴ nokuti kupurutanazve kungano no kuverenguja kusikaperi kwo majibaba mukuru, izvo zvinoamba hasha, paugaro po kuvakiwa ndi Mwari mukugonda.

⁵ Asi kuzarisika kwo mupango kuri rudo runobva mu mwoyo wakacheneswa, runobva mu mipinimijo isina ndava, no kugonda kusikajiitisi.

⁶ Kubva kuno izvi vamweni vechipauka, vakapaukira kuenda mukuvereketa kusina shwiro;

⁷ vechidisisa kuyita vajijisi vo mipango, vasikazivi chovanonanga nokuti chovanonasa kugwinyisisa.

⁸ Asi tinoziva kuti mipango yakanaka, kudari mundhu echizoishandisa ngo njira kwayo,

⁹ echiziva ichi, kuti mipango aizivi kuitihwa mundhu wakarurama, asi yakaitihwa vasikateveji mipango no vasikapangwi, no vasikamudi Mwari no vashaishi, inoitihwa vasikazivi kucheneswa no vatuki, vanouraya majibaba no vanouraya majimayi, no vanouraya vandhu,

¹⁰ vanoomba, no vanoyita upombo, no vanoba vandhu, vanonyepa, no vanopika manyepo, nokuti kudari chiripo chimweni chinopesana no zvijijiso zvakarurama;

¹¹ kudari ngo vhangeri ro uthende hwa Mwari unomuchena, rondakapuwa ngo kugondwa.

Pauri unobonga Mwari

¹² Ndinobonga uwo wakandipa simba, ndi Jesu Kristu Mambo wedu, ngokuti wakandiverenga kuyita wakagondeka, akandiemesa kumushando wake;

¹³ pikija ngo pamberi ndayiva mutuki, no mutambuji, no unoshaishira; asi zvakanyadaro ndakakungurihwa, ngokuti ndakazviita ngo kusikaziva mukusikatendi;

¹⁴ no nyasha ja Mambo wedu jakawanjwa kakurutu pamwepo no kugonda no rudo ruri kuna Kristu Jesu.

¹⁵ Rinogondeka iri izwi, rinosisira kuashihwa: Rokuti Kristu Jesu wakaviya mu nyika kuponesa vashaishi, inini ndiri mukuru wavo.

¹⁶ Asi ngo iyi ndava ndakaitihwa nyasha, kuti Jesu Kristu apangijire kusengerera kwake kwese kwendiri, ndiri mukuru wo vashaishi, kuyita chivonero kwavari vanomutenda, kuti vawane kupona kusikaperi.

¹⁷ Zvino kuna Mambo usikaperi, usikavori, usikavoneki, uri Mwari ega, ngakuve kwaari uthende no kureremejwa mbhera narini. Ameni!

¹⁸ Uku kupanga ndinopa kwouri, mwana wangu Timoti, kudari ngo zvakaprofetwa ngo ndava yako karetu, kuti uambane kuambana kwakanaka,

¹⁹ wechibatisisa kugonda no mwoyo wakanaka; vamweni vakakurasha, vakapwanyikihwa ngo ngarava yo kugonda kwavo,

²⁰ pakati pavo vakadaro payiva na Humeniyo na Arixandreu, vendakapa kuna Sathani, kuti vajijiswe kusikatuki.