1 Pet. 3 - NOVO TESTAMENTO EM NDAU

Vakaji no vamuna

¹ Ngokudaro, imwimwi vakaji, pfaviranyi vamuna venyu, kuti kudari varipo vasikapurutani izwi, vangaongwa ngo njira yo vanopona ndiyo vakaji vavo, ngo kunja kwo izwi.

² Vechivona kupona kwenyu kwakachena pamwepo no kutya.

³ Avo kunemeswa kwavo kusazoita kunemeswa kwo kunja, kwo kuruka bvuji no kusimira zvinemeso zvo mukore, nokuti zvokusimira zvakanakisisa;

⁴ asi ngakuitwe kwo mundhu wakafishika wo mumwoyo, ngo zvinemeso zvisikavori zvo mweya wakapfava wakanyarara, ukwo kuno mutengo mukuru mukuvona kwa Mwari.

⁵ Ngokuti ngo kudarovo karetu vakaji vakacheneswa, avo vakagonda kuna Mwari vakajinemesa, vechipfavira vamuna vavo:

⁶ Kudari ndi Sara wakapurutana kuna Abrahama, echimudanija kuti mambo: Mwaavana vake zvino, kuti mwechiita zvakanaka, musikatyiswi pikija ngo chiri chiro chinokaruja.

Kutambujwa ngo kuyita zvakanaka

⁷ Ngokudaro, imwimwi vamuna, garanyi no vakaji venyu kudari ngo kuziva, mwechireremeja vakaji kudari ngo uri chijiyo chakarembaremba, kudarizve ngo vanogara ndhaka imweyo yo nyasha jo kupona; kuti mikumbiro yenyu isazophingaijwa.

⁸ Pakupejisira itanyi vanomupinimijo umwewo mwese, vanozwirana, idananyi kudari ngo hama, muno mwoyo ino nyasha, muno mipinimijo yakapfava.

⁹ Musikahwirijiri zvakashata ngo zvakashata, nokuti kutuka ngo kutukwa; asi paugaro po izvo, mudakajise; ngokuti mwakadanijwa kuno izvo kuti mugare ndhaka yo chidakajiso,

¹⁰ ngokuti, iye unozoda kupona, no kuvona mazuva akanaka, ngaarambije rurimi rwake kuno zvakashata, no muromo wake kuti usazovereketa kuchengeja.

¹¹ Ngaafuratire zvakashata, aite zvakanaka; ngaapshake kunyarara akutevere.

¹² Ngokuti majiso a Jehovha anoringira vakarurama, no njeve jake jinopurutana kukumbira kwavo; asi hope ya Jehova inorwa navo vanoyita zvakashata.

¹³ Ndianizve ungazomuita zvakashata kudari mwechitsamwirira kuno izvo zvakanaka?

¹⁴ Asi kudari mwechitambujika ngo ndava yo kururama, munomuchena: Musatyazve kutyisa kwavo, zve, musakakaseka;

¹⁵ asi chenesanyi Kristu mumwoyo yenyu aite Mambo: Mugare mwakanasirihwa kupingura mundhu wese unomubvunjisa ngo ndava yo gonda riri mukati mwenyu, asi mukuita ngo kupfava no kutya.

¹⁶ Muno mwoyo isina ndava; kuti kuno izvo zvo vanomureva ndizvo, vangapsherujwa avo vanotuka njira yenyu yakanaka yo kupona kuna Kristu.

¹⁷ Ngokuti kwakapinda kunaka, kudari kuri kuda kwa Mwari, kuti mutambujike ngo ndava yo kuyita zvakanaka, kuno kuti mutambujike ngo kuyita zvakashata.

¹⁸ Ngokuti Kristu wakatambujikavo kamwe ngo ndava yo zvishaishi, ari wakarurama ngo ndava yo vasikazivi kururama kuti ativiise kuna Mwari; wakaurawa munyama, asi wakararamiswa mu mweya;

¹⁹ mwourizve wakaenda, akachumaira kumweya yayiva muguniya,

²⁰ iyo ngo pamberi yayinga isikapurutani, apo Mwari ngo kusengerera wakavagarira ngo mazuva a Noa, apo ngarava yayinga ichanasirihwa, mukati mwayo vashomani, kunoti, vandhu vasere, vakaponeswa kubva ku kumwa.

²¹ No uwo muezaniso wo rubhapatiso, unomuponesa, andirwo runobvisa svina yo nyama, asi ruri mupinguro wo mwoyo isina ndava kuna Mwari, ngo kumuka kwa Jesu Kristu kwo vakafa.

²² Uwo uri ngo kumuho kwa Mwari, wakaenda mugore; ngirosi no vatongi no vano simba vanomupfavira.