1 Pet. 2 - NOVO TESTAMENTO EM NDAU

¹ Ndizvo mwechirasha kwese kushata no kuchengeja kwese, no kujiitisa, no ndurumwa, no kuvereketa kwese kwakashata.

² Kudari ngo chiya jichaamba kuberekwa disisanyi mukaka wo Mweya usina kuchengeja, kuti mukure ndiwo, muponeswe.

³ Kudari mwakaravira kuti Mambo uno nyasha.

Kristu buwe ro chikiro

⁴ Mwechiviya kwaari ari buwe rinopona, ngo gwinyiso rakarambwa ngo vandhu, asi rakasanwa ndi Mwari rino mutengo mukuru,

⁵ imwimwi muri mapuwe anopona, mwakavakiwa kuyita nyumba yo Mweya, kuyita upristi hwakachena kupira midiro yo Mweya, inoashirika kuna Mwari ndiye Jesu Kristu.

⁶ Ngokuti arimwo matahwa anoti: “Vona, ndinorajika mu Zioni buwe guru ro pakhona, rakasanwa, rino mutengo mukuru. No uwo unotenda kwaari aazopsherujwi.”

⁷ Ndizvo kwomuri imwimwi munotenda, unoreremejeka. Asi kwavari vasikatendi, buwe rakarambwa ngo vavaki ndiro rakaita buwe ro pakhona;

⁸ zve, ibuwe ro kukhugunyisa, no buwe ro kutsenekesa; avo vanokhugunwa ngo izwi, avapurutani. Kwovarizve vakakuemesehwa.

⁹ Asi imwimwi muri jinja rakasanwa, muri vo upristi hwo umambo, jinja rakachena muri vandhu vakajivonera, kuti mupangijire kunaka kwo uwo wakamudanija kubva muchidima, kuti munghwine mukujeka kwake kunoshamisa.

¹⁰ Imwimwi ngo mukuvo wakapinda mwayiva musiri jinja, asi zvino muri vandhu va Mwari: Avo vayinga vasikazivi kuwana nyasha, asi zvino mwawana nyasha.

Kureremeja vatungamiriri

¹¹ Vanodikana, ndinomupota, kudari ngo zvomuri zvigarandimo no vafambi, kuti murege kuyita kuemura kwo nyama kunorwa no mweya.

¹² Muve no kupona kwenyu kunosisira pakati po vomajinja; kuti kune izvo zvo vanomureva ndizvo, inga muri vakashata, ngo mishando yenyu yakanaka yo vanovona, vangakuja Mwari ngo zuva ro kufambihwa.

¹³ Pfaviranyi mipango yese yo vandhu ngo ndava ya Mambo. Pikija ngo ya mambo, uri mukuru;

¹⁴ nokuti kuvatongi, vakatumwa ndiye kuhwirijira vanoyita zvakashata no kuvakuja vanoyita zvakanaka.

¹⁵ Ngokuti ndikwo kuda kwa Mwari, kuti ngokuita zvakanaka munganyaraja kusikaziva kwo vandhu vano upenji.

¹⁶ Kudari ngo vandhu vakasununguka, musikashandisi kusununguka, kwenyu kuyita bhachi ro kuyita zvakashata, asi muite varanda va Mwari.

¹⁷ Reremejanyi vandhu vese, idanyi hama jese, mutyenyi Mwari, reremejanyi mambo.

Chivonero cho matambujiko a Kristu

¹⁸ Varanda pfaviranyi majimambo enyu ngokutya kwese; andikwopi kwavari vega vakanaka no vakapfava, asi kwavarizve vasikazivi kururama.

¹⁹ Ngokuti ichi chinoashirika, kuti mundhu ngo ndava yokuti ano mwoyo wakanaka, usina ndava kuna Mwari, ashingirire matambujiko, echitambujika pasina no ndava.

²⁰ Ngokuti mungakujwa ngo njirenyi, kudari mwechishaisha no kuchaiwa ngo ndava yakwo, munokusengerera? Asi apo mwechinasa, kudari mwechitambujika ngo ndava yakwo, mwechisengerera, ichi chinoashirika kuna Mwari.

²¹ Ngokuti mwakadanijihwa kuno izvi. Ngokuti Kristu wakatambujikiravo imwimwi, akamusiira chivonero cho kutevera muzvitsiko zvake:

²² Uwo usikazivi kushaisha, zve kuchengeja akuzivi kuvoneka mumuromo wake.

²³ Uwo apo atukwa, aazivi kutukavo; apo atambujwa, aazivi kutyisijira; asi wakajipira kwaari uwo unotonga ngo kururamisa.

²⁴ Uwo wakatwara zvishaishi zvedu pachake mumuviri wake panyezuru po muti, kuti isisu, tinofa mukushaisha, tipone mukururama; uwo ngo mavonje aakarohwa ndiwo mwakaponeswa,

²⁵ ngokuti mwayinga mwakarashika kudari ngo bvuta; asi zvino mwahwirira ku Muhavisi no Muvonisi wo mweya yenyu.