1 Joh. 5 - NOVO TESTAMENTO EM NDAU

Kugonda kunonyisa nyika

¹ Mundhu wese unotenda kuti Jesu uri Kristu, wakabahwa ndi Mwari, no mundhu wese unoda wakabara, unodazve mwana wakabahwa ndiye.

² Ngo ichi tinoziva kuti tinoda vana va Mwari: apo techida Mwari no kungwarira mipango yake.

³ Ngokuti urwu ndirwo rudo rwa Mwari: Kuti tingwarire mipango yake; no mipango yake airemi.

⁴ Ngokuti mundhu wese wakabahwa ndi Mwari unonyisa nyika; no uku ndikwo kunyisa kwakanyisa nyika, kuri kugonda kwedu.

⁵ Ndiyani uwo unonyisa nyika kwega uwo unotenda kuti Jesu uri Mwana wa Mwari?

Ndiyani Jesu Kristu

⁶ Uwu ndiye wakaviya ngo kumwa no ngazi, ndi Jesu Kristu, aazivi kuviya ngo kumwa yega, asi ngo kumwa na ngo ngazi. Mweya ndiwo unopupura, ngokuti Mweya uri gwinyiso.

⁷ Ngokuti varipo vatatu vanopupura.

⁸ Ndi Mweya, no kumwa, no ngazi, naavo vatatu vanotenderana chiro chimwe.

⁹ Kudari techiashira uchapupu hwo vandhu, chapupu cha Mwari chakapinda kukura, ngokuti ichi ndicho chapupu cha Mwari chaakapupura ndicho ngo ndava yo Mwana wake.

¹⁰ Iye unotenda Mwana wa Mwari uno uchapupu mukati mwake. Iye usikatendi Mwana wa Mwari unomuita munyepi, ngokuti aazivi kutenda uchapupu hwakapupuhwa ndi Mwari ngo ndava yo Mwana wake.

¹¹ No uwu ndihwo uchapupu: Kuti Mwari wakapa kwetiri kupona kusikaperi, no ukwo kupona kuri ku Mwana wake.

¹² Iye uno Mwana uno kupona; no uwo usina Mwana wa Mwari, aana kupona.

Kupona kusikaperi

¹³ Izvi zviro ndazvitarira kwomuri kuti muzive kuti munakwo kupona kusikaperi, imwimwi munotenda zina ro Mwana wa Mwari.

¹⁴ Ndikwo kushinga kwo tinakwo kwaari, kuti techikumbira chiro pikija ngochiri ngo kuda kwake, iye unotizwa.

¹⁵ Nokudari techiziva kuti unotizwa, ngo icho chetinokumbira, tinoziva kuti taanacho chetakakumbira kwaari.

¹⁶ Kudari mundhu echivona hama yake echiita chishaishi chisiri cho kufa, iye unozokumbira, na Mwari unozomupa kupona, kunopuwa vasikaiti chishaishi cho kufa. Chiripo chishaishi cho kufa, ngo ichi andinangi kuti akumbire ngo ndava yacho.

¹⁷ Kwese kusikarurami kuri kushaisha, kuripozve kushaisha kusiri kwo kufa.

¹⁸ Tinoziva kuti mundhu wese wakabahwa ndi Mwari aashaishi, ngokuti wakabahwa ndi Mwari unongwarihwa ndiye, no uwo wakashata aamupshasi.

¹⁹ Tinoziva kuti tiri va Mwari, no nyika yese inogara pasi po simba ro uwo wakashata.

²⁰ Nesu tinoziva kuti Mwana wa Mwari wakaviya, akatipa kuzwisisa kuti tizive uwo uno gwinyiso. Nesu tiri mukati mwo uwo uri gwinyiso, mukati mwo Mwana wake Jesu Kristu. Uwu ndiye Mwari wo gwinyiso, no kupona kusikaperi.

²¹ Vana vadoko, jingwarirenyi kubva kumiezaniso yo kudira.