1 Joh. 4 - NOVO TESTAMENTO EM NDAU

Mweya wa Mwari no mweya wo bandu ra Kristu

¹ Vanodikana, musatenda mweya yese, asi ejanyi mweya muvone kuti iri ya Mwari here, ngokuti vaprofeti vazhinji vokunyepa vakabuda kuenda mu nyika.

² Ngo ichi munoziva mweya wa Mwari: Mweya wese unotenda kuti Jesu Kristu wakaviya mu nyama, ngo wa Mwari,

³ no mweya wese usikatendi Jesu, auri wa Mwari akadi; no uwo ndiwo mweya wo bandu ra Kristu, wo mwakazwa kuti unoviya nazvino waamunyika.

⁴ Imwimwi muri va Mwari, vana vadoko, mwakavanyisa, ngokuti uri mukati mwenyu wakakura kupinda uri mu nyika.

⁵ Ivo ngo vonyika. Ndizvo vanovereketa ngo zvo nyika, no nyika inovazwa.

⁶ Isisu tiri va Mwari; uwo unomuziva Mwari, unotizwa, no uwo usiri wa Mwari aatizwi; ngo ichi tinoziva mweya wo gwinyiso no mweya wo manyepo.

Mwari uri Rudo

⁷ Vanodikana, ngatidane ngokuti rudo runobva kuna Mwari, no mundhu wese uno rudo, wakabahwa ndi Mwari unomuziva Mwari.

⁸ Uwo usina rudo aamuzivi Mwari, ngokuti Mwari uri rudo.

⁹ Rudo rwa Mwari rwakapangijihwa kwetiri ngo ichi; kuti Mwari wakatuma Mwana wake mu nyika wakabahwa ari ega kuti tiponeswe ndiye.

¹⁰ Rudo ruri mune ichi, andikwopi kuti isisu takamuda Mwari, asi kuti iye wakatida isisu, akatuma Mwana wake kuti aite muripiri wo zvishaishi zvedu.

¹¹ Vanodikana, kudari Mwari wakatida kudaro, kunodikana kuti isisu tidane.

¹² Akuna mundhu wakambovona Mwari pikija ngouri mukuvo: Kudari techidana, Mwari unogara mukati mwedu no rudo rwake runoita rwakaperera mukati mwedu.

¹³ Ngo ichi tinoziva kuti tinogara mukati mwake, naye unogara mukati mwedu, ngokuti wakatipa Mweya wake.

¹⁴ Nesu takavona, tinopupurazve kuti Baba vakatuma Mwana kuti aite muponesi wo nyika.

¹⁵ Pikija ndiyani unotenda kuti Jesu uri Mwana wa Mwari, Mwari unogara mukati mwake, naye unogara mukati mwa Mwari.

¹⁶ Nesu tinoziva, takatenda rudo rwaanarwo Mwari kwetiri. Mwari uri rudo, no uwo unogara murudo unogara mukati mwa Mwari, na Mwari unogara mukati mwake.

¹⁷ Ngo ichi rudo runoita rwakaperera kwetiri, kuti tive no kushinga ngo zuva ro kutongwa, ngokuti kudari ngo zvaari ndizvo iye, nesu takadarovo mu nyika muno.

¹⁸ Amuna kutya murudo, asi rudo rwakaperera runogogomera kutya, ngo kuti kutya kuna maharura, asi uwo unotya aazivi kuperera murudo.

¹⁹ Tino rudo ngokuti iye wakatanga kuva no rudo kwetiri.

²⁰ Kudari aripo mundhu unoti: Ndinomuda Mwari, naye echinyenya hama yake, uri munyepi; ngokuti uwo usina rudo kuna hama yake yaanovona, aangavi no rudo kuna Mwari waasikazivi kumbovona!

²¹ No uwu ndiwo mupango wotinawo kubva kwaari, kuti uwo unomuda Mwari, ngaavezve no rudo kuno hama yake.