1 Joh. 3 - NOVO TESTAMENTO EM NDAU

Vana va Mwari

¹ Vonanyi kukura kwo rudo rwaakatipa Baba kuti tidanijwe kuti tiri vana va Mwari, nesu tiri vakadaro. Ngo iyi ndava nyika aitizivi, ngokuti aizivi kumuziva.

² Vanodikana, zvino tiri vana va Mwari, akusati kwavoniswa kuti tinozova vakadini. Asi tinoziva kuti apo iye opangijihwa tinozodari ndiye, ngokuti tinozomuvona kudari ngo zvaari ndizvo.

³ Mundhu wese uno iri gonda mukati mwake unojichenesa, kudari ndiye wakachena.

⁴ Mundhu wese unoyita zvishaishi unogura mipango, ngokuti chishaishi chiri kugura mipango.

⁵ Nemwi munoziva kuti iye wakapangijihwa kuti abvise zvishaishi zvedu no mukati mwake amuna kushaisha.

⁶ Mundhu wese unogara mukati mwake aashaishi, uwo unoshaisha aazivi kumuvona, nokuti kumuziva.

⁷ Vana vadoko, musatendera mundhu kuti amupaukise. Iye unoyita zvakarurama uri wakarurama kudari ndiye uri wakarurama.

⁸ Iye unoyita kushaisha uri wa Dhiabhorosi, ngokuti Dhiabhorosi unondoshaisha kubvira pakutanga. Ngo iyi ndava, Mwana wa Mwari wakapangijihwa kuti aparaje mishando ya Dhiabhorosi.

⁹ Mundhu wese wakabahwa ndi Mwari aashaishi, ngokuti mbewu yake inogara mukati mwake, aangashaishi ngokuti wakabahwa ndi Mwari.

¹⁰ Ngo ichi vana va Mwari, no va Dhiabhorosi vanovoneka. Mundhu wese usikaiti zvakarurama aari wa Mwari akadi, no uwozve usikadi hama yake.

Rudo pakati po vakristu

¹¹ Ngokuti iri ndiro soko ro mwakazwa kubvira pakutanga, rokuti tidane.

¹² Tisikadari ndi Kheni, uwo wayiva wakashata, akauraya munukuna wake. Wakamuurairenyi? Ngokuti mishando yake yayinga yakashata, no yo munukuna wake yayinga yakarurama.

¹³ Musashama, hama kuti nyika yechimunyenya.

¹⁴ Tinoziva kuti takabva mukufa kuenda mukupona, ngokuti tino rudo ku hama. Iye usina rudo unogara mukufa.

¹⁵ Mundhu wese unonyenya hama yake uri muurayi, nemwi munoziva kuti akuna muurayi uno kupona kusikaperi kunogara mukati mwake.

¹⁶ Ngo ichi tinoziva rudo, ngokuti iye ngo ndava yedu wakadira pasi kupona kwake: Nesu kunodikana kuti tidire pasi kupona kwedu ngo ndava yo hama.

¹⁷ Asi uwo uno upfumi hwo mu nyika, naye echivona hama yake iri mukutama, echikonyera nyasha jake kwaari, rudo rwa Mwari rungaita magarirenyi mukati mwake?

¹⁸ Vana vadoko, tisada ngo izwi, nokuti ngo rurimi, asi ngo zviito na ngo gwinyiso.

Kugonda kuna Mwari

¹⁹ Ngo ichi tinoziva kuti tiri vo gwinyiso, zve, nokuti tinozogwinyisa mwoyo yedu pamberi pake,

²⁰ kudari mwoyo yedu yechitiitira ndava, Mwari uri mukuru kuno mwoyo yedu, naye unoziva zviro zvese.

²¹ Vanodikana kudari mwoyo yedu isikatiitiri ndava, tinokushinga kuna Mwari.

²² Pikija chinyi chetinokumbira kwaari tinochiashira, ngokuti tinongwarira mipango yake, nokuita izvo zvinomudakajisa mukuvona kwake.

²³ No ichi chiri mupango wake, kuti titende zina ro Mwana wake Jesu Kristu, nokuva no rudo umwe kuno umweni kudari ngo zvaakatipanga.

²⁴ No uwo unongwarira mipango yake unogara mukati mwake, nayezve mukati mwake. Ngo ichi tinoziva kuti iye unogara mukati mwedu, ngo Mweya uwo waakatipa.