1 Joh. 2 - NOVO TESTAMENTO EM NDAU

Kristu Muvhikiri wedu

¹ Vana vangu vadodoko, ndinotarira kwomuri izvi zviro kuti musashaisha; kudari aripo mundhu unoshaisha tina muimiriri kuna Baba, Jesu Kristu wakarurama.

² No uwu ndiye muripiri wo zvishaishi zvedu, haiwa wo zvedu zvega, asi no wo nyika yese nayo.

³ Ngo ichi tinoziva kuti tinomuziva, kudari techingwarira mipango yake.

⁴ Iye unoti: Ndinomuziva, asikangwariri mipango yake, uri munyepi, no gwinyiso amuna akadi mukati mwake,

⁵ asi pikija ndiyani unongwarira izwi rake, ngo gwinyiso rudo rwa Mwari rwakaperera mukati mwake; ngo ichi tinoziva kuti tiri mukati mwake.

⁶ Iye unoti unogara mukati mwake kunodikana kuti afambevo kudari ngo zvaakafamba.

Mupango mupsha

⁷ Vanodikana, anditari mupango mupsha kwomuri, asi ndinotara mupango wokaretu, wo mwayiva nawo kubvira pakutanga. Uwo mupango wokaretu ndiwo uri izwi romakazwa.

⁸ Zve, mupango mupsha ndinoutara kwomuri, uri wo gwinyiso mukati mwake, no mukati mwenyu. Ngokuti chidima chapinda, no kujeka kwo gwinyiso kunojeka nazvino.

⁹ Iye unoti kuti uri mukujeka, echinyenya hama yake, uchiri muchidima mbhera nazvino.

¹⁰ Iye unoida hama yake, unogara mu kujeka, amuna chikhugunyiso mukati mwake.

¹¹ Asi uwo unonyenya hama yake uri muchidima, unofamba muchidima asikazivi paanoenda, ngokuti chidima chakafukija majiso ake.

¹² Ndinotarira kwomuri, vana vadoko, ngokuti zvishaishi zvenyu zvakaregerehwa ngo ndava yo zina rake.

¹³ Ndinomutarira majibaba ngokuti munoziva uwo wayivapo kubvira pokutanga. Ndinomutarira majaha, ngokuti mwakamunyisa uwo wakashata. Ndinomutarira vana vadoko, ngokuti munovaziva Baba.

¹⁴ Ndamutarira majibaba, ngokuti mwamuziva uwo wayivapo kubvira pokutanga. Ndamutarira majaha ngokuti mune simba, no izwi ra Mwari rinogara mukati mwenyu, nemwi mwakanyisa uwo wakashata.

¹⁵ Musada nyika nokuti zviro zviri mukati mwo nyika. Kudari aripo unoda nyika, rudo rwa Baba amuna mukati mwake.

¹⁶ Ngokuti zvese zviri mu nyika, kuemura kwo nyama, no kuemura kwo majiso, no kujikuja kwo kupona, azviri zva Baba akadi, asi zviri zvo nyika.

¹⁷ No nyika inopinda, no kuemura kwayo: Asi iye unoyita kuda kwa Mwari unondogara mbhera narini.

Bandu ra Kristu

¹⁸ Vana vadoko, iri nguva yo kugumisira, no kudari ngo zvo mwakazwa kuti bandu ra Kristu rinoviya, na zvino aavapo mapandu akawanda a Kristu, ngo izvi tinoziva kuti iri nguva yo kugumisira.

¹⁹ Vakabva kwetiri, asi avasayiva vedu akadi; ngokuti kudari vayiva vedu, vangadari vayigara nesu, asi vakabva, kwetiri kuti kupangijihwe kuti vese avasayiva vedu akadi.

²⁰ Nemwi munokuzojwa kunobva kuno Uwo Wakachena, munoziva zvese.

²¹ Andizivi kutara kwomuri ngokuti amuzivi gwinyiso, asi ngokuti munoriziva, ngokutizve akuna nyepo rinobva mu gwinyiso.

²² Ndiyani uri munyepi, asi iye unokanija kuti Jesu andiyepi Kristu? Uwu ndiye uri bandu ra Kristu, unokanija Baba no Mwana.

²³ Pikija ndiyani unoramba Mwana, aanazve Baba; iye unotenda Mwana unaezve Baba.

²⁴ Asi icho cho mwakazwa kubvira pakutanga ngachigare nemwi. Kudari icho chemwakazwa kubvira pakutanga chechigara mukati mwenyu, imwimwizve munozogara mukati mwo Mwana, no mukati mwa Baba.

²⁵ No ichi ndicho chigondiso chaakatigondisa, chiri kupona kusikaperi.

²⁶ Ndinotara ichi kwomuri ngo ndava yo avo vanomupaukisa.

²⁷ Asi kuzojwa kwo mwakaashira kwaari kunogara mukati mwenyu, amutami kuti mundhu amujijise; asi kudari ngo kuzoja kwake kunomujijisa ngo zviro zvese, kuri gwinyiso, akuri kunyepa akadi, kudari ngo zvo mwakajijiswa, munogara mukati mwake.

²⁸ Zvino, vana vadoko, garanyi mukati mwake, kuti apo iye echizopangijihwa, isisu tingava no kushinga, tisikapsheruki pamberi pake mukuviya kwake.

²⁹ Kudari mwechiziva kuti iye wakarurama, munozivazve kuti vese vanoyita zvakarurama vakabahwa ndiye.