Genesis 40 - Jesus Isht Anno̱pa Mark i̱ Holisso

Genesis 40 NOSÍKA YÓMIKAT NANAHO̲ MAKA̲CHI KA̲ JOSEPH AT ANNO̲LIH

¹ Atoko̱ Joseph at atallakchi fo̱kka mómaka̱, Egypt i̱ mi̱ko i̱ to̱ksali toklokat nána kano̱ mihchit oklah ho̱ mi̱ko yat ikachokmánottók. Tokloh pat, pa̱ki okchi homi i̱takli alhíha i̱ noshkoboka okmat ano̱ti paska im ikbi alhíha i̱ noshkoboka attók.

^2-3 Hihmat toklohma̱ i̱ nokówahmat, Joseph at atallakchi binilih ma̱ maki̱liho̱ pit iba fokkittók.

⁴ Hikma̱ ano̱ti mi̱ko i̱ chokka apisachi alhíha i̱ noshkoboka mat, Joseph at tokloh ma̱ apisa̱chit ishta̱yachi̱ho̱ atokolittók. Tokloh mat atallakchi chi̱yana hopakittók.

⁵ Hitokósh ninak achaffah ma̱ mi̱ko i̱ to̱ksali, pa̱ki okchi homi i̱takli ma̱ hicha paska imikbi mat achaffa bi̱ka nosíkat oklattók. Nosíka yat nánaho̱ maká chi kat ittimila bi̱ka nosikattók.

⁶ Makátoko̱ Joseph at onnahi̱lima̱ im óna cha pisahmat, tokloh ma̱ nánah ókato ataklama kaniya ka̱ akostiníchittók.

⁷ Hicha i̱ ponaklohmat, “Na̱tah isht hachi átaklama átoko?” im áchittók.

⁸ Hattak toklohmat i̱ makáchit oklahmat, “Ninak ásh pi nosíka bi̱katok. Hitokako̱ nánaho̱ makáchi ka̱ pim ano̱la hinakat ikshoh,” áchittók. Hihókako̱ Joseph at i̱ makachihmat, “Chihówa ak illa kakósh nosíka ya̱ nánaho̱ makáchi ka̱, ano̱li atókoli hi̱nah kiyo̱. Nánaho̱ hachi nosíká tokmat amano̱lih,” im áchittók.

^9-10 Hina pa̱ki okchi homi takli áshosh Joseph im ano̱lihmat, “Sa nósikahmat pa̱ki api at sa tikba hiki̱yah pisálitok. Hikma̱ pa̱ki api ma̱ naksis tohchínah ósh áyoffotok. Hihma̱ hashtap (leaves) at ayoffotok. Ano̱ti pa̱ki api at paka̱litok. Hihma̱ ano̱ti pa̱ki yat offot nona táhah (ripened) amahwátok.

¹¹ Hihma̱ mi̱ko im áyishko ho̱klit hiki̱yalitok, hitokósh pa̱ki yásh ishílihmat, okchi áyishit im áyishko anílicha imálitok,” im áchittók.

¹² Joseph at i̱ makahmat, “Nosíka mat ilappako̱ makáchih. Naksis tohchínah mat nittak tohchína o̱ isht alhpissah ókih.

¹³ Nittak tohchínakma̱ mi̱ko yat átallakchi ya̱ chikochi cha to̱ksali ish hikíya kásh falammi̱t chi hílicháchi̱h ókih. Hikma̱ mi̱ko ya̱ pa̱ki okchi homi ish i̱táha̱kli tókat ish míhi̱chih mómáchi̱h ókih.

¹⁴ Nán achokma pat chiyá yohmikmat, issakkánáchikih. A̲ka̱na cha mi̱ko ya̱ issami im ano̱polá chikih, makokma̱ kohchalá hi̱nah.

¹⁵ Hebrew alhíha i̱ yakni attali átokak oklah sa ho̱kopáttók. Hicha Egypt ilappak máko̱ ná kanihmilítok kiyoh ókak o̱ átallakchi ilappa̱ sa fokki ná binnílilih,” im áchittók.

¹⁶ Hihma̱ mi̱ko paska im ikbi i̱ noshkobóka yat nosíka mat nánaho̱ makáchi ká Joseph at achokma ho̱ ano̱lika̱ haklohmat i̱ makáchihmat, “Anák kiyá sa nósikahmat, taposhshik tohchínah o̱ paska yat a̱lhtoh ósh sa noshkobo o̱talohma̱yah amahwátok.

¹⁷ Taposhshik paknaka fihna tala̱yah ma̱ paska ilayyoka lawa kat a̱lhtottók. Paska mat mi̱ko iláp attók. Hitokako̱ hoshi yat oklah áyapah ósh ma̱yah amahwátok,” im áchittók.

¹⁸ Joseph at i̱makahmat, “Nosíka pat ilappako̱ makáchih. Taposhshik tohchínah  mat nittak tohchínah o̱ isht alhpissah ókih.

¹⁹ Hikma̱ nittak tohchínakma̱, mi̱ko yat chinoshkobo tabláchi̱ hicha chi haknip a̱ iti takácháchi̱h. Hikma̱ hoshi yat chinnipi oklah ápáchi̱h,” im áchittók.

²⁰ Hitoko̱ Joseph at nánoka tóka̱ yohmittók. Nittak tohchinahm, mi̱ko at im afammihmat i̱pah chito apísattók. Hicha i̱ to̱ksali i̱ nokshobóka alhíha mo̱maka̱ ittibá i̱páchi̱h o̱ hoyottók. Hihmat paska imikbi i̱noshkobóka hicha pa̱ki okchi homi i̱takli i̱ noshkobóka pit hoyotok átallakchi chi̱yatoko̱.

²¹ Hicha pa̱ki okchi homi i̱taklimano̱ falammi̱t im áto̱ksalí hilíchittók. Hihma̱ pa̱ki okchi homi i̱táha̱klih mo̱mattók.

²² Hihókakósh paska imikbi átok yammano̱ abittók. Hitokóka̱ nánah ósh yohmáchi̱ho̱ Joseph at makátoka̱ mak fihna yohmittók.

²³ Hikako̱ Joseph at nán imasilhlha toka̱ pa̱ki okchi homi i̱takli mat imiyaksittók.