YUDA 1 - Chasu New Testament 1967

Ngezya

¹ Yuda mzoro wakwe Yesu Kristo, mjinawe Yakobo, Ha vala veitangwe, vekundiwe he Mrungu Vava, na kurindwa he Yesu Kristo.

² Muongejijwe mbonea na mporere na lukundo.

Machundwe vuntu vwa vacheji va mongo na miikarire mivivi

³ Vakunde, aho nekikundija mno kumuandikia mburi ya lukanio e lwetu uswi vose, nevonie iti kinitara kumuandikia nesa nimuchunde iti mulwanie uo mwitikijo vezerire veinkiwe kantu kamwe.

⁴ Ambu hena vantu vekuingije kimpiso, vantu veandikiwe mlaho uo too kae; varamdaa Mrungu, veghosha mbonea ya Mrungu wetu mhelele, kangi vemkana ula Mwenye ere mmwe na Mfumwa wetu Yesu Kristo.

⁵ Kangi nienda kumukumbusha nziaho mwakenja kumanya ivi vyose, iti Mfumwa ekinavakombole vantu he isanga la Misri, uko nyuma avabunta vala vesiitikije.

⁶ Hata vamalaika vesirindie kifumwa chavo venye, mira vakashigha kikalo chavo chevatara, akavavika he kichungo cha kae na kae he kija, vainde ula msi m’baha wa milaho.

⁷ Hata sa vuntu Sodoma na Gomora, na ila mizi yekiho hafuhi nayo, yekirashinda sayo, vakaratera vintu vya kimwiri, esi vya kifumo, vakabighwa kwa kushotwa na moto wa kae na kae, kioke nkumbu he uswi.

⁸ Nirehuvo, hata ava he kuota kwavo, vegera mwiri ikwe, vesua kutetiwa, verara vyezerire.

⁹ Mira Mikaeli, malaika m’baha, ekikanana na Shetani na kukerirana nkani naye vuntu vwa kimba chakwe Mose, teidime kumsitaka na kumlaha, mira etie: “Mfumwa nakubohie.”

¹⁰ Mira vantu avo verara vila vesivimanyije, na vila vevimanyije kwa miri yavo, vekukonda navyo sa nyama jesichee.

¹¹ Vwasi vwavo! ambu vetongia he nzia yakwe Kaini, na kuratera iteshanyo lakwe Bileamu esikukindie he kuenda mhako navo vebuntiwe he lubero lwakwe Kora.

¹² Vantu ava ni madamaro ena mpwasi he mbao jenyu ja lukundo vekila mbao hamwe na unywi, verakulira vesina fole; ni majumbi esina mpombe etikwa ni nkungu; ni miti yekukuntike yesina ntunda, yefwie kantu keri, kangi yeng’olilwe pere;

¹³ ni maimbi a bahari esikindika; efunya vya soni javo venye sa maufo, ni ntondo jevecha; evo luvanzo lwavo vevikiiwe e kile kija kibaha cha kae na kae.

¹⁴ Hata Enoki mntu wa kafungate ezie nyuma he Adamu, efunyije kiteto cha vuroti he avo, ekiti, “Rereha Mfumwa eza na vezerire vakwe, viku na viku,

¹⁵ nesa alahe vantu vose na kubigha vose vala vesimfoleka Mrungu, vuntu vwa ndima javo jose ja mitongire yavo he kusamfoleka Mrungu, na vuntu vwa vila viteto vizinya vyose vyetetiwe ni vala venye mabanu vesimfoleka Mrungu, vevitetie heye.

¹⁶ Vantu ava ni vazadengereta, kangi ni vareiagha, veanga he tama javo, kangi myomo yavo iteta viteto vibaha mno vya kukubaa, vekisomboa vantu vena vubaha vuntu vwa lumazo.

¹⁷ Mira unywi vakunde, kumbukani viteto vyetetiwe kae ni ntume va Mfumwa wetu Yesu Kristo,

¹⁸ kuti vekimuvwirire iti igheri la mkengelejo heneketa vantu vazasola vekiratera tama javo venye ja kuteka.

¹⁹ Vantu avo nivo veete misopano, ni va kiili isanga du, tevemna Mpeho.

²⁰ Mira unywi, vakunde, mwekikujenga wanga he mwitikijo wenyu weelishe, na kuomba he Mpeho Wedi,

²¹ kurindeni muikae he lukundo lwa Mrungu, mwekiinda mbonea ya Mfumwa wetu Yesu Kristo, mhaka muvone nkalamo ya kae na kae.

²² Vavoneieni vangi veganganya,

²³ kangi va kumwe vakijeni mwekivapekula hena moto; va kumwe vavoneieni he fole, mwekivihiwa hata ni suke yegerirwe ikwe ni mwiri.

²⁴ Ula eidima kumurinda musikwangwale, na kumuimukija mozya ya ngazo yakwe mwesina madamaro he kuizihirwa kubaha;

²⁵ Ye e Mrungu ereye du, Mkija wetu he Yesu Kristo Mfumwa wetu: Ngazo ni yakwe, na vubaha, na nzinya, na nguju, too kae na iki, mhaka kae na kae. Amen.