YOHANE 8 - Chasu New Testament 1967

¹ Yesu naye akatonga he ntuvi ya Mizeituni.

² Chaheyavo hekinache akaingia wa he nyumba ya mtaso, vantu vose vakamswia, naye akaikaa si na kuvacheja.

³ Vaandiki na Vafarisayo vakamwetie mche egurirwe ekishinda, vakamvika aho ghati.

⁴ Vakamti, “Mcheji, mche uu egurirwe hala ekishinda.

⁵ He myomongwa, vache sa ava Mose etuazere kuvabigha mabwe; we nawe uti ze?”

⁶ Navo vetetie huvo kwa kumghesha, nesa vavone cha kumrengekia. Mira Yesu akakodeka akaandika hala si na kichaa chakwe.

⁷ Vekizika kumvwijisha, akavusha meso, akavati, “Ula esina mabanu ghati henyu navoke kumvirita ibwe.”

⁸ Akakodeka kangi, akaandika hala si na kichaa chakwe.

⁹ Navo vekinasikie, madunganyo avo akavalaha, vakafuma mmwe mmwe, kuvokia vaghosi mhaka wakukenjija; Yesu akashighwa ye mwenye, na ula mche eimuke hala ghati.

¹⁰ Yesu akarongeka, asivone mntu ungi esire ula mche, akamti, “We mche, vala vekusitaka veohi? Tehena ekulahie iti una nzune?”

¹¹ Akamti, “Mfumwa, tehena.” Yesu akamti, “Nami sikakulahe; kutongire, mira usironge mabanu kangi.”]

Kianga cha si ii

¹² Niho Yesu akavavwira kangi akati, “Mi nimi kianga cha si ii, ye eniratera tekatonge he kija narini, mira eneketa kianga cha nkalamo.”

¹³ Niho Vafarisayo vakamti, “We ukutetia vuonwa mwenye; vuonwa vwako si vwa idi.”

¹⁴ Yesu akagharusha, akavati, “Mi nziaho nikutetia vuonwa mwenye, vuonwa vwangu ni vwa idi; ambu nemanyije hantu nefuma na hantu netonga; mira unywi temumanyije hantu nefuma neri hantu netonga.

¹⁵ Unywi mulaha kuraterija vya kimwiri; mi silaha mntu.

¹⁶ Nami kakicha nalaha, mlaho wangu ni wa idi; ambu mi simi mwenye, mira nimi hamwe na ula enitumie.

¹⁷ Kangi he myomo yenyu heandikwe iti, Vuonwa vwa vantu veri ni vwa idi.

¹⁸ Mi nimi nekutetia vuonwa mwenye, ne Vava enitumie enitetia vuonwa.”

¹⁹ Niho vakamti, “Vaveo eohi?” Yesu akagharusha, “Mi temunimanyije, neri Vava wangu temummanyije; nanga mwekinimanyije mi, mwekirammanya ne Vava wangu.”

²⁰ Viteto ivyo evitetie aho ekicheja he nyumba ya mtaso, he sanduku ya ndungu; neri tehena mntu emgurire, ambu saa yakwe yasanafika.

Machundwe a mlaho weneza

²¹ Niho akavavwira wa “Mi nitonga, na unywi munenienda; na unywi munefwia he mabanu enyu; hantu mi netonga unywi temuidima kuza.”

²² Vayuda vakati, “Hamao, enetakukoma!” Kila eti, “Hantu mi netonga unywi temuidima kuza?”

²³ Akavati, “Unywi mu va aha si, mi ni wa uko wanga; unywi mu va he si ii, mi si wa he si ii.

²⁴ Nicho nemuti, Munefwia he mabanu enyu; ambu mwekisaitikija iti nimi Ye, munefwia he mabanu enyu.”

²⁵ Niho vakamti, “We u muni?” Yesu akavati, “Nire icho nemuvwirire too aho.

²⁶ Nina vijinki vya kuteta na vya kumulaha; mira ula enitumie ni wa idi, nami vila nevisikie he Ye nivyo neviteta he si ii.”

²⁷ Neri tevetwarije iti evalangia Vava.

²⁸ Niho Yesu akavati, “Mwekinekenja kumkweja Mwana wa Mntu, niho mwenemanya iti nimi Ye; na iti sironga mburi he mikundire yangu, mira sa vuntu Vava enichejije nivwo vuntu neteta.

²⁹ Na ula enitumie e hamwe nami; tenishighie mwenye; ambu misi yose nironga vila vyemwizihira.”

³⁰ Aho ekiteta ivyo vajinki vakamwitikija.

Vayuda vekanana ne Yesu

³¹ Niho Yesu akavati vala Vayuda vemwitikije, “Unywi mwekiikaa he kiteto changu mwaoka varateri vangu kweri;

³² kangi munemanya idi, na iyo idi inemukombola.”

³³ Vakamgharusha, “Uswi tu lukolo lwakwe Abrahamu, neri tetunaoka vazoro va mntu narini; we uti ze, ‘Munekombolwa?’”

³⁴ Yesu akavagharusha, “Kididi, kididi, nimutio, Ula eronga mabanu ni mzoro wa mabanu.

³⁵ Neri mzoro teikaa kaa misi yose; mwana eikaa kae na kae.

³⁶ Kakicha Mwana ekimukombola, mwakombolwa kweri.

³⁷ Nemumanyije iti unywi mu lukolo lwakwe Abrahamu; mira muenda kunikoma nihala kiteto changu chesiho he unywi.

³⁸ Vila nevivonie he Vava nivyo neviteta; na unywi nirehuvo vila mwevisikie he vava wenyu nivyo mwevironga.”

³⁹ Vakagharusha, vakamti, “Vava wetu ni Abrahamu”! Yesu akavati, “Nanga mweki vana vakwe Abrahamu mwekironga ndima jakwe Abrahamu.

⁴⁰ Mira iki muenda kunikoma, mi mntu nemuvwirire idi nesikie ha Mrungu. Abrahamu teketie huvo.

⁴¹ Unywi muronga ndima ja vava wenyu.” Niho vakamti, “Uswi tetumoghiwe kwa mashindo; uswi tuna Vava mmwe eye Mrungu.”

⁴² Yesu akavati, “Kakicha Mrungu neki Vava wenyu mwekinikunda mi; ambu nefumie he Mrungu, nikaza; neri sikuzire mi mwenye, mira ye niye enitumie.

⁴³ Hanini mwesitwarija ivyo neteta? Ni hala unywi mwesiidima kusikia kiteto changu.

⁴⁴ Unywi mu vana va vava wenyu Shetani, na tama ja vava wenyu nijo mwekunda kujiketa. Ye neki mkomi too kuvoka; neri teimuke he idi, ambu heye tehena iyo idi. Ekiketa mongo eteta vila e vyakwe mwenye; ambu ye ni mmongo na vava wawo.

⁴⁵ Nami kila neteta vila e vya idi temuniitikija.

⁴⁶ Ni ani he unywi enikonesha iti nina mabanu? Nami nekiteta idi hanini mwesiniitikija?

⁴⁷ Ye e wa Mrungu esikia viteto vya Mrungu; heicho unywi temuvisikia, ambu temu va Mrungu.”

⁴⁸ Vayuda vakagharusha, vakamti, “H’ii! tetuteta nezo twekiti we u Msamaria, kangi una mpepo?”

⁴⁹ Yesu akagharusha, “Mi sina mpepo; mira mi nimshimia Vava wangu, na unywi munikondia shima yangu.

⁵⁰ Neri mi sienda ngazo yangu; hena ye eienda na kulaha.

⁵¹ Kididi, kididi, nimutio, ‘Mntu ekigurisha kiteto changu tekavone kifwa neri kae na kae.’”

⁵² Niho Vayuda vemti, “Iki twamanya iti una mpepo. Abrahamu efwie na varoti vefwie, nawe uti, ‘Mntu ekigurisha kiteto changu tekavone kifwa neri kae na kae;’

⁵³ we u m’baha kumkela vava wetu Abrahamu efwie? Na varoti vefwie! Ukughosha ani?”

⁵⁴ Yesu akagharusha, “Nekikukaza mwenye ngazo yangu si kintu; enikaza ni Vava wangu, eye unywi mweti ni Mrungu wenyu.

⁵⁵ Neri unywi temummanyije; mira mi nimmanyyije. Nekiti iti simmanyije, nioka mmongo sa unywi; mira nemmanyije, na kiteto chakwe nekigurishe.

⁵⁶ Abrahamu, vava wenyu, eking’arire vuntu enezavona msi wangu; naye akauvona, akaizihirwa.”

⁵⁷ Niho Vayuda vakamti, “We tunakolosha miaka makumi masano, nawe wamvona Abrahamu?”

⁵⁸ Yesu akavati, “Kididi, kididi, nimutio, Abrahamu esinaoka, mi nekireho.”

⁵⁹ Niho vetoa mabwe nesa vamvirite; mira Yesu akakuvisa, akafuma he nyumba ya mtaso.