YOHANE 7 - Chasu New Testament 1967

Yesu na vajinawe

¹ Nyuma ya ivyo Yesu ekitonga uko Galilaya; tezeenda kutonga kangi Yudea, ambu Vayuda vekienda kumkoma.

² Na ula msi m’baha wa Vayuda, msi wa vubanda, wekiho hafuhi.

³ Niho vandughu vakwe vakamti, “Vuka aha utonge Yudea, nesa varateri vako navo vaveiwe kuvona ndima jako wejironga.

⁴ Ambu tehena mntu eronga mburi kwa mpiso, naye mwenye eenda kumanyika. Wekiketa mburi iji, huvo kuvonyeshe he si ii”

⁵ Ambu neri vandughu vakwe tevekimwitikije.

⁶ Niho Yesu akavati, “Igheri langu lesinafika; mira igheri lenyu liho misi yose.

⁷ Si ii teiidima kumuvihiwa unywi; mira mi inivihiwa, kila mi neitetia vuonwa iti ndima javo ni mbivi.

⁸ Kweani engaunywi he uo msi m’baha; mi sinate kukwea he uo msi m’baha; ambu igheri langu telifika.”

⁹ Naye ekinakenje kuvavwira ivyo, akakuikarira du uko Galilaya.

¹⁰ Vandughu vakwe vakanakenje kukwea kutonga he uo msi m’baha, niho naye akakwea, si he kukufunyirija mira kwa mpiso.

¹¹ Niho Vayuda vkamwenda he ula msi m’baha, vakati, “Eho hio?”

¹² Hakaketa madunkunyiko mangi he llula luvungano vuntu vwakwe. Va kumwe vakati, “Ni mntu wedi.” Na vangi vakati, “Si huvo, mira eisha mavungano.”

¹³ Mira tehena emlangie boo, kila vekivafoleka Vayuda.

Yesu echeja uko Yerusalemu iti efumie ha Mrungu

¹⁴ Hekifika ghati na ghati ya ula msi m’baha, Yesu akakwea akaingia he Nyumba ya mtaso, akacheja.

¹⁵ Vayuda vakamaka vekiti, “Uu eidime ze kuketa icha naye esisomie?”

¹⁶ Niho Yesu akavagharusha, akati, “Michejire yangu si yangu mwenye, mira ni ya ula enitumie.

¹⁷ Mntu ekikunda kuronga mikkundire yakwe, enemanya mburi ja ila michejire iti ifuma ha Mrungu, kana iti mi niteta vyangu mwenye du.

¹⁸ Ula eteta vyakwe mwenye du, eenda ngazo yakwe mwenye; mira ula eenda ngazo ya ula emtumie, uo ni wa idi, neri heye tehena makombere.

¹⁹ H’ii! Mose temuinkie myomongwa? mira tehena neri mmwe wenyu eigurisha myomongwa. Hanini mweenda kunikoma?”

²⁰ Luvungano vakagharusha, “Oo! utena mpepo! Ni ani eenda kukukoma?”

²¹ Yesu akagharusha, akavati, “Mi nerongie ndima mwe na unywi vose muimaka.

²² Mose akimuinkie kitavani; mira si iti kifuma he Mose, mira he vazima; na unywi mutavana mntu msi wa sabato.

²³ Heicho kakicha mntu etavanwa msi wa sabato, nesa myomongwa yakwe Mose isirekondika, hanini mi mwenisikia oro kila nebandije mntu pere msi wa sabato?

²⁴ Musikulahire vuntu mwevona, lahani mlaho wa idi.”

²⁵ Vantu kumwe va Yerusalemu vakati, “H’ii! Uu siye vekimwenda iti vamkome?

²⁶ Kave eteta boo, neri tehena cho vemvwira! Hangi kive ava vabaha vemanyije nezo iti uu niye Kristo?

²⁷ Mira uu twemanyije hantu efuma naho; mira Kristo ekineza tehena emanya hantu efuma.”

²⁸ Niho Yesu akateta na wanga he nyumba ya mtaso, ekicheja, ekiti, “Mi mwenimanyije, na uko hantu nefuma mwehamanyije; neri sikuzire mi mwenye; mira ula enitumie ni wa idi, unywi mwesimmanyije.

²⁹ Mi nemmanyije kila nefuma hakwe, naye niye enitumie.”

³⁰ Niho vakaenda kumgura; mira tehena mntu erongie mkono, ambu saa yakwe yasanafika.

³¹ Vantu vajinki he luvungano vakamwitikija; vakati, “Kristo ekineza, ngea eneronga maluvengo mangi kuvecha aa uu earonga?”

³² Vafarisayo vakasikia luvungano vekidunkunyika huvo vuntu vwakwe; niho vabaha va vatasi na Vafarisayo vakatuma vandima vamgure.

³³ Niho Yesu akati, “Heshele kakenda kadori nerena na unywi; niho nenetonga he ula enitumie.

³⁴ Munenienda neri temukanivone; hantu mi neho unywi temuidima kuza.”

³⁵ Niho Vayuda vakatiana, “Uu eneyoa hi uswi tusivone? Kana etatonga he mzariko wa Vagiriki na kuvacheja Vagiriki?

³⁶ Ni kiteto ani icho etetie, ‘Munenienda neri temukanivone; kangi, hantu mi neho unywi temuidima kuza?’”

Mpombe ya nkalamo

³⁷ Ingeri msi ula wa kukenjija, ula msi m’baha ewo m’bahisha, Yesu akaimuka akateta na wanga ekiti, “Mntu ekisikia nkiru, naze hangu anwe.

³⁸ Eniitikija mi, sa vuntu maandiko etetie, myeta ya mpombe yena moo inefuma heye.”

³⁹ Icho kiteto ekitetie he mburi ya Mpeho, eye vala vemwitikija venezamwinkwa; ambu Mpeho tekinazi, ni hala Yesu esekinakazwa.

⁴⁰ Niho vakumwe he luvungano vekinasikie ivyo viteto, vakati, “Cha kididi uu niye ula mroti.”

⁴¹ Vakumwe vakati, “Uu niye Kristo.” Vangi vakati, “Hamao, Kristo efuma Galilaya?

⁴² Iandiko telitetie iti, ‘Kristo efuma he lukolo lwakwe Davidi, na kufuma Betlehemu, ula muzi Davidi ekikaa?’”

⁴³ Niho heketa kughavanyika he luvungano vuntu vwakwe.

⁴⁴ Va kumwe vakaenda kumgura, mira tehena mntu emrongie mkono iti amgure.

⁴⁵ Niho vandima vakavaswia vabaha va vatasi na Vafarisayo. Navo vakavati, “Hanini mwekisamwete?”

⁴⁶ Vandima vakagharusha, “Narini tehena mntu anateta sa vuntu uu eteta.”

⁴⁷ Niho Vafarisayo vakavagharusha, “Hama na unywi mwaishika?

⁴⁸ He vabaha ni ani emwitikije, kana he Vafarisayo?

⁴⁹ Mira luvungano ava vesimanyije myomongwa vararwa.”

⁵⁰ Nikodemo akavati, (naye ni ula ekifikie hakwe kae, ambu ni mmwe wavo):

⁵¹ “Hamao! myomo yetu imlaha mntu esinarongasikijwa na kumanya cho eketa?”

⁵² Vakagharusha, vakati, “Hama! we nawe wefumie Galilaya? Enda unevona iti uko Galilaya tehefuma mroti.” [

Mche egurirwe ekishinda

⁵³ Vakaghotoka, mntu na kaa hakwe.