YOHANE 6 - Chasu New Testament 1967

Kuighutija vantu viku visano

¹ Nyuma ya ivyo Yesu akatonga sela ila ya bahari ya Galilaya, niyo ya Tiberia.

² Na luvungano lubaha vakamratera, kila vevonie maluvengo erongiie vawaji.

³ Yesu naye akakwea he ntuvi, akaikaa si uko hamwe na varateri vakwe.

⁴ Na Pasaka, msi m’baha wa Vayuda, wekiho hafuhi.

⁵ Aho Yesu ekivusha meso akwe akavona luvungano lubaha vekiza hakwe, akamti Filipo, “Tuzorire hi mikate nesa ava vale?”

⁶ Na icho ekitetie kwa kutamghesha; ambu ye mwenye ekimanyije cho eneketa.

⁷ Filipo akamgharusha, “Mikate ya dinari maghana meri teivafika iti kila mmwe avone neri kadori du.

⁸ Mmwe wa varateri vakwe, Andrea mjinawe Simioni Petro, akamti,

⁹ “Aha hena m’bwange ena mikate misano ya ngano na samaki mbiri, mira ivi ni kini he vantu vajinki sa ava?”

¹⁰ Yesu akati, “Ikajani vantu si.” Hala hantu hekina mani mangi. Vantu va kiume vakaikaa si, vose ni sa viku visano.

¹¹ Niho Yesu akaghuha ila mikate, akaanjela, akavaghavia vala veikae si; nirehuvo na jila samaki, sa vuntu veenda.

¹² Navo vekinaghute, akavati varateri vakwe, “Vunganyani vibendo vyeshele, hasikete cho cheteka.”

¹³ Niho vakavivunganya, vakaizuja vikapu ikumi na viri, vibendo vya mikate misano ya ngano vyeshele hala vekila.

¹⁴ Niho vala vantu vekinavone lula luvengo eketie, vakati, “Kididi uu niye ula mroti eza he ii si.”

Yesu etonga mpisoni, evata wanga he mpombe

¹⁵ Ingeri Yesu ekinamanye iti veenda kuza kumgura iti vamghoshe mfumwa, akanyyembeluka, akatonga kangi he ntuvi ye mwenye.

¹⁶ Hekinaswe varateri vakwe vakasea he bahari;

¹⁷ vakaingia he ngilawa vakavoka kukelanya bahari kutonga Kapernaumu. Naho kija chakenja kugwa, neri Yesu tekinavafikia.

¹⁸ Na bahari nayo ikavoka kunyavurika vuntu vwa nkungu mbaha yefefeta.

¹⁹ Niho vetonja ngilawa yavo kiringanyo cha maili ntatu nne, vakamvona Yesu ekivata wanga he bahari, ekizengelela he ngilawa; vakafoleka.

²⁰ Naye akavati, “Nimi, musifoleke.”

²¹ Niho vakaenda kumghuhia na he ngilawa; hala indi ngilawa ikafika he lila isanga hantu vekitonga.

Vantu veenda luvengo

²² Msi wa keri luvungano veimuke sela ya bahari vakavona iti tehena ngilawa ingi uko, esire mwe; kangi iti Yesu teingie he ila ngilawa hamwe na varateri vakwe; mira varateri vakwe vetongie vo venye.

²³ Mira hakaza ngilawa jingi kufuma Tiberia mhaka hafuhi na hala hantu veliie mikate, igheri lila Mfumwa aanjelila.

²⁴ Niho luvungano vekinavone iti Yesu teho uko, neri varateri vakwe, vakaingia he ngilawa vo venye, vakatonga Kapernaumu vekimwenda Yesu.

²⁵ Aho vekinamvone sela ila ya bahari, vakamti, “Rabi, we wezie rini aha?”

Kijo cha nkalamo

²⁶ Yesu akavagharusha, akati, “Kididi, kididi, nimutio, Unywi munienda, si hala mwevonie luvengo, mira ni kila mwelie ila mikate mukaighuta.

²⁷ Musibinukie kijo chekondika, mira kijo cheneikaa mhaka he nkalamo ya kae na kae; echo Mwana wa Mntu enemuinka, ambu uo niye Vava eye Mrungu.”

²⁸ Niho vakamti, “Tughende ze nesa tuidime kuronga ndima ja Mrungu?”

²⁹ Yesu akagharusha, akavati, “Ii niyo ndima ya Mrungu, mumwitikije ula etumiwe niye.”

³⁰ Vakamti, “Ni luvengo ani ra waronga, nesa tuluvone tukuitikije? Uronga ndima ani?

³¹ Vavava vetu vekie mana uko nyika, sa vuntu cheandikwe: ‘Ekivainkie kijo cha uko wanga nesa vale.’”

³² Yesu akavati, “Kididi, kididi, nimutio, Mose siye ekimuinkie kijo kila cha uko wanga, mira Vava wangu emuinka unywi kijo cha idi chefuma uko wanga.

³³ Ambu kijo cha Mrungu ni kila chesea kufuma uko wanga na kuinka si ii nkalamo.”

³⁴ Niho vakamti, “Mfumwa, misi yose utuinke icho kijo.”

³⁵ Yesu akavati, “Mi nimi kijo cha nkalamo; ye eza hangu tekasikie nza neri, na ula eniitikija tekazesika nkiru narini.

³⁶ Mira nekimuvwirire iti mwenivonie mira temuniitikije.

³⁷ Vose Vava eninka veneza hangu; na kila ye eza hangu sikamtaghe na nze neri.

³⁸ Ambu mi siseie kufuma uko wanga iti nironge mikundire yangu, esire mikundire ya ula enitumie.

³⁹ Na mikundire ya ula enitumie ni ii, iti he vala vose eninkie nisiretesha neri mmwe, mira nimvushe he vefwie msi wa mkengelejo.

⁴⁰ Ambu mikkundire yakwe Vava ni ii, iti ye emrereha Mwana na kumwitikija ye, akete nkalamo ya kae na kae; nami ninemvusha he vefwie msi wa mkengelejo.”

⁴¹ Niho Vayuda vakadunkunyika, kila etie, “Mi nimi kijo cheseie kufuma uko wanga.”

⁴² Vakati, “Uu siye Yesu, mwana Yosefu, eye twemmanyije vavee na mlala wavo? Iki eti ze uu, ‘Netesea kufuma uko wanga?’”

⁴³ Niho Yesu akagharusha, akavati, “Musidengerete venye kwa venye.

⁴⁴ Tehena mntu eidima kuza hangu ekisajutwa ni Vava enitumie; nami ninemvusha he vefwie msi wa mkengelejo.

⁴⁵ Cheandikwe he varoti: ‘Na vose veneoka vechejijwe ni Mrungu.’ Heicho ula esikia na kukucheja he Vava, eza hangu.

⁴⁶ Si iti hena ye anamvona Vava, esire ula efumie ha Mrungu; uo niye emvonie Vava.

⁴⁷ Kididi, kididi, nimutio, Ye eitikija ena nkalamo ya kae na kae.

⁴⁸ Mi nimi kijo cha nkalamo.

⁴⁹ Vavava venyu velie mana uko nyika; vakafwa.

⁵⁰ Iki ni kijo cheseie kufuma uko wanga, iti mntu akile asirefwa.

⁵¹ Mi nimi kijo chena nkalamo cheseie kufuma uko wanga; mntu ekila icho kijo enekalama kae na kae. Na kila kijo mi nenekifunya ni mwiri wangu, he vuntu vwa nkalamo ya si ii.”

⁵² Niho Vayuda vekanana venye na venye vekiti, “Uu mntu eidima ze kutuinka mwiri wakwe tuule?”

⁵³ Niho Yesu evati, “Kididi, kididi, nimutio, Mwekisala mwiri wa Mwana wa Mntu, na kunwa sakame yakwe, temuna nkalamo yeho he unywi.

⁵⁴ Ye ela mwiri wangu na kunwa sakame yangu ena nkalamo ya kae na kae; nami ninemvusha he vefwie msi wa mkengelejo.

⁵⁵ Ambu mwiri wangu ni kijo cha idi, na sakame yangu nichanwa cha idi.

⁵⁶ Ye ela mwiri wangu na kunwa sakame yangu eikaa hemi; nami niikaa heye.

⁵⁷ Sa vuntu Vava mwenye moo enitumie mi, nami nina moo he Vava; nirehuvo ye enila eneketa moo hemi.

⁵⁸ Iki nicho kijo cheseie kufuma uko wanga; si sa vuntu vavava velie vakafwa; mira ye ela kijo icho enekalamaa kae na kae.”

⁵⁹ Viteto ivyo evitetie he sinagogi, hala ekicheja uko Kapernaumu.

Varateri vena matatanyi

⁶⁰ Niho vantu vajinki he varateri vakwe vekinasikie, vakati, “Mburi ii ni nkuji, ni ani eveiwe kuisikia?”

⁶¹ Yesu akatwarija he ngoro yakwe, iti varateri vakwe vedunkunyikia icho kiteto, akavati, “H’ii! kiteto icho kimuhosha?

⁶² Kineoka ze, mwekinevona Mwana wa Mntu ekikwea na uko hantu ekiho kivoko?

⁶³ Mpeho niyo yekalamija, mwiri teuveiwa kintu; viteto ivyo namuvwira ni mpeho, kangi ni nkalamo.

⁶⁴ Mira hena va kumwe he unywi vesiitikija.” Ambu Yesu ekiremanya too kuvoka iti ni vani vesiitikije, na ni ani enemrengeha.

⁶⁵ Akati, “He vuntu vwa icho nemuvwirire kuti tehena mntu eidima kuza hangu esiteghenjwa ni Vava wangu.”

Petro ezumira iti Yesu ni Kristo

⁶⁶ He vuntu vwa ivyo vajinki he varateri vakwe vakahunduka na nyuma, vesiretonjanya naye kangi.

⁶⁷ Niho Yesu akavati, vala ikumi na veri, “H’ii! na unywi muenda kutonga?”

⁶⁸ Niho Simoni Petro akamgharusha, “Mfumwa, tutonge hakwe ni? We una viteto vya nkalamo ya kae na kae.

⁶⁹ Na uswi twaitikija, kangi twamanya iti we niwe Ezerire wa Mrungu.”

⁷⁰ Yesu akavagharusha, “H’ii! mi simmusaghure unywi ikumi na veri, na mmwe wenyu ni mrenge?”

⁷¹ Ekimteta Yuda, mwana Simoni Iskarioti; ambu uo niye enemrengeha; naye ni mmwe wa vala ikumi na veri.