YOHANE 4 - Chasu New Testament 1967

Yesu na mche Msamaria

¹ Heicho Mfumwa, ekinamanye iti Vafarisayo vesikie iti Yesu agharusha varateri vajinki kumkela Yohane, na kubatiza,

² (mira Yesu mwenye tebatize, esire varateri vakwe),

³ akashigha Yudea akatonga wa Galilaya.

⁴ Naye kikamtara kuvecha ghati ya Samaria.

⁵ Niho akafika he muzi wa Samaria weitangwa Sikari, hafuhi na ula mghunda ewo Yakobo ekimunkie Yosefu mwanawe.

⁶ Hala hekina kisima chakwe Yakobo. Kila Yesu ekifikiwe vuntu vwa ntambo yakwe, akakuikarira he kisima. Aho neki saa mtandatu.

⁷ Hakaza mche wa Kisamaria kuzataha mpombe. Yesu akamti, “Ninka mpombe ninwe.”

⁸ Ambu varateri vakwe vekitongie he muzi kuzora kijo.

⁹ Niho ula mche wa Kisamaria akamti, “Kiveze we Myuda kuomba mpombe hemi, nami ne mche wa Kisamaria?” (Ambu Vayuda teveongerana na Vasamaria.)

¹⁰ Yesu akagharusha, akamti, “Nanga wekimanyije vila vya mbonea ya Mrungu, kangi iti ni ani ekuti, ‘Ninka mpombe ninwe,’ wekimwomba engaye, naye ekikunka mpombe ya nkalamo.”

¹¹ Ula mche akamti, “Mfumwa, tuna kintu chatahia, na kisima cheseishe; ana wavonia hiyo iyo mpombe ya nkalamo?

¹² Ha! we u m’baha kumvecha vava wetu Yakobo, etuinkie iki kisima, naye mwenye akanwa mpombe yacho, hata na vanawe na mafio akwe?”

¹³ Yesu akagharusha, akamti, “Ula enwa mpommbe ii enesikia wa nkiru;

¹⁴ mira uo enenwa mpombe ila mi nenemunka tekazesikia nkiru na too; mira ila mpombe nenemunka ineoka ndeni heye kisima cha mpombe, yekiderereta mhaka nkalamo ya kae na kae.”

¹⁵ Ula mche akamti, “Mfumwa, ninka iyo mpombe nisizesikia nkiru neri nisizeza aha kutaha wa.”

¹⁶ Yesu akamti, “Tonga uremwitanga mme wako, uze naye aha.”

¹⁷ Ula mche akagharusha, “Sina mme.” Yesu akamti, “Wetetie nezo wekiti, ‘Sina mme;’

¹⁸ ambu wekina vome vasano, na uo wena naye iki si mme wako; aho wetetie cha idi.”

¹⁹ Ula mche akamti, “Mfumwa, nivona iti we u mroti!

²⁰ Vavava vetu vekitasa hena ntuvi ii, na unywi muti uko Yerusalemu niho hantu hetutara kutasia.”

²¹ Yesu akamti, “Mcheku, niitikija, saa ineza eyo mwesikaretasia Vava hena ntuvi ii, neri kula Yerusalemu.

²² Unywi mutasa kila mwesikimanyije; uswi tutasa cho twekimanyije, ambu lukio lufuma he Vayuda.

²³ Mira saa iza, nayo iho iki, eyo varetasa va idi venemtasa Vava he mpeho na idi. Ambu Vava evaenda vantu sa avo vemtasa.

²⁴ Mrungu ni Mpeho, na vala vemtasa Ye kivatara kumtasa kimpeho na idi.”

²⁵ Ula mche akamti, “Nemanyije iti Mesia eneza (eitangwa Kristo); naye ekiza, ye enetufunukurira mburi jose.”

²⁶ Yesu akamti, “Mi neteta nawe Niye.”

²⁷ Hala indi varateri vakwe vakaza, vakamaka kila eteta na ula mche; mira tehena etie, “Uendani?” kana, “Hanini weteta naye?”

²⁸ Niho ula mche akashigha sangu yakwe, akatonga he muzi, akavavwira vantu,

²⁹ “Nzoni muyoe mntu enivwirire mburi jose nejirongie. H’ii, tekive iti uu niye Kristo?”

³⁰ Niho vakafuma he muzi, vakamswia.

³¹ Uko nyuma varateri vakwe vakamsingirija vekiti, “Rabi, la.”

³² Akavati, “Mi nina kijo unywi mweksikimanyije.”

³³ Niho varateri vakwe vakatiana, “Ngea hetena mntu emwetie kijo?”

³⁴ Yesu akavati, “Kijo changu ni kuronga kikundire cha ula enitumie, nikenje ndima yakwe.

³⁵ Unywi temuti, ‘Heshele mieji mine, niho heneketa lufindiki?’ Rereha mi nimutio, Vushani meso enyu murerehe mighunda, iti yakenja kuela, yaringania he lufindiki.

³⁶ Na ula efindika eghuha mhako, na kuvunganya ntunda he nkalamo ya kae na kae; ula ehanda na ula efindika kive vaizihirwe hamwe.

³⁷ Ambu aho kiteto icho kioka idi: ‘Mmwe ehanda, ungi efindika.’

³⁸ Mi nemutumie mufindike vila mwesivibinukie; vangi vebinuke, unywi mwaingia he kubinuka kwavo.”

³⁹ Na he ula muzi Vasamaria vajinki vakamwitikija he vuntu vwa kiteto cha ula mche, etetie vuonwa kuti, “Enivwirire mburi jose nejirongie.”

⁴⁰ Aho vala Vasamaria vekinamswie vakamsemba aikae havo; naye akaikaa uko misi miri.

⁴¹ Vantu vajinkisha vakaitikija vuntu vwa kiteto chakwe.

⁴² Vakamti ula mche, “Iki twaitikija, neri si vuntu vwa viteto vyako du; ambu uswi venye twasikia, kangi twamanya cha idi iti uu niye Mkija wa si ii.”

Yesu em’banja mwana wa mlao uko Galilaya

⁴³ Misi iyo miri yekivecha akavuka hala, akatonga Galilaya.

⁴⁴ Ambu Yesu mwenye etetie vuonwa iti mroti tevona shima he isanga lakwe mwenye.

⁴⁵ Aho ekinafike Galilaya, Vagalilaya vakamghuhia; kila vevonie mburi jose ejirongie kula Yerusalemu igheri la msi m’baha; ambu navo vekitongie he ula msi m’baha.

⁴⁶ Niho akafika wa Kana ya Galilaya, hantu ekigharushe mpombe ikaoka mvinyo. Aho hekina mlao mmwe ekina mwana wakwe ekiwajishwa uko Kapernaumu.

⁴⁷ Uo ekinasikie iti Yesu ezie kufuma Yudea mhaka Galilaya, akamswia, akamsemba asee am’banje mwanawe; ambu eki hafuhi na kufwa.

⁴⁸ Niho Yesu akamti, “Mwekisavona maluvengo na vimako temukaitikije neri.”

⁴⁹ Ula mlao akamti, “Mfumwa, sea mwanangu esinafwa.”

⁵⁰ Yesu akamti, “Kutongire, mwanao ereho.” Ula mntu akaitikija kila kiteto akivwirwa ni Yesu, niho akatonga.

⁵¹ Aho eho esea vazoro vakwe vakamzana, vekiti mwanawe ereho.

⁵² Niho akavavwija, ni saa ani evokie kuketa kachuu; navo vakamti, “Ighuo saa mfungate, isha likamshigha.”

⁵³ Niho vavee akamanya iti nire saa ila ila evwirirwe ni Yesu, “Mwanao ereho.” Akaitikija ye na vose va kaa hakwe.

⁵⁴ Ulwo ni luvengo lwa keri Yesu erongie aho ekinaze Galilaya kufuma Yudea.