YOHANE 3 - Chasu New Testament 1967

Yesu egaya ne Nikodemo

¹ Hekina mntu mmwe wa Vafarisayo, eitangwa Nikodemo, m’baha wa Vayuda.

² Uo akamzia Yesu kio, akamti, “Rabi, twemanyije iti we u mcheji, wefumie ha Mrungu; ambu tehena mntu eveiwa kukera maluvengo aa we weaketa, kakicha Mrungu esiho hamwe naye.”

³ Yesu akagharusha, akamti, “Kididi, kididi, nikutio, Mntu ekisamoghwa ka keri, teidima kuvona vufumwa vwa Mrungu.”

⁴ Nikodemo akamti, “Mntu eidimaze kumoghwa anakua? Eveiwa kuingia he ndeni ya mlala wavo ka keri amoghwe?”

⁵ Yesu akagharusha, “Kididi kididi, nikutio, Mntu ekisamoghwa kwa mpombe na kwa mpeho, tekaidime kuingia he vufumwa vwa Mrungu.

⁶ Kila chemoghiwe ni mwiri nire mwiri, na chemoghiwe ni Mpeho nire Mpeho.

⁷ Usimake iti nekutie, niresari kumoghwa ka keri.

⁸ Nkungu ifefeta vuntu yekunda, na mrurumo wayo uusikia mira tumanya hantu yefuma, neri hantu yetonga; nirehuvo na miikarire ya kila muntu emoghiwe ni Mpeho.”

⁹ Nikodemo akagharusha, akamti, “Ivi viidimika ze?”

¹⁰ Yesu akagharusha, akamti, “Hamao! We mcheji wa Vaisraeli, na ivi tuvimanyije?

¹¹ Kididi, kididi, nikutio, Kila twekimanyije tukiteta, na kila twekivonie tukitetia vuonwa; na vuonwa vwetu temuvukunda.

¹² Ukinakiche nemuvwirire mburi ja aha si, neri temuitikija, muneitikija ze nekimuvwira mburi ja uko wanga?

¹³ Tehena mntu anakwea uko wanga, esire ula eseie kufuma uko wanga, eye Mwana wa Mntu.

¹⁴ Na sa vuntu Mose evushije ila nyoka uko nyika, nirevwo vuntu chenemtara Mwana wa Mntu akwejwe,

¹⁵ nesa kila emwitikija Ye avone nkalamo ya kae na kae.

¹⁶ Ambu nivwo vuntu Mrungu ekundie si ii, mhaka akamwinkija Mwanawe ere mmwe, nesa kila mntu emwitikija asiteke, mira avone nkalamo ya kae na kae.

¹⁷ Ambu Mrungu temtumie Mwanawe he ii si iti alahe si ii, esire iti si ii ikijwe vuntu vwakwe.

¹⁸ Ula emwitikija ye telahwa; ye esimwitikija akenja kulahwa, ambu ni kila asaitikija izina la Mwana wa Mrungu ere mmwe.

¹⁹ Na uu niwo mlaho; iti kianga chezie he ii si, na vantu vakakunda kija kukela kianga; ambu mihiro yavo neki mivivi.

²⁰ Ambu ula ehira vivivi evihiwa kianga, neri teza he kianga, mihiro yakwe isirebunkulwa.

²¹ Mira ye eronga vya idi eza he kianga, nesa ndima jakwe jivoneke boo iti jerongiwe he Mrungu.”

Yohane M’batizi emtetia wa Yesu vuonwa

²² Ivyo vyekinavecha Yesu na varateri vakwe vakatonga mhaka he isanga la Yudea; akashinda uko hamwe navo, akabatiza.

²³ Yohane naye ekiho uko Ainoni, hafuhi na Salimu, ekinatiza, kila uko hekina mpombe nyingi; na vantu vakamswia, vakabtizwa.

²⁴ Ambu Yohane tekinagerwa he kichungo.

²⁵ Hakaketa makanano he varateri vakwe Yohane na Myuda mmwe he mburi ya kuzera.

²⁶ Vakamswia Yohane, vakamti, “Rabi, ula wekina naye sela ya Yordani, ula wemtetiie vuonwa, rereha zuo ebatiza, na vantu vose vemswia.”

²⁷ Yohane akagharusha, akati, “Mntu tenacho eidima kughuha esire kila ekiinkiwe kufuma uko wanga.

²⁸ Unywi venye munitetia vuonwa kuti netetie, ‘Mi simi Kristo, mira netetumwa iti nirongorire.’

²⁹ Ula ena na mwai niye mralondola; mira mmbwie wa mralondola, ula eimuka na kumsikija, eizihirirwa mno izii la mralondola. Huvwo kuizihirwa kwangu kwakoloka.

³⁰ Ye kimtara aongejike, mira mi niduike.

³¹ “Ula eza kufuma uko wanga, uo eho wanga ya vyose. Ula e wa ili isanga, nire wa kiili isanga, naye eteta vya ili isanga. Ula eza kufuma kufuma uko wanga, uo eho wanga ya vyose.

³² Vila evivonie na kuvisika nivyo evitetia vuonwa, neri tehena ekunda vuonwa vwakwe.

³³ Ula ekunda vuonwa vwakwe, evikie kisimbiko iti Mrungu ni wa idi.

³⁴ Ambu ula etumiwe ni Mrungu eteta viteto vya Mrungu; ambu tefunya Mpeho kwa kiringanyo.

³⁵ Vava emkundie Mwana, naye emunkie vyose he mkono wakwe.

³⁶ Ula emwitikija Mwana ena nkalamo ya kae na kae; ye esimwitikija Mwana tekavone nkalamo, mira oro ya Mrungu imwikaia.”